27. स्योकांगत सामरी ग कथा

तीज्या, यहूदी व्यवस्था ग तिग लाद मि यीशु गै न्योरो रास| उ जम्मा जा हिदि दिखाम चींथ निस कि यीशु गलत रीति स शिक्षा दाग तास| हिना दंची उस ल्यैस, “ऐ रीथि, अनंत जीवन तिम्म दंची जी खै स्युंगम?” यीशु सै जबाब, “परमेश्वर ग व्यवस्था कू खै करिसिद अनि?”

अति मि सै ल्यैस, “उ ल्हेता कि आफिग परमेश्वर स आफिग पूरो मन, प्राण, सामर्थ, हंग बुद्धि स प्रेम स्युंगनी| हंग आफिग पड़ोसी स आफि नारुक्त प्रेम स्युंगनी|” यीशु सै जबाब दास, “गै साचो ल्हेन! हंग गै हिना स्युंगम च्यंग, ता गजा अनंत जीवन मिलियंग|”

हंग उ व्यवस्था ग लाद मि मंग जा दिखाम चींथ निस कि उग जीवन टंगम ग ढंग बुद निस| हिना दंची उस यीशु जा रूस, “ठीक अनि, ता जिग पड़ोसी खमी ल्है?”

यीशु सै अति व्यवस्था गै लाद मि जा तिग कथा बताम गै चैन्तू जबाब दास| “तिग यहूदी मि निस जइ तिग अम कू खचि दिग यरुशलेम खचि यरीहो ग यात्रा दिग निस|”

“हंग दूमा खूद मंग सै उजा तिन्स हंग उजा धुंगन्नस| उसिस उसिग जम्मा बथो पिकोरस हंग उजा लगभग सिचिवास लूबन्नस| हंग उसी पिदिन्नस|”

“उग निमफन, तिग यहूदी पुजारी अति अम कू खचि दिस| अति पुजारी सै अति मि जा अम कू करचिद तिन्स| हंग उस उजा तिन्स ता उ अम कू खचि दुसरो अम कू पिदिस| उस अति मि जा अति अम कू खचि मुतिंग पिदिस|”

“हिदिग निमफन दूमा ज्या ची दिम गै कथा तिग लेवी अति अमकू रास| (लेवी यहूदीयों ग तिग जात निस जइ मि सै मंदिर कू यहूदी पुजारी मंग ग सहायता स्युंग निस|”) अति लेवी री अम कू खचि दुसरो अम पिदिस| उस री अति मि जा मुतिंग पिदिस|”

“दुसरो मि जइ अति अम कू खचि रास| उ सामरिया ग तिग यूरासिरी निस| ( सामरी हंग यहूदी तिग दुसरो मि स रुसू स्युंगतान्नस|) अति सामरी सै अम कू अति मि जा तिन्स| उस तिन्स कि उ यहूदी निस, परंतु हजूरी उस उजा बुद स्योकांगस, हिना दंची उ उग निद कू दिस हंग उग गैनै कू लाडम स गितिस|”

“हजू अति सामरी सै अति मि जा आफिग गधा कू तास हंग उजा अति अम कू खचि तिग मि स्योंगसिम बं कू कोरग दिस जइ बं कू उस उग ओंगम गै खबर स्युंग तास|”

मूची ज्या, अति सामरी जा आफिग कूंचा कू दिम गै दिग निस| उस अति स्योंगसिम बं कू लन स्युंगद मि जा दूमा रुपया दास उस उजा ल्यैस, “अति मि ग खबर स्युंग ताम| हंग हिदि रुपया गै यंबा नग बाकी रुपया खर्च ल्हैम च्यंग जी थोकसिग रालंग बकतर गजा दाग हंग दिय|”

हंग यीशु सै अति व्यवस्था गै लाद मि जा रूस, “गनी खै चिचिग अनि? हिदि सुम मि मंग कू खचि खमी अति मि ग पड़ोसी अनि जइ मि जा लुटेने हंग लूब निस?” उस जबाब दास, “उइ जइ अति स्योकांगद निस|” यीशु सै उजा ल्यैस, “ गै दि हंग हिनाइ स्युंगयो|”