28. स्यांगमी ज्यूद राजा

तीज्या, तिग स्यांगमी ज्यूद राजा सै यीशु गै न्योरो राग उजा रूस, “हे लाद रीथि, अनंत जीवन तिम्म दंची जीजा खै स्युंगम परयंग?” यीशु सै उजा ल्यैस, “गै जीजा ‘लच्यंग बुद खोंग ल्हैतातन? तोंगमी तिगई लच्यंग बुद अनि, हंग उ परमेश्वर ल्है| खस्युंग कि गै अनंत जीवन थोचिम दंची ता परमेश्वर गै व्यवस्था ग स्यरचिद स्युंग |”

“जीजा खै खै आज्ञाओं ग स्यरचिद स्युंगम ग जरूरत अनि?” उस रूस| यीशु सै जबाब दास, “ हत्या मुस्युंगम| यद लन मुस्युंगम, मुखुम| झूठी मुफाम| आफिग बूबा हंग मुमा ग इज्जत स्युंगम, हंग आफिग पड़ोसी जा अफि नारुक्त प्रेम स्युंग्म|”

खस्युंग कि अति ज्यूद यूरासिरी सै ल्यैस, “जी आफिग सेनलंग खचि हिदि जम्मा आज्ञाओं ग स्यरचिद स्युंग तात| जीजा राज्या री दंची टांगद नीम ग होसिम दंची इता री खै स्युंगम ग जरूरत अनि?” यीशु सै उजा ओंग तास हंग उजा प्रेम स्युंगस|

यीशु सै जबाब दास, “हंग गै सिद्ध ल्हैम चींथ अनि ता दिग आफिग जम्मा बथों रंगती हंग उ धन गरीब मि मंग जा छुतियों, हंग गजा स्वर्ग कू धन मिलियंग| हंग जिग निमफन रा|”

जइ यीशु सै ल्यैस अति ज्यूद यूरासिरी सै यन्स ता उ मत्त मंगलातत कल्च, खस्युंग कि उ मत्त स्यांगमी निस हंग उस आफिग जम्मा संपती जा दास मुचिनस| उ निमफन थोकसिग यीशु गै खास्या कू खचि पिदिस|

हंग यीशु सै आफिग चेलों जा ल्यैस, “परमेश्वर गै राजू कू स्यांगमी मंग ग चीकू दिम मत्त दुखु अनि! हाँ, तिग स्यांगमी यूरासिरी गै परमेश्वर गै राजू कू दिम ग किराक्त कू खमी ऊँट ग छेब गै डोंगठो खचि भीतरु वोम्म सांगद अनि |”

जइ यीशु सै ल्यैस हंग चेलों मंग सै यन्नस ता उसी हा निन्नस| उसिस ल्यैस, हंग हिदि हिना अनि ता परमेश्वर खमी जा बचायंग?”

यीशु सै चेलों जा तिन्स हंग ल्यैस, “मि मंग गै दंची आफिग उद्धार स्युंगम मुश्किल अनि| खस्युंग कि परमेश्वर गै दंची खरी स्युंगम मुश्किल मुनिस|”

पतरस सै यीशु जा ल्यैस, “इंग चेले आफिग जम्मा बथो होतिग नग निमफन पिरयस ता इंग इनाम खै लयंग?”

यीशु सै जबाब दास, “हर तिग मि जइस जिग दंची चिम, बनम, पुस्या,बूबा, मुमा,सन्मंग, हंग सम्पति जा होतिस, उ उजा सय गुना अछो तिन्यंग हंग अनंत जीवन जा री तिन्यंग| हंग मत्त स जइ लरी अनि उसी निमफन नियंगन्न, हंग मत्त स जइ निमफन अनि उसी लरी नियंगन्न|”