29. यद गुलाम ग कथा

तीज्या, पतरस सै यीशु जा रूस, “ऐ रीथि, जीजा आफिग पी जा उलंग चू माफी दाम परयंग हंग उ जिग विरुद्ध पाप स्युंगता? खै निसै चू वास? “यीशु सै ल्यैस, “निसै चू माद, हंग निसै गै टुगच्छा ची चू !”हिदि गै चैन्तु, यीशु ग मतलब अनि कि इनजा राज्यारी माफ स्युंगम चिन्नी| हंग यीशु सै हिदि कथा बतास|

यीशु सै ल्यैस, “परमेश्वर ग राजू तिग राजा ना अनि जइ आफिग ढंगमी स हिसाब कोरम चींथ निस| उग तिग ढंगमी निस्यी लाख यन ग मजदूरी गै तिग पूद तौ ग तौ खंद मि निस|”

हंग अति ढंगमी आफिग तौ जा दा मुतरस, हिना दंची राजा सै ल्यैस, “हिदि ग तौ चुकाम दंची हिदि यूरासिरी जा हंग हिदिग मोमाल जा ढंगमी मंग ग रूप कू करांगति|”

“अति ढंगमी सै राजा गै न्योरो आफिग पै चुग करचिग ल्यैस।‘कृपा जिग जरू रिनचिनी, हंग जी आफिग तौ ग पूरो तौ दातियंग|’ राजा सै ढंगमी जा स्योकंगस, हिना दंची उस उग जम्मा तौ जा माफ कस्युंगस हंग उजा दिम दास|”

“हंग उ ढंगमी राजा गै न्योरो खचि छंगपंग दिस, ता उजा उग तिग साथो ढंगमी छिस जइ उग पी ला ची मजदूरी ग तौ खंद निस| अति ढंगमी सै आफिग साथो ढंगमी जा कचुमस हंग ल्यैस, ‘जइ नग यरतो जिग तौ अनि जीजा उग तौ चुकता स्युंगनी!”

“अति साथो ढंगमी सै पै चुग करचिग ल्यैस, ‘कृपा जिग जरू रिनचिनी हंग जी आफिग तौ ग पूरो चुकता स्युंगतियंग| ‘हंग हिदि गै बदला अति ढंगमी सै आफिग साथो ढंगमी जा जेल कू कमोकतीस जइ वास अति तौ चुकता मुस्युंगस|”

“खरी लिच्च उजा खमी गार ढंगमी मंग सै तिन्स हंग उसी मत्त दु:खु निस| उसी राजा गै न्योरो दिस हंग उजा जम्मा कथा बतास|”

“राजा सै अति ढंगमी जा हुईग ल्यैस, ‘ऐ यद ढंगमी! जीस नग तौ जा हिना दंची माफ कस्युंगती खस्युंग कि गसे जीजा होस्यी ल्हेनस| गस री हिनाइ स्युंगम चींथ निस| ‘ राजा हिलंग रुसू पिराद निस कि उस अति यद ढंगमी जा जेल कू कमोकतीस जइ वास कि उ आफिग जम्मा तौ थोकसिग पूरो मुस्युंगमो|”

हंग यीशु सै ल्यैस, “जिग स्वर्ग कू स्योंगसिद बूबा गनी कू खचि हर तिग गै जरू हिनाइ स्युंगयंग हंग गनी आफिग पी जा आफिग मन स माफी मुदाम च्यंग|