30. यीशु नइ हजार मि मंग जा दुकलंग दाता

यीशु सै आफिग प्रेरितों मंग जा प्रचार स्युंगम हंग मि मंग जा शिक्षा दाम दंची मत्त स यकरो-यकरो सोंग कू थिरस| हंग उसी अतकू नभस जइ बं कू यीशु निस ता उसिस उजा बतास कि उसिस खै स्युंग तास| हंग यीशु सै उसीजा यंगती गै दुसरो बं कू उग जरू तिग शांत बं कू दिग दूमा करचीम दंची रा ल्हैन| हिना दंची उसी तिग नाव कू स्योंगसिन्नस हंग यंगती गै दुसरो बं कू पिदिन्नस|

परंतु अतकू मत्त हिना मि मंग निन्नस जइ मि सै यीशु हंग चेलों मंग जा नाव कू दीद तिन्नेस| हिदि मंग उसी च्यंग लरी यंगती गै दुसरो बं दिम दंची यंगती गै खास्या खास्या कू खचि फोंग दिन्नस| हिना दंची यीशु हंग चेले नभम च्यंग ता मि मंग गै तिग पूद भीड़ उसिग रिहनचिम स्युंग अतकू लरी खचि निस|

अति भीड़ कू मिंगसिरी मंग हंग संमंग ग रुम्म गै च्यंग री नई हजार च्यंग री मत्त यूरासिरी निन्नस| यीशु सै उसी मंग जा मत्त स्योकंगस| यीशु गै दंची उसी मंग रोहकचा मून्द माला नारुक्त निन्नस| हिना दंची उस उसीजा शिक्षा दास हंग उसिग गुंदा कू जइ मि मंग कांगत निनेस उसीजा बुद स्युंगस|

न्यांगछ बकतर चेलों मंग सै यीशु जा ल्यैस, “थन यिल्त क्लच हंग खास्या कुतू खमी सोंग मुनिस| हिदि मंग जा दि ल्है खस्युंग कि उसी दिग जाम दंची खइ कोरग दि|”

हंग यीशु सै चेलों मंग जा ल्यैस, “गनी उसीजा जाम दंची खइ दा!” उसिस जबाब दास, “इन हिना खोंग स्युंगतन? इंजा ता नयी कूटू हंग निस्यी मिद न्या अनि|”

यीशु सै आफिग चेलों मंग जा ल्यैस कि उसी भीड़ गै मि मंग जा ची कुतू नासा-नासा गै यंबा कू स्योंगसिम दंची ल्है|

हंग यीशु सै नयी कूटू हंग निस्यी न्या कोरग स्वर्ग चैन्तु ओंगस, हंग अति दुकलंग दंची परमेश्वर जा धन्यवाद दास|

हंग यीशु सै कूटू ची न्या जा टुकरा स्युंगतास| उस मि मंग जा दाम दंची आफिग चेलों मंग जा उसी टुकरा दास| चेले मंग अति दुकलंग जा छुगइ तास, हंग उ खज्या मुज्यूस! उसी जम्मा मि मंग जाग कोत्त कज्जा|

अति गै निमफन, चेलों मंग सै अति दुकलंग जा थुमग तान्नस अति दुकलंग कनचिद निस हंग अति चेथे टोकरियों जा तीक्क कल्त निस! अति जम्मा दुकलंग उसी नयी कूटू हंग निस्यी न्या स पिराद निस|