31. यीशु ती कू यन्सीग अनि

नयी हजार मि मंग जा दुकलंग खिलाम गै निमफन, यीशु सै आफिग चेलों मंग जा नाव कू दिम दंची ल्यैस| उस उसीजा यंगती गै दुसरो बं कू दिम दंची ल्यैस हंग उ दूमा ज्या दंची अतकू स्योंगसिस| हिना दंची चेले मंग पिदिन्नस हंग यीशु सै भीड़ जा दि लोन्नस कि उसी आफिग चिमजा दिनी| हिदि गै निमफन, यीशु प्रार्थना स्युंगम दंची तिग यैयर कू पिदिस अतकू उ तोंगमी निस, हंग उस मुंछ वास होस्यी स्युंगस|

अति बकतर, चेले मंग आफिग नाव जा ति ग यरतो चलाग दिग निन्नस हंग खस्युंग कि नलन उसिग चैन्तु मत्त जोर स बोग निस मत्त मुंछ ल्हेग री उसी यंगती गै गुंदा कू इ टोनभद निस|

अति बकतर यीशु सै प्रार्थना स्युंगम पूरो कस्युंग हंग आफिग चेलों मंग गै न्योरो थोकसिग दिम शुरू स्युंगस| उ नाव ग चैन्तु दिम दंची ती ग यरतो यन्सी निस|

हंग चेलों मंग सै उजा तिन्स| उसी मत्त कजेरन्नस खस्युंग कि उसिस चिचिग निस कि उ खमी सीना ल्है| यीशु जा पत्तो निस कि उसी जेरक निस, हिना दंची उस उसीजा हार स्युंग ल्यैस, “मुजेरम, हिदि जी ल्हैय|

हंग पतरस सै यीशु जा ल्यैस, “ऐ प्रभु, हिदुंग गै ल्हैम च्यंग ता जीजा ती ग यरतो यन्सी ग नग खास्या कू राम दंची फिन्स्यद दा|” यीशु सै पतरस जा ल्यैस, “रा!”

हिना दंची पतरस नाव खचि छंगपंग पिरास हंग यीशु गै न्योरो दिम दंची ती ग यरतो यन्सीम शुरू स्युंगस| हंग दूमा वथे दिग, उस आफिग मैं स यीशु जा मुतिंग दिस हंग लहरों जा ओंगम हंग मत्त तेज नलन जा छक्का स्युंगम शुरू कस्युंग|

हंग पतरस कजेरस हंग ती कू च्यागसिग निस| उ कलाट स्युंगस, “ऐ प्रभु, जीजा बचायो!” यीशु सै अति बकतर ला चुमग उजा आंगस| हंग उस पतरस जा ल्यैस, “ नग विश्वास बुदस चीथ अनि! गजा सांगद ताम दंची गस जीजा भरोसा खोंग मुस्युंगन्स?”

हंग यीशु ची पतरस नाव कू कस्योंगसि, हंग अति बकतर नलन तोम बंद कल्च| ती शांत कल्च| चेलों मंग सै हा ल्हैग यीशु गै लरी पै चुग उसिस उग भक्ति स्युंगस हंग ल्यैस, “साचो ल्हिनी गै परमेश्वर ग सिरी ल्है|”