32. यीशु यद ल्हेमे स कांगत मि जा हंग तिग मिंगसिरी जा बुद स्युंगता

यीशु हंग उग चेले आफिग नाव कू अति सोंग कू दिन्नस जइ बं कू गिरासेनी मंग निनेस| उसी अति सोंग कू नभग नाव कू खचि कउतरनेस|

अतकू तिग मि निस जइ मि जा यद ल्हैमे स चुमस|

हिदि मि हिलंग तरत निस कि खमी री उजा बसकु स्युंग मुतरस| उलंग चू मि मंग सै उग ला ची लिकी जा सांगली स री घिस, हंग उ उजा कुछयाकत निस|

उ मि अति सोंग कू कब्रिस्तान कू स्योंगसि निनेस| हिदि मि पूरो निछ हंग पूरो मुंछ कल्लाट स्युंग निस| उ खसै पसै मुचूकसिद निस हंग ज्या ज्या री आफी जा ऊँग स गैनै ल्है वास स्युंगस|

उ मि झयंगई यीशु गै न्योरो रास हंग उग निद कू पै चुग हंग यीशु सै अति मि गै भीतरु गै यद ल्हैमे स कथा स्युंग हंग ल्यैस, “हिदि मि कू खचि छंगपंग रा!”

अति यद ल्हैमे पूद कल्लाट स्युंग, “है यीशु, लच्यंग पूद परमेश्वर सिरी, नग जीजा खै लन? कृपा स्युंग जीजा मुसताम!” हंग यीशु सै अति यद ल्हैमे जा रूस, “नग मिन खै ल्है?” उस जबाब दास, “जिग मिन सेना ल्है, खस्युंग कि इन मत्त अनि|” (रोमी सेना कू उलंग हजार सिपाही मंग ग तिग यंबा तिग “सेना” लित्त निस| )

उस यद ल्हैमे मंग सै यीशु जा होस्यी स्युंगस, “कृपा स्युंग इंजा हिदि सोंग कू खचि छंगपंग मुथिरम!” अतकू खास्या गै बियर कू सुभरों ग तिग यंबा जाग निन्नस| हिना दंची उसी यद ल्हैमे मंग सै यीशु जा होस्यी स्युंगस, “कृपा स्युंग इंजा उसी सुभरों कू लायतीय, यीशु सै ल्यैस, “ ठीक अनि, उसी कू दि!”

हिना दंची उसी यद ल्हैमे अति मि कू खचि छंगपंग राग उसी सुभरों गै भीतरु पिदिस| उसी सुभर झयंगइ बंफल कू खचि यंगती कू फटकू कद्दा हंग ती कू च्याकसिग पझयंग अति यंबा कू लगभग निस्यी हजार सुभर निन्नस|

अतकू उसी सुभरों ग खबर स्युंद वाला मि निन्नस| जइ खरी लिच्च हंग उसी सै तिन्स ता उसी सोंग कू फोंग्न्नस| यीशु सै जइ स्युंगस अतकू उसिस जम्मा जा बतास| अति सोंग कू ची मि मंग पिरन्नस, हंग अति मि जा तिन्स जइ मि ग भीतरु यद ल्हैमे मंग निन्नस| उ शांति स, खसै पसै चुकसिग हंग तिग बुद मि नारुक्त व्यव्हार स्युंग कस्योंगसिद निस|

उसी मंग मत्त जेरक निन्नस हंग उसिस यीशु जा दिम दंची ल्यैस| हिना दंची यीशु नाव कू स्योंगसिस| उ मि जइ जा यद ल्हैमे निस उस यीशु गै जरू दिम ग होस्यी स्युंगस|

हंग यीशु सै उजा ल्यैस, “माद| जी चींथ निस कि गै चिमजा दिग जम्मा जा बताम कि परमेश्वर सै नग दंची खै स्युंगस| उसीजा बताम कि हना परमेश्वर सै गजा स्योकंग स्युंग निस|”

हिना दंची उ मि पिदिस हंग जम्मा जा हिदि बारे कू बतास जइ यीशु सै उग दंची स्युंग निस| उग कथा यन्म वाला हर तिग मि हा कल्त निस|

यीशु यंगती ग दुसरो बं कू खचि थोकसिग पिरास| उग अतकू नभम गै निमफन, तिग पूद भीड़ उग खास्या कुतू तीक्क कल्च हंग उजा तांगन्नस| अति भीड़ कू तिग मिंगसिरी निस जइ चैथै यन स सी बोम ग समस्या स दु:खु निस| उस आफिग जम्मा रुपया डाक्टरमंग जा कदास| खस्युंग कि उसी उजा बुद स्युंगयंग, हंग उग रोग हजूरी कबिगड़स|

उस यन्ग निस कि यीशु सै उलंग कांगत मि मंग जा बुद स्युंग निस हंग उस चिचिस, “जीजा झिरको मुनि जी यीशु गै खसै पसै जा ला तम्म च्यंग ता जी री बुद ल्हैयंग!” हिना दंची उ यीशु गै निमफन खचि रास हंग उग पसै जा ला तम्मस| जसोइ उस उजा ला तम्मस, सी बोम बंद कल्च|

अति बकतरइ, यीशु जा पत्तो कल्च कि उजा खचि सामर्थ कवन्स| हिना दंची उस निमफन ओंग रूस, “जीजा खमी सै ला तम्मस?” चेलों मंग सै जबाब दास, “हिदुंग जम्मा मि मंग सै नग पी बं कू खचि भीड़ कल्त अनि, हंग गजा दरग तान्न| हंग गस खोंग रून्नस कि जीजा खमिस ला तम्म्स?”

उ मिंगसिरी यीशु गै नोकु ढंक हंग मत्त जेरक आफिग पै चुग स्योंगसिस| हंग उस उजा बतास कि उस खै स्युंगनस, हंग हिना री कि उ बुद कल्च| यीशु सै उजा ल्यैस, “नग विश्वास सै गजा बुद कस्युंगस शांति स दि|”