33. तिग किसान गै कथा

तीज्या, यीशु यंगती गै खास्या गै न्योरो निस| उ मि मंग ग तिग मत्त पूद भीड़ जा शिक्षा दाग तास| उजा यन्म दंची हिलंग मत्त मि मंग रनेस यीशु गै न्योरो उसी जम्मा जा री कथा स्युंगम दंची बं मुनिस| हिना दंची उ ती ग यरतो नाव कू कचढ़स| अतकू उ कस्योंगसिस हंग मि मंग जा शिक्षा दास|

यीशु सै उसीजा हिदि कथा सुनास, “तिग किसान पिजे यिबम दंची छंगपंग वन्स| हंग उ आफि ला स पिजे जा चांग तास, ता दूमा पिजे अम कुतू टुभुरस| हंग निप्या स राग अति जम्मा पिजे कज्जाती|”

“दुसरो पिजे ऊँग कुतू टुभुरस जइ बं कू दूमा सा निस| ऊँग कुतू टुभुरत वाला पिजे छाटो कजूस हंग उग जड़ी युकत दिम गै बं मुनिस| हंग नी कतुस हंग छैत्त कल्च ता उ बोटू कछरस हंग उ पझयंग|”

“हंग दुसरो पिजे झाड़ा गै गूंदा कू टुभुरस| अति पिजे सै पूद ल्हैम शुरू स्युंगस, हंग नची सै उसीजा कतांगतिस| हिना दंची नची गै बं कू टुभुरत पिजे कजूस बोटू कू खचि खरी गेयरा मुजूस|”

“दुसरो पिजे बुद बं कू भुरस| अति पिजे पूद कल्च हंग उलंग पिजे कयिब्स| अति पिजे कू खचि 30,60, हंग हिदूंग वास सय गुणा मत्त गेयरा कल्च| जइ खमी री परमेश्वर गै निमफन दिम चिम्म च्यंग| उ अति कथा कू ध्यान दाम जइ जी ल्है तातू!”

हिना कथा सै चेलों मंग जा चिचिम कूइ निनस| हिना दंची यीशु सै बतास, “अति पिजे परमेश्वर ग बचन ल्है| अति अम तिग हिना मि अनि जइ परमेश्वर गै बचन यन्स , हंग उजा समझम मुचिन| हंग सीना उग न्योरो ची कथा खुग पिकोरस| हिदि कि सीना उजा बचन समझम गै दंची वथे ताम|”

“अति ऊँग वाला बं हिना मि अनि जइ परमेश्वर गै बचन यन्ग अनि हंग खुशी गै जरू उजा हा ल्यैस| हंग जब मुश्किल ज्या रागन, किता जब गार मि मंग उजा सतान्न, ता उ परमेश्वर स वथे पिदिस| हिदि कि उ परमेश्वर जा भरोसा स्युंगम बंद कस्युंगस|”

अति नची वाला बं हिना मि अनि जइ परमेश्वर गै बचन जा यन्ग अनि| हंग उ मत्त कथा गै बारे कू झिरको स्युंगम शुरू कस्युंगस, हंग उ मत्तइ रुपया कमाम दंची कोशिश स्युंगता, हंग उ मत्त स बथो जा तीम्म ग कोशिश स्युंगता| दूमा ज्या ची निमफन, थन उ परमेश्वर जा प्रेम स्युंगम दंची योग्य मुनिस| हिना दंची जइ उस परमेश्वर गै कथा कू कलबस निस| उ उजा परमेश्वर जा खुशी स्युंगम दंची योग्य मुस्युंगस| उ रजे गै स्यिन नारुक्त अनि| जइ खरी गेयरा झू मुतर|

“हंग बुद बं उ मि अनि जइ परमेश्वर गै कथा यन्ग अनि, उजा विश्वास स्युंगता| हंग फल कद्दास|”