34. यीशु दुसरो कथाओ ग शिक्षा दागतात

यीशु सै परमेश्वर गै राजू गै बारे कू गार मत्तइ कथा सुनास| रुक्त दंची, उस ल्यैस, “परमेश्वर ग राजू तिग राई गै पिजे नारुक्त अनि, जइ जा खमी सै आफिग री कू कयिबतीस| गनी जा पत्तो अनि कि राई ग पिजे जम्मा पिजे कू खचि लचयंग मिद ल्हीनि|”

“हंग जब राई ग पिजे पूद ल्हैम च्यंग ता उ सवार गै जम्मा बोटू कू खचि लचयंग पूद कल्च, हिलंग पूद कि निप्या राग उग स्यिन ग डाली कू आराम स्युंगन्नस|”

यीशु सै तिग यकरो कथा बतास, “परमेश्वर ग राजू सिरत नारुक्त अनि जइजा कोरग तिग मिंगसिरी लादू गै कलीन कू कछूतिस हंग उ जम्मा कलीन कू कफेलस|”

“स्वर्ग ग राजू अति खजाने गै नारुक्त अनि जइजा खमी सै री कू पकच्यातिस| खमी दुसरो मि जा खजाना कमिलेस हंग उस उजा तिम्म दंची मत्त चींथ निस| हिना दंची उस उजा हजू पकच्यातिस| उ खुशी स हिलंग तीक्क कल्त निस कि उस दिग आफिग जम्मा बथो करांगतिस खस्युंग कि उ अति री जा तूम दंची जइ बं अति खजाना निस|”

“स्वर्ग ग राजू तिग मत्त अकरो रहाद मोती नारुक्त री अनि| हंग खमी मोतियों ग व्यापारी उजा कतिनस ता उ उजा तूम दंची आफिग जम्मा बथो रांगतियंग|

अतकू दूमा मि मंग निन्नस जइ चिचिग निन्नस कि परमेश्वर उसीजा हिना दंची हाँ ल्हैयंग खस्युंग कि उसी बुद लन स्युंगतान्न, हिदि मंग हिना मि मंग जा यद मानगतान्न जइ उसी बुद लन जा मुस्युंगतान्न| हिना दंची यीशु सै उसीजा हिदि कथा बतास: “निस्यी यूरासिरी निन्नस निमी री प्रार्थना स्युंगम दंची मंदिर कू दिस| उसी मंग जा तिग ठल कोरद मि निस, हंग दुसरा तिग यहूदी धार्मिक प्रधान निस|”

“अति धार्मिक प्रधान सै हिना दंची स प्रार्थना स्युंगस, ‘हे परमेश्वर, नग धन्यवाद ल्है कि जी गार मि मंग नारुक्त - जसो कि खूद, यद मि, यद लन स्युंगद वाला, किता हिदा वास कि हिदि मि नोकू अनि अति ठल कोरद मि नारुक्त तिग पापी मुनीय|’”

“रुक्त दंची, जी हर हफ्ता कू निच्चू उपवास तातू, हंग जी जीजा मिलत वाला रुपया हंग बथो ग ची छू गजा|”

“हंग उ ठल कोरद मि अति धार्मिक प्रधान स मत्त वथे तांगयब्स| उस थू स्वर्ग ग चैन्तु मि री मुओंगस| हिना चैन्तु, उस आफिग ला तम्म ग आफिग सीमे कू धुंग हंग प्रार्थना स्युंगस, ‘हे परमेश्वर, कृपा स्युंग जीजा स्योकांगयो खस्युंग कि जी तिग पापी ल्है|’”

हंग यीशु सै ल्यैस, “जी गजा साचो ल्हेग तातू, परमेश्वर सै अति ठल कोरद वाला मि ग प्रार्थना यन्स हंग उजा धर्मी मि घोषित स्युंगस हंग उस यहूदी धार्मिक प्रधान ग प्रार्थना जा बुदमूतेस| परमेश्वर हर तिग कठारस्यद मि गै पुस्या जा यू स्युंगयंग, हंग उ हर तिग मि जा इज्जत दायंग| जइ आफिजा स्योकंगत स्युंगयंग|”