40. यीशु जा क्रूस कू चढ़ातिन्नस

यीशु गै ठट्टा स्युंगम गै निमफन, सिपाही उजा क्रूस कू चढ़ाम दंची पिकोरन्नस| उसि मंग सै उजा क्रूस जा उजाई आंगफिन्नस अति कू उ सिचियंग|

उसी सिपाही मंग यीशु जा अति बं कू रयग रास जइ “खोपड़ी” ल्हैतातने हंग उग ला लिकी जा किलो स क्रूस कू टाकतिन्नस| हंग यीशु सै ल्यैस, “हे बूबा, हिदि मंग जा माफ स्युंगयो, खस्युंग कि हिदि खरी मु पेतने हिदि खै स्युंगतातने|” उसिस तिग तख्ता जा री उग पूस्या गै यरतो टांगतिन्नस| अथुंग करिसिद निस, “यहूदियों मंग गै राजा” पिलातुस सै उसीजा हिनाई रीम दंची कल्यैसिद निस|

हंग सिपाही मंग सै यीशु गै खसै पसै दंची चिट्टी मोकतिन्नस| हंग उसिस हिना स्युंगन्नस ता उसिस अति भविष्य गै कथा पूरा स्युंगन्नस जइ ल्हैता, “उसिस जिग खसै पसै कोनमचिम छून्नस, हंग जिग खसै पसै गै दंची चिट्टी मोकतिन्नस|”

अतकू निस्यी खूद मंग री निन्नस, जइ जा सिपाही मंग सै अति ज्या क्रूस कू चढ़ान्नस| उसिस उसीजा यीशु ग निस्यी बं कू तान्नस| उसी मंग कू खचि तिग खूद सै यीशु ग ठट्टा उड़ास, हंग दुसरो मि सै ल्यैस, “खै गै मुजेरकन कि परमेश्वर गजा सजा दायंग ? इन मत्त स यद लन स्युंगम गै दोषी ल्है, हंग हिदि मि निर्दोष अनि|” हजू उस यीशु जा ल्यैस, गै आफिग राजू कू राम च्यंग ता कृपया जीजा हेका स्युंगताम| “यीशु सै जबाब दास, “थिया गै जिग जरू स्वर्गलोक कू निसियंगन|”

यहूदी प्रधान मंग हंग भीड़ गै गार मि मंग सै यीशु ग ठट्टा उड़ान्नस| उसिस उजा ल्यैस, “ हंग परमेश्वर ग सिरी ल्हैम च्यंग क्रूस स छंकू रा हंग अफी जा बचायो! हंग इंग गजा विश्वास स्युंगयंग|”

हंग अति जम्मा राजू ग तिम्भू पूरोई वम्द कल्च, बुद स अति ज्या गै गूंदा ग बकतर निस| हिदि निंछ बकतर वम्द लिच्च हंग सुम घंटा वास हिनाई निस

हंग यीशु सै हार स्युंग ल्यैस, “पूरो लिच्च! हे बूबा, जी आफिग ल्हेमे नग ला कू दातू|” हंग उस आफिग पूस्या फुंगसा स्युंगस हंग आफिग प्राण होतिस| हंग उ सिचिस ता तिग रुम्म रास| उ पूद पर्दा जइ परमेश्वर ग निद कू खचि मि मंग जा यकरो स्युंगतास थू खचि यूकू वास बीग निस्यी टुकड़ा कल्च|

आफिग सिचिम गै चैन्तु, यीशु सै मि मंग गै दंची परमेश्वर गै न्योरो राम ग अम कखोलतिस| हंग यीशु जा ओंगद वाला मि तिग सिपाही सै जइ खरी ल्हैम च्यंग हिदि जम्मा तिन्स ता उस ल्यैस, “साचो, हिदि मि निर्दोष निस| हिदि परमेश्वर ग सिरी ल्है|”

हंग यूसुफ ची नीकुदेमुस मिन गै निस्यी यहूदी प्रधान रास| उसी विश्वास स्युंद निस यीशुई मसीह निस| उसिस पिलातुस स यीशु गै गोमरंग जा थोचिस| उसिस उग गोमरंग लाडम कू तुमस| हंग उसी उजा तिग बियर चेग लाग कब्र कू कोरदिस हंग उग चीकू कत्तातिईग स| हंग उसिस अति कब्र गै मरोंग बंद स्युंगम दंची तिग पूद ऊँग जा चिरकन्तिस |