۴۴- شفای پیا گَدا بِه دَسِ پتروس و یوحنا

یه روز پترس و یوحنا اَلا عبادتگاه بِ‌رفتن. جفتِ دروازه پیا لَسمی‌یَه دیدن کِه گَدویی بْ‌کورد.

پترس بِه او پیا لَسم سیلِی کُورد و گف: «مو هیچ پیلی نَ‌دارم کِه به تو داهام. اَما هر چِی دارم، بِه تو بِ‌داهام. بِه نُومِ عیسی وری رَه رو.»

خدا هَمو دَم او پیانَه شفا دا و او بَنا بِه ره رفتن وَند و دورِشون شُودی بِ‌کورد و خدانَه بِ‌پِرَستید. آدَمونی کِه مِی حُوشِ پرستشگاه بیدن وَم‌زَشون.

جماعت زیادی تُندی گِرد بیسِن تا او پیانَه که شَفا دید بید بینن. پترس بِه او جماعت گف: «اَ دیدنِ شفا ای پیا وَم‌زِی‌یَه مَبایِه. اُمون ای پیانَه پِی قدرت یا سی دلِ دیندوری خومون شفا نَ‌دایِمهَ، بلکِی ایان قدرت عیسی بیدَه کِه اووَ شفا داس، سی‌دل‌ایان کِه وَش ایمان دارِیم.

شُمون کسونیِ هیسِی کِه اَ فرموندار رومی مَخاسِی کِه عیسانَ کُشَه. شمون کَسی‌یَه کِه بِه کُلْ جونِه دا کُشتِی، اما خدا اووَ اَ مِی مُوردون زندَه کُورد. اَر چِه شُمون نَدونِس‌سِی چِه بْ‌کُنِی، اما پیشگویی پیغمبرونَه عملی کُوردِی کِه گفتِن بیدْ مسیح وا غَشقِ ولا بُووَه و میرَه. خدا مخاس کِه ای‌طور بُووَه. پَه توبَه کُنِه و ری بِه خدا وِرگَردِه تا اووَم گناهاتونَه پاک کُنَه.»

موقِعی کِه گپونِ پرستشگاه قِصا پتروس و یوحنانَ فَـمیدِن خِیلی جِر اومِّن. پَه اوشونَه گِرفتن و زندون بِس‌سِن‌شون. اما خیلی اَ اوشون کِه پِیغومِ پتروسَ فَـمیدِن، ایمان اووُوردن و تعداد ایماندارون بِه پِنْ هَزار نَفَر رَسید.

سوباش، گپون یهود، پترس و یوحنانَ پِی پیا لَسم بِه خدمتِ کاهن گَپ و گپون مذهبی اووُوردن. اوشون اَ پترس و یوحنا پُرسیدِن: «پِی چه قدرتِی ای پیا لَسمَه شَفا دایِی یَه؟»

پتروس جُواب دا: «ای پیا کِه نُهاتون ویسْتَس بِه قدرتِ عیسی مسیح شَفا پِیدا کُوردَه. شُمون عیسانَ بِه صلیب کشیدِه، اما خدا اُووَ اَندو زندَه کُورد! شُمون اووَ رَد کُوردِه، اما رَه نجاتِ دِگِه نِی، بِ‌غِیرَ قدرت عیسی!»

گَپون دینی دلِ‌جرأتِ پتروس و یوحنانَ کِه دیدِن وَم‌زَشون، سی‌دل‌ایان کِه اوشون آدَمونی بِی‌سواد و عادی بیدن. اُسون یادشون اومَّه کِه ای پیاهون پِی عیسی بیدنَه. پَه بِه اوشون گفتِن: «اَر اَندو پِی مردم اَ عیسی قصه کُنِه شمونَه بدجُوری غَشقِ دِهِیم.» اوشون بعدِ ایان که پتروس و یوحنانَ ترسوندِنُ وِلشُون کُوردِن.