10. दस वटा बिपतिगेलाइ

मोसा कालाउ हारुन फारोकोता हानिहि। ओबालाइ दोअ्हि, “ इस्राएलको परमेस्वर एसा दोअ्खे, “ काङको द्याङगेलाइहेङ हानिलि पि।

फारो इस्राएलिगेलाइहेङ लाअ्पिलि इन्कार पातेङ दोङ हि, ओदोङ भाअ्सिङ परमेस्वर मिस्रो सारभिता थिलि गोइका तेलोङ बिपतिगेलाइ पिगिल्हि। परमेस्वर इङको बिपतिगेलाइसो फारोहेङ वा फारो कालाउ गोताङ मिस्रि दिरगेलाइ खान्तेङ सरबुङसाइका हि दो्अ्का तिङपाहि।

परमेस्वर निल झोराहेङ हितिता भाङघाइपापिहि, कालाउ फारो आझाइ बुङ इस्राएलिगेलाइहेङ हानिलि मापिहि।

परमेस्वर गोताङ मिस्रो सारभि भरि दोङ चोम्फेगेलाइ पिगिल्हि। फारो मोसाहेङ चोम्फेगेलाइ हाते पालि सेउपाहि। कालाउ गोताङ चोम्फेगेलाइ सिलि दोतेङ न्हुसो फारो ताइको ह्रदय आरोङ राङका पाहि कालाउ इस्राएललिगेलाइहेङ हानिलि मापिहि।

ओदोङ भाअ्सिङ परमेस्वर चाकागेलाइको माहामारि पिगिल्हि। कालाउ न्हुसो वा तुइराङको हुलदोङ हुल पिगिल्हि। फारो मोसा कालाउ हारुनहेङ काइतेङ जेसापा ओबालाइ इङको माहामारिहेङ गोराइकाको खन्डता इस्राएलिगेलाइहेङ हानिलि प्याङका दोअ्तेङ काथा पाहि। जेलाउ मोसा प्रार्थाना पाहि

कालाउ न्हुसो, परमेस्वर मिस्रिगेलाइको गोताङ गाइ-पियागेलाइता माहामारि चुमापिहि कालाउ इम्बालाइ गोताङ सिहि। कालाउ फारोको ह्रदय राङका जेङहि कालाउ वा इस्राएलिगेलाइहेङ हानिलि मापिहि।

कालाउ परमेस्वर मोसाहेङ फारोको आगाता भेर्माता बुसुरि थाइगिल्लि दोअ्हि। जेलाउ वा एन्सा पाहि, मिस्रिगेलाइको जिउता कस्ट पिका खाचुरिगेलाइ देखाल जेङहि, कालाउ इस्राएलिगेलाइहेङ चाहि हाइदोङ माजेङहि। परमेस्वर फारोको ह्रदय राङ पापिहि, कालाउ फारो इस्राएलिगेलाइहेङ हानिलि मापिहि।

एसा जेङलि दोतेङ परमेस्वर झोसे हुल्पा पिहि जाइ मिस्रो सारभिको हेन्जा जोसो आन्न बालि हान्तिपाहि कालाउ बाहार ओल्लेका हासुलाउ बुङ सेअ्न्हाहि। फारो मोसा कालाउ हारुनहेङ काइतेङ दोअ्हि, “का पाप पाका हिघा। नेलाइ इतासो हानिलि दोअ्स्वाना।” कालाउ मोसा प्रार्थाना पाहि कालाउ आकाससो झोसे हुल्लि ओटाहि।

कालाउ फारो आरोङ बुङ पाप पाहि कालाउ ताइको ह्रदय राङ पाहि। वा इस्राएलिगेलाइहेङ स्वतन्त्तर जेङलि मापिहि।

ओदोङ भाअ्सिङ परमेस्वर चाकागेलाइको हुलगेलाइहेङ मिस्रो सारभिता पिगिल्हि। इङको चाकागेलाइ झोसे पाहासो बान्चिका गोताङ बालि चापिहि।

कालाउ परमेस्वर कितिकिकाहेङ दिङगिल्हि जेदोङ सुम दिना थेकापा हितेङ हि। इङको इदोइ झोको कितिकितिका हिघाहि कि मिस्रिगेलाइ ताइको साअ् लाअ्तेङ बाहार ओल्लेलि मादोघाहि। कालाउ इस्राएलिगेलाइ हिका थामेता चाहि थाअ्साइका हिघाहि।

इदोइ क्वालोङ बिपत्तिगेलाइ जेङलाउ बुङ फारो आझाइ बुङ इस्राएलिगेलाइहेङ मिस्रो सारभिसो हानिलि मापिहि। फारो परमेस्वरको काथा माहिङपिकाको कारनहोइ एला वा एनोङ आन्तिम बिपत्ति चुमाका योजाना पाहि। इदोइ बिपतिहोइ चाहि फारोको मन परिबर्तन पाहि।