11. निस्तार बार्बा

परमेस्वर फारोहेङ जेसापा आझाइ बुङ वा इस्राएललिगेलाइहेङ मिस्रो सारभिसो हानिलि मापिकाको कारान द्याङ कालाउ गुपुसको जेठ्ठा वाजान चानगेलाइ सेअ्प्याङका दोअ्तेङ चेताउनु पिहि। जेलाउ फारो इदोइ हिङहि, आझाइ बुङ परमेस्वरहेङ खाङधुरि पालि कालाउ वाको आग्या किलि वा इन्कार पाहि।

परमेस्वर वाकोता खाङधुरि पाकालाइको भाअ्सिङ ताइको जेठ्ठा चानहेङ बान्चिपालि दोका एनोङ दामा तियार पापिहि। झाराङ जाहान एनोङ दाग माकोसिङको थुमाहेङ साल्तेङ सेअ्लि गोइका हिघाखे।‍

परमेस्वर इस्राएललिगेलाइहेङ इङको थुमाको हिति सा्अ्को मुलि फिनुता दागाइसु, कालाउ इङको को बिहा फुङतेङ साउरि माह्वाका तोले दोफा चाअ्लि दोअ्हि। कालाउ आरोङ इङको बिहा चाअ्लि दोतेङ न्हुसो इम्बालाइ मिस्रो सारभिहेङ लाअ्लि तियार जेङलि बुङ वा दोअ्हि।

इस्राएललिगेलाइ परमेस्वरको दोअ्का कोनिङ पाहि। आधा न्हिसिन्ता परमेस्वर मिस्रो पाहासो हानिहि कालाउ लाम्फा जोलोमका चान झाराङहेङ सेअ्हि।

गोताङ इस्राएललिगेलाइको साअ्को फिनुता हिति तेअ्का हिघाहि, ओदोङ भाअ्सिङ परमेस्वर इङको साअ्गेलाइहेङ लाअ्तेङ हानिहि। इङको लिता हिका झाराङ सुकापा हिघाहि। थुमाको हितिको कारान ओबालाइहेङ बान्चिपाका हिघाहि।

कालाउ मिस्रिगेलाइ परमेस्वर ह्रुता खाङधुरि मापाहि ना ते वाको आग्या दोङ किहि। ओदोङ भाअ्सिङ परमेस्वर इम्बालाइको साअ्हेङ माअ्लाहि। परमेस्वर इङको मिस्रिगेलाइको लाङति जोलोमका चानगेलाइ झाराङहेङ सेअ्हि।

गोताङ मिस्रिगेलाइको जेठ्ठा चानगेलाइ सिहि, कैदिको जेठ्ठा चानसो फारोको जेठ्ठा चान थेकापा, झाराङ सिहि। मिस्रो सारभिता हेन्जा द्याङगेलाइ बेदानाको कारान खारकाताङ कालाउ जिउधाइ ल्होपाङ ह्रिकाइघाहि।

ओदोङ न्हिसिन फारो मोसा कालाउ हारुनहेङ काइतेङ दोअ्हि, “इस्राएललिगेलाइ चुमासु, कालाउ एनाङदोङ मिस्रो सारभि लाअ्तेङ हानेसु।