13. इस्राएल दोफा परमेस्‌वरको कारार

इस्राएलिगेलाइ लाल समुन्द्रा पारातेङ न्हुसो परमेस्वर इम्बालाइहेङ चाका-मान्दा थामे पाअ्तेङ सिनाइ लाखता थोङपुहि। इदोइ इङकोङ लाख हिघाहि जेता मोसा तितेङ हिका झुन्जिता तिङका हिघाहि। द्याङगेलाइ ताइको खोपारागेलाइ लाखको लेता ताङगाइहि।

परमेस्वर मोसा कालाउ इस्राएलको द्याङगेलाइहेङ, “ जेसापा नेलाइ काङको आग्या किसुन्हा पानु कालाउ काङको कारार पालन पासुन्हा पानु नेलाइ काङको सम्पति, पुजारिगेलाइको एनोङ राइजि कालाउ एनोङ पबित्तरो जाति जेङस्नाना”

सुम दिना न्हुसो, द्याङगेलाइ ताइमिङ आत्मिक रुपता तियार जेङलाउ, परमेस्वर गरजन, चात्याङ, धुवाँ कालाउ घान्ताको गाला दोफाङ सिनाइ लाखको तुप्पाता खुअ्तेङ लोहि। इङको लाखाता ताङन्हालि मोसाहेङ खिनिङ आनुमति हिघाहि।

कालाउ परमेस्वर इम्बालाइहेङ इङको कारार पिहि कालाउ दोअ्हि, का " योहोबा हिघा, नेलाइको परमेस्वर, जाइ नेलाइहेङ मिस्रो सारभिसो बान्धाइतिसो लाअ्पाहि। नेलाइ आरु हिदोइ बुङ दिरगेलाइ मापुजिसु।”

“हिदोइ बुङ खाल्को मु्र्तिगेलाइ माबानाइसु माकुनु इम्बालाइहेङ मापुजिसु, हाइपालिपानु का, योहोबा, डाहा पाका परमेस्वर हिघा। काङको मिङ व्यर्थमा माह्रुसु। साबाथको दिना पबित्तरो ताअ्लि मानिल। इङको चाहि, नाङको गोताङ कामगेलाइ तु दिना थेकापा पासु, कालाउ न्हि दिना चाहि नेलाइको भाअ्सिङ माइसा चालि कालाउ कासेहेङ फोम पाका दिना हि।”

“ताइको आमाइ-आबाको आदार पालि, मारा मापालि, कासिबिरि मापालि, माधाताइलि, ताइको देराको बे, कालाउ वाको साअ्को माकुनु वाको हाइदोइ काथाको लोभ मापालि।”

कालाउ परमेस्वर इदोइ तेलोङ आग्यागेलाइ न्हेनोङ उन्ठुइको पातिता लेखेहि कालाउ इङको मोसाहेङ पिहि। परमेस्वर आरु बुङ थुपप्रङ व्यवस्था कालाउ कानुनगेलाइ केम्लि पिहि। जेसापा इम्बालाइ इदोइ व्यवस्थागेलाइ केम्नु परमेस्वर इम्बालाइहेङ आसिस पिका कालाउ इम्बलाइहेङ रक्स्या पाका प्रितिग्या पाहि। जेसापा इम्बालाइ इदोइ आग्यागेलाइ भङग पाहे पानु इम्बालाइहेङ परमेस्वर दन्ड पिधाङ।

परमेस्वर इस्राएलिगेलाइहेङ ताइमिहेङ गोइका भाइपाङ खोपारा बानाइलि बिस्तिरित नामुना पिहि। इङकोहेङ भेत जेङका खोपारा बुङ दोअ्घाखे कालाउ इङको को न्हेनोङ कोठागेलाइ हिघाहि, जेदोङ एनोङ बारका पारदाहोइ लाअ्पाका हिघाहि। प्राधान पुजारि खिनिङ इङको पारदा न्हुपाहाको कोठाता हानिलि निङघाखे, हाइपालिपानु परमेस्वर इन्ता हिघाहि।

हासु बुङ परमेस्वरको आग्या भङग पाहेपानु वा एनोङ गुपुस भेतिका खोपाराको आगाता हिका बेदिता चुमातेङ परमेस्वरहेङ भोगको रुपता चढाइलि दोघाहि। एमि पुजारि इङको गुपुसहेङ सेअ्घाखे कालाउ बेदिता ताअ्तेङ ओपाघाखे। भोग चढाइका गुपुसको हितिहोइ उङको द्याङको पाप म्होपि धावा कालाउ परमेस्वरको नजरता उङको द्याङ सुद्द जेङधावा। परमेस्वर मोसाको ओने हारुन कालाउ वाको सान्तानहेङ ताइको पुजारि जेङलि नियुक्त पाहि।

झाराङ द्याङगेलाइ परमेस्वरको पिका आग्या खिनिङ एनोङ परमेस्वरहेङ पुजिलि कालाउ वाको बिसेस द्याङगेलाइ जेङलि राजि जेङहि। कालाउ इम्बालाइ बाचा पाकाको आले सोमोइ न्हुसो दोङ, इम्बालाइ थिलि गोइका पाप पाहि।

हेन्जा दिना थेकापा, मोसा परमेस्वर दोफा काथा पासुलिको भाअ्सिङ सिनाइ लाखको टुप्पाता हानिका हिघाहि। द्याङगेलाइ वाको घुरिकाको आसता ह्रुम्काताङ ह्रुम्काताङ माइहि। ओदोङ भाअ्सिङ इम्बालाइ हारुनकोता सोनागेलाइ चुमाहि कालाउ इम्बालाइको भाअ्सिङ एनोङ मुर्ति बानाइलि लगाइहि।

हारुन बाछाको आकारको सोनाको एनोङ मुर्ति बानाइहि। द्याङगेलाइ इङको मुर्तिहेङ पुजिहि कालाउ भोगगेलाइ चढाइलि तेङहि।

मोसा लेता खुअ्तेङ न्हुसो जेलाउ वा इङको मुर्तिहेङ तिङहि, वा ओसारापा चेरतामपाहि कि परमेस्वर वासेहेङ पिका तेलोङ आग्याको पाटिगेलाइ थाइगिल्तेङ भोइपिहि।

कालाउ मोसा इङको मुर्तिहेङ दानाइतेङ धुला बानाइहि, इङको धुलाहेङ आधे चिता ह्वाहि कालाउ द्याङगेलाइहेङ इङको चि आम्लि लागाइहि। परमेस्वर द्याङगेलाइता माहामारि चुमा पिहि कालाउ ओबालाइ मध्ये हेन्जा झाना सिहि।

मोसा आरोङ लाख हुता ताङलाहि कालाउ इङको द्याङगेलाइहेङ स्यामा पापिलिको भाअ्सिङ पार्थाना पाहि। परमेस्वर मोसाको बिन्ति हिङपिहि कालाउ ओबालाइहेङ स्यामा पिहि। ताइमि भोइका लाम्फाको तेलोङ आग्याको पाटिगेलाइ मोसा आरोङ उन्ठुइको एनोङ नावा पाटिता लेखितेङ पुर्न स्थापित पाहि। कालाउ परमेस्वर इस्राएलिगेलाइहेङ सिनै लाखसो प्रतिग्या पाका सारभि भारि गोराइपुहि।