14. चाका-मान्डा थामेता आवाइगिल्तेङ

सिनै लाखता ताइको कारार पिलि दोतेङ न्हुसो परमेस्वर इस्राएलिगेलाइहेङ प्रतिग्याको सारभि भारि थोङगिल्हि, जाइहेङ कानानको सारभि बुङ दोअ्घाखे। बादेलको खाम्बाहोइ इम्बालाइहेङ आगा-आगा कानान भारि थोङकाताङ चुम्पुहि कालाउ इस्राएलिगेलाइ इङकोहेङ पिताइपुहि।

परमेस्वर आब्राहाम, इसाहाक कालाउ याकुब दोफा इङको सारभि इम्बालाइको सान्तानगेलाइहेङ प्याङका दोअ्का प्रतिग्या पाका हिघाहि, कालाउ इङको सोमोइता इन्ता थुप्रङ जातिको द्याङगेलाइ हिघाहि। ओबालाइहेङ कानानिगेलाइ बुङ दोघाखे। कानानिगेलाइ परमेस्वरहेङ मापुजिघाखे ना ते वाको आग्या दोङ किघाखे। ओबालाइ धाताइका दिरगेलाइहेङ पुजिघाखे कालाउ हेन्जाङ आधार्मि कामगेलाइ पाघाखे।

परमेस्वर इस्राएलिगेलाइहेङ दोअ्हि, “नेलाइ इन्ता हिका गोताङ कानानिगेलाइहेङ प्रतिग्याको सारभिसो लाअ्पालि कालाउ इम्बालाइ दोफा हिदोइ बुङ खाल्को सम्झाउता माकुनु बिहु मापासु। इम्बालाइको मुर्तिगेलाइहेङ पुर्न रुपता नासा पापिहि। जेसापा नेलाइ काङको आग्या माकेम्सुन्हा पानु,नेलाइ काङको बद्लिता इम्बालाइको मुर्तिगेलाइ पुजिस्वाना।”

जेलाउ इस्राएलिगेलाइ कानानको सिमानाता थुकालि लोहि, मोसा इस्राएलिको गोताङ कुलसो एमि-एमि पाअ्तेङ तेन्हे झाना द्याङगेलाइ साल्हि। वा उङको द्याङगेलाइहेङ इङको सारभिको बानाल बुझिलि जासुसको रुपता दिङगिल्हि। कानानिगेलाइ बलियाका हि याते कमजोर हि दोअ्का बिसोइता रेसिलिको भाअ्सिङ बुङ इम्बालाइहेङ दिङगिल्का हिघाहि।

इङको तेन्हे झाना द्याङगेलाइ न्हे कुरि दिना थेकापा कानानता घुराइगोल्तेङ हि कालाउ इङको न्हुसो इम्बालाइ घुरितेङ लोहि। इम्बालाइ द्याङगेलाइहेङ दोअ्हि, “इन्ताको मिलिङते हेन्जा नोमका कालाउ नुगामारि बालि जेङका खाल्को हि।

कालाउ एन्सालाउ दोङ भेनङ न्हेमि जासुसगेलाइ, कालेब कालाउ यहोसु चाहि एसा दोअ्हि, “ या सहि हि कि कानानको द्याङगेलाइ झाउका कालाउ बलियाका हि, कालाउबुङ निसित दोङ केलाइ इम्बालाइहेङ हारिपालि द्वाङ।

कालाउ द्याङगेलाइ कालेब कालाउ यहोसुको काथा माहिङपिहि। ओबालाइ मोसा कालाउ हारुन दोफा चेरताम्पातेङ दोअ्हि, “ नेलाइ हाइपालि केलाइहेङ इसिका भयानाक थानेता चुनान्हा? धुमता सेअ्न्हालि कालाउ ताइको बे कालाउ जामालाइहेङ बान्धाइति बानाइलि खान्तेङ ते भरु केलाइ मिस्रो सारभिताङ हिलाउ जेङधाङ।” आरोङ मिस्रो सारभिता घुरिपातेङ चुम्पुलिको भाअ्सिङ इस्राएलिगेलाइ एमि नावाँ आगुवाको माग पाहि।

या तिङतेङ परमेस्वर हेन्जा चेरताम्पाहि कालाउ भेतिका खोपाराता लोहि। परमेस्वर दोअ्हि, “काङको बिरोधता हुल्दुङगा मच्चि पाका कारान नेलाइ झाराङ इदोइ चाका-मान्दा थामेता आवाइतुगिल्तेङ हिगिल्स्वाना। कालेब कालाउ यहोसु बाहेङ २० बासार खान्तेङ ह्रुताको झाराङ इता सियाङ कालाउ प्रतिग्याको मुलुकता दुल्लि मानिङस्वाना।”

जेलाउ द्याङगेलाइ या काथा हिङहि, ताइमि पाप पाकाता इम्बालाइ ओसारापाङ दुखि जेङहि। इम्बालाइ ताइको दाब्या दुफेगेलाइ चुम्हि कालाउ कानानको द्याङगेलाइहेङ झामिरिलि हानिहि। मोसा इम्बालाइहेङ इन्ता मान्हेलि चेताउनि पिहि हाइपालिपानु परमेस्वर इम्बालाइ दोफा हिघाहि, कालाउबुङ इम्बालाइ वाको काथा माहिङपिहि।

इङको धुमता परमेस्वर इस्राएलिगेलाइ दोफा मान्हेहि, ओदोङ भाअ्सिङ इम्बालाइ हारिहि कालाउ हेन्जा द्याङगेलाइ सेअ्न्हालि गोइहि। कालाउ न्हुसो इस्राएलिगेलाइ कानानसो घुरिहि कालाउ द्याकुरि बासार थेकापा चाका-मान्दा थामेता आवाइतुगिल्तेङ हि।

न्हेकुरि बासार थेकापा चाका-मान्दा थामेता आवाइतुगिल्लाउ परमेस्वर दोङ इस्राएलिगेलाइहेङ जुराइपापिहि। वा इम्बालाइहेङ स्वर्गसो तोले पिहि, इङको तोलेहेङ “मन्‍न” दोअ्घाहि। वा इम्बालाइ हिका खोपाराता चाअ्लिको भाअ्सिङ बिहा बुङ ह्याको दोअ्तेङ बोट्टाइको हुलबुङ पिगिल्हि। इङको गोताङ सोमोइ भरि परमेस्वर इम्बालाइको लोखन धाबा थेअ्लिसो जोगाइपापिहि।

परमेस्वर इम्बालाइहेङ बारका उन्ठुइसो चि ओल्लेपापिहि। इदोइ झोको हिलाउ बुङ, इस्राएलिगेलाइ परमेस्वर कालाउ मोसाको बिरोधता आरोप लागाइहि कालाउ गनगन पालाउ बुङ, आब्राहाम,इसाहाक कालाउ याकुब दोफा जिङका प्रतिग्याता परमेस्वर खाङधुरि योग्यो हिघाहि।

एखे, जेलाउ द्याङगेलाइ दोफा आम्लिको भाअ्सिङ चि मान्थुघाहि, परमेसवर मोसाहेङ दोअ्हि, “ उन्ठुइहेङ दोअ् कालाउ इन्तासो चि ल्वाङ।” कालाउ मोसा झाराङ द्याङगेलाइको आगाता नुइ धुइलिको सात्ता उन्ठुइता न्हेखे लाठ्ठिहोइ दानाइतेङ परमेस्वरको आनादार पाहि। उन्ठुइसो चिते लोहि कालाउ परमेस्वर मोसा दोफा चेर ताम्पाहि कालाउ दोअ्हि, “ नाअ् प्रतिग्याको मुलुकता दुल्लि मानिनाना।”

चाका-मान्दा थामेता आवाइतुगिल्तेङ हिकाको न्हे कुरि बासार न्हुसो, परमेस्वरको बिरोधता हुलदुङगा मच्चिपाका झाराङ इस्राएलिगेलाइ सिलि दोका हिघाहि। कालाउ न्हुसो परमेस्वर द्याङगेलाइहेङ प्रतिग्या पाका मुलुकको भेरपा चुम्पुहि। मोसा एला वाराङ जेङलि दोका हिघाहि, ओदोङ भाअ्सिङ परमेस्वर यहोसुहेङ उङको द्याङगेलाइको नेत्तुत्व पालि साल्हि। परमेस्वर मोसाहेङ याबुङ प्रतिग्या पाहि कि एनि वा मोसा कोनिङ भेनेङ एमि आगमबक्ता दिङगिल्लाङ।

कालाउ परमेस्वर मोसाहेङ राको टुप्पाता हानिलि दोअ्हि, कालाउ कि वा प्रतिग्या पाका मुलुक खाङलि द्वावाको। मोसा प्रतिग्या पाका मुलुक तिङलि निङहि कालाउ परमेस्वर मोसाहेङ दुल्लि चाहि मापिहि। कालाउ न्हुसो मोसा सिहि, कालाउ ए कुरिते दिना थेकापा इस्राएलिगेलाइ वाको भाअ्सिङ सोक मानाइहि। यहोसु इम्बालाइको नावाँ आगुवा जेङहि। यहोसु एमि आसल आगुवा हिघाहि हाइपालिपानु वा परमेस्वरता भर पाघाखे।