3. चिप्रलय

हेन्जा सोमोइ न्हुसो, सुमिङता हेन्जा द्याङगेलाइ बिरिउबिरिउ जेङहि। इम्बालाइ हेन्जाङ कालाउ हिङसात्मक जेङकाताङ हानिका हिघाहि। या एला इदोइ झोको हेन्जा खाराब जेङहि कि परमेस्वर गोता ङ सुमिङहेङ एनोङ बिसाल चिप्रलयहोइ नासा पाहि।

कालाउ नुह परमेस्वर पाहासो आसिस निङहि। दुस्ट दा्याङगेलाइको माझाता वा एनोङ धर्मि द्याङ हिघाहि। परमेस्वर नुहहेङ ताइमिङ पिगिल्लि तोम्का चिप्रलयको बारेता बाताइहि। वा नुहहेङ एनोङ बारका जाहाज बानाइलि लागाइहि।

परमेस्वर नुहहेङ माकुलाबुग 140 मिटर ह्रिङका, 23 मिटर चौडाइ, कालाउ 13.5 झाउका जाहाज बानाइलि दोअ्हि।नुहा इङको जाहाजहेङ फ़ालाको प्रयोग पातेङ सुम तहता बानाइलि गोइका हिघाहि जेता हेन्जा कोठागेलाइ, चाल्हे कालाउ खिर्किगेलाइ हिलि गोइघाहि। इङको जाहाजता नुह वाको जाहान, कालाउ गोताङ खाल्को मिलिङता हिका गुपुसगेलाइ चिप्रलयको सोमोइता सुरक्छयाता हिलि गोइका हिघाहि।

नुह परमेस्वरको आग्या किहि। नुह कालाउ वाको सुमि चानगेलाइ परमेस्वरको दोअ्का कोनिङ जाहाज बानाइहि। जाहाज एकदम बारका हिनाङ इङकोहेङ हेन्जा बासार लागेका हिघाहि। नुह द्याङगेलाइहेङ चिप्रलयको चेताउनि पिहि कालाउ इम्बालाइहेङ परमेस्वर भारि घुरिलि सचेत पाहि, कालाउ इम्बालाइ वाको काथाता खाङधुरि मापाहि।

परमेस्वर नुहहेङ, वाको जाहान कालाउ गुपुसगेलाइहेङ गोइका जति चाका-आम्का आमेनेगेलाइ जोम्पालि लागाइहि। जेलाउ गोताङ आमेने तियार जेङहि, परमेस्वर नुहहेङ एला सोमोइ ‍‍‍‍‍‍लोकाहि दोअ्हि कालाउ वा, वाको बे, वाको सुमि चानगेलाइ कालाउ ओबालाइको आबागेलाइ झाराङहेङ जाहाजता हानिलि दोहि (इम्बालाइ झाराङ पातेङ येएमि हिघाहि)।

परमेस्वर धाङ्गाइ कालाउ तेल्हि पातेङ गोताङ खाल्को जिहा-जुइलेङको एनोङ-एनोङ जोडि नुहकोता पिगिल्हि, जेलाउ चिप्रलयको सोमोइता इङको गोताङ जाहाजता सुरुक्छा ह्याको। वा भोग पिलिको भाअ्सिङ गोइका जिहा-जुइलेङको गोताङ न्हि जोडि धाङ्गाइ कालाउ तेल्हि पातेङ पिगिल्हि। जेलाउ इम्बालाइ झाराङ जाहाज लिता दुल्हि, कालाउ परमेस्वर ताइमिङ जाहाजको फिनु गिपिहि।

कालाउ न्हुसो वाइ लोलि तेङहि। न्हे कुरि दिना कालाउ न्हे कुरि न्हिसिन थेकापा लागातार वाइ लोतेङ हि। प्रिथिवि लितासोङ बुङ चि जोडसो खुअ्तेङ लोहि। गोताङ सुमिङ कालाउ झाउका डाडागेलाइ सुधाङ चिता डुबिका हिघाहि।

सेङका भोनोइता बान्चिका गोताङ आमेने सिहि, खिनिङ जाहाज लिता हिका द्याङ कालाउ जिहा-जुइलेङगेलाइ बान्चितेङ हि। जाहाज चिता भोम्तेङ हि कालाउ लिता हिका झाराङहेङ डुबिलिसो जोगाइतेङ ताअ्हि।

चि थामिकाको ना माहिना थेकापा जाहाज भोम्तेङ हि, कालाउ इङको माझाता चि सिकाताङ हानिघाहि। कालाउ एनि एनोङ राको टुप्पाता जाहाज आडकिहि, कालाउ प्रिथिवि आझै थेकापाबुङ चिता डुबितेङ हिघाहि। सुम माइना न्हुसो, आरु राको झाउका भागगेलाइ बुङ तिङलि तेङहि।

आरोङ चालिस दिना न्हुसो नुह एनोङ कावाहेङ चि सि:का हि कि मान्थु दोअ्तेङ खाङलि बाहार ओल्लापाहि। कावा इसो-उसो पाकाताङ सेङका मिलिङ भोअ्लि उराइलि तेङहि, कालाउबुङ हिसोबुङ निङलि मादोहि।

न्हुसो नुह एनोङ कुर्जाहेङ दिगिल्हि। इङको बुङ हिदोइ बुङ सेङका मिलिङ निङलि मादोहि, ओदोङ भाअ्सिङ इङको नुहकोता घुरितेङ लोहि। इङकोको ए आथार न्हुसो वा आरोङ इङको कुर्जाहेङ बाहार ओल्ले पाहि, कालाउ इङको ताइको नुइता एनोङ जैतुनको डालेङ चेतेङ लोहि। चि सि:काताङ हानितेङ हिघाहि, कालाउ सारसिङगेलाइ आरोङ दोर्काताङ हानिका हिघाहि।

आरोङ भेनेङ ए आथार ह्रुम्तेङ नुह सुम पोल्ति इङको कुर्जाहेङ बाहार ओल्लेपाहि। इदोइ पोल्ति चाहि इङको कुर्जा माइसाचाका थामे निङहि कालाउ इङको घुरितेङ मालोहि।चि सि:काताङ हानिदोङ घाहि।

न्हे माहिना न्हुसो परमेस्वर नुहहेङ दोअ्हि, "नाअ् कालाउ नाङको जाहान गोताङ जिहा-जुइलेङगेलाइ जाहाजसो ओल्लेलि दोस्वाना। नेलाइ हेन्जा सान्तानगेलाइ जोलोम पासु कालाउ आरोङ गोताङ प्रिथिबिता पोङघातेङ हानिसु।“ कालाउ नुह कालाउ वाको जाहान जाहाजसो बाहार ल्होहि।

जाहाजसो बाहार लोअ्तेङ न्हुसो नुह परमेस्वरको भाअ्सिङ एनोङ बेदि बानाइहि कालाउ इङको बेदिता भोग पिलिको भाअ्सिङ ताअ्का आधे गुपुसगेलाइको भोग चढाइहि। परमेस्वर इङको भोग पाहासो लेङचाहि कालाउ नुह कालाउ वाको जाहानहेङ आसिस पिहि।

परमेस्वर प्रतिग्या पाहि, "एला आरोङका हेलाउ बुङ द्याङको दुस्टको खातिर इदोइ प्रिथिबिहेङ स्रापित माबानाइयाङका, माकुनु चिप्रलय पाहासो सुमिहेङ हान्ति मापाङका, कालाउ बुङ द्याङको ह्रदय भावनागेलाइ जामालसोङ दोङ खाराब हिखे।“

कालाउ परमेस्वर प्रतिग्याको चिन्हा स्वरुप लाङति इन्द्रेनि बानाइहि। जेथे बुङ पोल्ति जेलाउ आकासता इन्द्रेनि देखाल जेङखे, परमेस्वर ताइको द्याङगेलाइ दोफा पाका प्रतिग्या फोम पाखे।