4. आब्राहाम दोफा परमेस्वरको कारार

चिप्रलयको हेन्जा बासार न्हुसो सुमिङता द्याङगेलाइको सङख्या आरोङ थुप्रो जेङतेङ हानिहि, कालाउ इम्बालाइ झाराङ एनोङदोङ भासा धुइघाहि। कालाउ परमेस्वर आग्या पाका बमोजिम प्रिथिबिता पोङघालिको साटो ओबालाइ एदोफाङ जोम्तेङ एनोङ सहर धाम्लि तेङहि।

इम्बालाइ हेन्जा घमन्डि हिघाहि, कालाउ परमेस्वरको दोअ्का काथाहेङ इम्बालाइ माहाङहि। इम्बालाइ स्वर्ग थेकापा थुकालिको भाअ्सिङ झाउका धारहारा धाम्लि तेङहि। जेसापा ओबालाइ आझै ए दोफाङ दुस्ट कामगेलाइ पाकाताङ हानिहेपानु ओबालाइ आझै बुङ हेन्जा आधार्मि जेङलि दोका परमेस्वर तिङहि।

ओदोङ भाअ्सिङ परमेस्वर ओबालाइको भासाहेङ आरु थुप्रोङ भासागेलाइता बदल पिहि कालाउ द्याङगेलाहेङ गोताङ सुमिङ भारि आउलि पागिल पापिहि। ओबालाइ धाम्लि तेङका सहरको मिङ "बाबेल” हिघाहि, जाइको आर्था "आवाइ तुअ्लि” हिघाहि।

साइयोङ बासार न्हुसो, परमेस्वर आब्राहाम मिङ पाका एमि द्याङ दोफा नुइ धुइहि। परमेस्वर वासेहेङ दोअ्हि, "नाङको सारभि कालाउ घारानाहेङ लाअ् कालाउ का नासेहेङ तिम्पालि तोम्का थामेता हाने। का नासेहेङ आसिस प्याङका कालाउ नासेहेङ पिका थामेता एनोङ माहान रास्ट् बानाइयाङका। का नाङको मिङहेङ बारका बानायाङका। नासेहेङ आसिस पिकालाइहेङ का आसिस प्याङका कालाउ नासेहेङ स्राप पिकालाइहेङ का स्राप प्याङका। प्रिथिबिता हिका गोताङ घरानागेलाइ नाङको कारन आसिसत जेनावा।

कालाउ आब्राहाम परमेस्वरको आग्या किहि। वा ताइको बे सारा, ताइको गोताङ चाकारियागेलाइ कालाउ ताइको गोताङ आमेने चुम्पुतेङ परमेस्वर तिङपाका सारभि कानान भारि हानिहि।

जेलाउ आब्राहाम कानानता थुकाहि, परमेस्वर दोअ्हि, "ताइको द्यापाहाङ खाङ। नाअ् कालाउ नाङको सान्तानहेङ नाअ् तिङलि दोका जति गोताङ सारभिको पैत्तिक सम्पतिको रुपता नासेहेङ प्याङका।“ कालाउ आब्राहाम इङको सारभिता हिलि तेङहि।

एनि, आ्ब्राहाम सर्वोच्च सरबुङसाइका परमेस्वरको पुजारि, मल्किसेदेकहेङ दुसुहि। मल्किसेदेक आब्राहामहेङ आसिस पितेङ दोअ्हि, "आकास कालाउ प्रिथिबिको ग्रिहि, सरबुङसाइका परमेस्वर नासेहेङ आसिस प्याको।" कालाउ आब्राहाम मल्किसेदेकहेङ ताइको गोताङ सम्पतिको तेओङ भाग पिहि।

हेन्जा बासार बितिहि कालाउ आब्राहाम कालाउ साराइको हिदोइबुङ सान्तान मान्थुघाहि। परमेस्वर आब्राहामदोफा नुइ धुइहि कालाउ आरोङ प्रोतिग्या पाहि कि वाको एनोङ चान जेनाङ कालाउ वाको सान्तानगेलाइ आकासको फुरु सरह जेनावा। आब्राहाम परमेस्वरको प्रतिग्याता खाङधुरि पाहि। परमेस्वर आब्राहामहेङ धर्मि थाराइहि हाइपालिपानु आब्राहाम परमेस्वरको प्रतिग्याता खाङधुरि पाहि।

कालाउ परमेस्वर आब्राहाम दोफा एनोङ कारार जिङहि,। कारार चाहि न्हे पाहाङको माझाता सम्झाउता हि।परमेस्वर दोअ्हि,”नाङको ताइकोङ जिउसो का नासेहेङ एनोङ चान प्याङका। काकान सारभि का नाङको सान्तानहेङ प्याङका।“ कालाउ बुङ आब्राहाम दोफा आझाइ बुङ एमि बुङ चान मान्थुघाहि।