6. परमेस्वरले इसाहाकहेङ पिहि

आब्राहाम वाराङ हिलाउ, वाको चान, इसाहाक, एमि परिपक्व द्याङ जेङलि दोका हिघाहि। ओदोङ भाअ्सिङ आब्राहाम ताइको एमि चाकारियाहेङ ताइकोगेलाइ हिका सारभिता इसाहाकको भाअ्सिङ एमि बे भोपितेङ चुमालि लागाइहि।

आब्राहामको ताइकोगेलाइ हिका सारभि भारि रिङका पाक पाअ्तेङ, न्हुसो परमेस्वर इङको चाकारियाहेङ रेबिका मिङ हिका एमि बेजान कोता चुमाहि। वा आब्राहामको ओनेको चु हिघाहि।

रेबिका ताइको जाहानहेङ लाअ्तेङ इङको चाकारिया दोफा इसाहाकको साअ्ता हानिलि राजि जेङहि। वा थुकातेसाङ इसाहाक इङको बेजान दोफा बिहु पाहि।

हेन्जा सोमोइ न्हुसो, आब्राहाम सिहि, कालाउ परमेस्वर वाको दोफा जिङका गोताङ कारार एला इसाहाकता सरिहि। परमेस्वर आब्राहामको आसाङख्या सान्तान जेनाङ दोअ्तेङ प्रतिग्या पाका हिघाहि, कालाउ इसाहाकको बे रेबिकाको हिदोइ बुङ सान्तान जेङलि दोका मान्थुघाहि।

इसाहाक रेबिकाको भाअ्सिङ प्रार्थाना पाहि, कालाउ परमेस्वर वाको हामुता जाउथ्या जामालगेलाइ पिहि। इङको न्हेमि जामालगेलाइ रेबिकाको हामुलिता हिलाउ एमिसो भेनेङ दोफा फेसुलि तेङहि, ओदोङ भाअ्सिङ रेबिका परमेस्वर दोफा या हाइ जेङतेङ हि दोअ्तेङ हि:हि।

परमेस्वर रेबिकाहेङ दोअ्हि, “नाङको लिता हिका उङको न्हेमि चानगेलाइसो न्हेनोङ रास्टगेलाइ ल्वाङ। इम्बालाइ ता-ताइमिता फेसुवावा कालाउ जेठा चान कान्छा चानको सेवा पावा।“

जेलाउ रेबिकाको चानगेलाइको जोलोम जेङहि, जेठा चानको जिउ भरिदोङ इ:का मुइसा दोङ मुइसा जेङका हिघाहि कालाउ इम्बालाइ उङको को मिङ एसाप ताअ्पिहि। कालाउ कान्छाको चाहि ताइको खुरहोइ जेठाको गुदिनि चाकाताङ जोलोमहि कालाउ इम्बालाइ वाको मिङ याकुब ताअ्पिहि।