8. परमेस्वर योसेफ कालाउ वाको जाहानहेङ बान्चिपाहि

योसेफको दादागेलाइ वासेहेङ मन्दा माताघाखे हाइपालिपानु इम्बालाइ मध्ये वा ताइको आबाको झाराङ खान्तेङ मायारु हिघाहि कालाउ योसेफ ताइमि ओबालाइको सासक जेङका सोपोन तिङका हिघाहि। जेलाउ योसेफ वाको दादागेलाइकोता थुकालि लोहि, ओबालाइ वासेहेङ आपाहरन पाहि कालाउ आधे बान्धाइति ब्यापारिगेलाइको खुरता पि:गिल्हि।

हेन्जाङ बासार न्हुसो, जेलाउ याकुब वाराङ जेङलि दोका हिघाहि, वा ताइको झाराङ खान्तेङ मायारु चान, योसेफहेङ बागालगेलाइहेङ सामाराइतेङ ताअ्का ताइको दादागेलाइ कोता जाच पालि दिङगिल्हि।

दादागेलाइ साअ् घुरिलि खाङतेङ लाम्फा योसेफको लोखोनगेलाइ थेअ्पिहि कालाउ इङकोहेङ मेसाको हितिता चोबिपिहि। कालाउ ओबालाइ इङको चेन्थ्रा ताइको आबाहेङ तिङपाहि कालाउकि योसेफहेङ हिदोइ बुङ झारभारिको गुपुससगेलाइ सेअ्हि दोअ्तेङ सोचियाको,इङको तिङतेङ याकुब हेन्जा दुखि जेङहि।

उङको बान्धाइति व्यापारिगेलाइ योसेफहेङ मिस्रो सारभिता चुम्पुहि। मिस्रो सारभि निल झोडाको भेरपा परिघाहि, इङको ओसाराका बिसाल कालाउ सरबुङसाइका रास्ट हिघाहि। इङको ब्यापारिगेलाइ योसेफहेङ एमि धनि सारकारि कर्मचारिको खुरता पि:गिल्हि। योसेफ ताइको ग्रिहिहेङ रेम्फा समाराइहि कालाउ परमेस्वर वासेहेङ आसिस पिहि।

योसेफको ग्रिह्रिको बे योसेफदोफा जिम्लि भोघाखे कालाउ परमेस्वरको बिरोधता एसापा पाप पालि वा इन्कार पाहि। ओदोङ भाअ्सिङ वा चेर ताम्पाहि कालाउ योसेफको बिरोधता धाताइका आरोप लागाइहि, जाइको कारन योसेफहेङ रिम्हि कालाउ झ्यालखानाता ह्वाहि। झ्यालखानाता हिलाउ बुङ योसेफ परमेस्वरता भरोसा ताअ्हि कालाउ परमेस्वर योसेफहेङ आसिस पिहि।

न्हे बासार न्हुसो बुङ, दुसिलि मादोका हिलाउ बुङ योसेफ आझै झ्यालखानाता दोङ हिघाहि। एनि न्हिसिन मिस्रिगेलाइको राजा फारो न्हेनोङ सोपोन तिङहि कालाउ वा वासेहेङ मारेम्फाङ साताइहि। वाको हिदोइ बुङ साल्हाकारगेलाइ बुङ इङको सोपोनको रहस्य बाताइलि मादोहि।

परमेस्वर योसेफहेङ सोपोनको आर्था बाताइलि दोका बरदान पिका हिघाहि, ओदोङ भाअ्सिङ फारो योसेफहेङ झ्यालखानासो काइलि लागाइहि। कालाउ योसेफ फारिको सोपोनको आर्था बाताइ पिहि कालाउ दोअ्हि, “परमेस्वर एलाको न्हि बासार थेकापा नुगामारि दोङ आन्नगेलाइ पियाङ कालाउ इङको को न्हुइसो न्हि बासार थेकापा आनिकाल जेनाङ।“

योसेफ दोफा फारो लेङचाहि कालाउकि वा योसेफहेङ गोताङ मिस्रो सारभिको न्हेतेङ सरबुङसाइका द्याङ नियुक्त पाहि।

योसेफ द्याङगेलाइहेङ नुगामारि आन्नको न्हि बासारको भाअ्सिङ हेन्जा आन्नगेलाइ जोम्पालि लागाइहि। कालाउ न्हि बासार आनिकालको सोमोइता योसेफ इङको आन्नगेलाइ पि:हि कालाउकि द्याङगेलाइको भाअ्सिङ गोइका झोको चाका-आम्का थेमाको।

आनिकाल मिस्रो सारभिता खिनिङ माको कानान सारभिता बुङ परिका हिघाहि जेता याकुब कालाउ वाको जाहान हिघाखे।

ओदोङ भाअ्सिङ याकुब ताइको जेठा चानगेलाइहेङ मिस्रो सारभिता चाका-आम्का आमेने नालि दिङगिल्हि। दादागेलाइ चाका-आम्का चोल्लि मिस्रो सारभिता हानिलाउ ओबालाइ योसेफहेङ मानाल्हि, कालाउ योसेफ चाहि इम्बालाइहेङ नाल्हि।

कालाउ ताइको दादागेलाइ परिबर्तन जेङका हि कि मान्थु दोअ्तेङ जाच पालि दोतेङ योसेफ इम्बालाइहेङ दोअ्हि, “का नेलाइको ओने योसेफ हिघा, माथिसु। नेलाइ कासेहेङ बान्धाइतिको रुपता पि:तेङ दुस्ट काम पालि भोसुन्हा, कालाउ परमेस्वर दुस्टताहेङ आसाल कामको भाअ्सिङ चालाइहि। लोसु कालाउ मिस्रो सारभिता हिसु कालाउकि नेलाइ कालाउ नेलाइको जाहानगेलाइहेङ का जुराइलि द्वाको।“

जेलाउ योसेफको दादागेलाइ साअ् भारि घुरिहि कालाउ योसेफ आझै सिन्हुतेङ हिका बानाल ताइको आबा याकुबहेङ हिङपाहि,वा हेन्जाङ लेङचाहि।

याकुब वाराङ जेङलाउ बुङ ताइको गोताङ जाहानहेङ चुम्तेङ वा मिस्रो सारभिता हानिहि कालाउ इन्ताङ हिलि तेङहि। सिलि खान्तेङ लाम्फा याकुब ताइको गोताङ चानगेलाइहेङ आसिस पिहि।

आब्राहामहेङ प्रतिग्या पाका कारार आब्राहामसो इसाहाकता सरिहि, कालाउ याकुबता, कालाउ याकुबको तेन्हे चानगेलाइ कालाउ ओबालाइको जाहानता। इङको तेन्हे चानगेलाइको सान्तानगेलाइसो दोङ इस्राएलको तेन्हे परमेस्वर कुलगेलाइ जेङहि।