19. परमेश्वर कु भविष्य पेनु मी।
परमेश्वर तुकतू इस्राएलियों कु दरु भविष्य पेनु मी पांडंसु नीजु। भविष्य पेनु मी परमेश्वर सु फुडं यन निजु अज्यु इदु मीजन बते निजु।
खलन की अहाब इस्राएल राज्य रु राजा निजु इदु ज्या एलिययाह भविष्य पेनु मी निजु। अहाब ताकु यानु मी निजु। इदु आलानु बाल देवता कु पुजा घामु हन्दु मी जन जो जबरदसती घासु। इदु हन्दु एलिययाह सु अहाब सु लिसु की परमेश्वर इदु मी जन कु सजा दामु हन्दु दी नीजु। "इदसु इदोजो लिसु जब होना सु जी मु रामु हन्दु मुलियो इलाडं होना सु इस्राएल कु राज्य रु ना मु रायाडं अज्यु ना भुरती लेयांडं"। इदु काडंथे रु अहाब कु अलाडं रिस पिरा निचु कि एलिययाह कु सेयमु हन्दु फैसला घासु।
इदु हन्दु परमेश्वर सु एलिययाह सु लिसु कि इदु सीरु दिलन अहाब ताडंलन चासिलो। एलिययाह सिरु इदु सोते कु दरो दिजु जौ भांडं दिमु हन्दु परमेश्वर सु इदु भते निजु। ताकु छान्जु अज्यु नडंथाबा पेया एलिययाह हन्दु रोठा अज्यु स्या रेलन रानिजु। अलाड़ं वक्त ,अहाब अज्यु उसीकु सेना एलिययाह कु मासि निजु ,इदु हन्दु उइ मासी मुत्तर निजु।
मु मुरालाड़ं र्खचु अल्या ज्या नोगोन्दी इदु सोता किछर निजु। इदु हन्दु एलिययाह दरु ताकु थोना देश रु ताचु। इदु देश रु ताकु गरीब विधवा निजु इदु कु ताकु सेनू निजु। उइ दरु झाती लगभग पुरकिनीचु ,खलन की उइ कु फसल मुलिजु। इदु हन्दु भुदाचुमे सु एलिययाह कु देखभाल घासु ,इदु हन्दु परमेश्वर सु उईकु अज्यु इदु कु सेनु कु जरुरत पुरा घासु ,अन्दु कु कारण सु उइकु ही कु कठा अज्यु मरती कु कुप्पी कजेयारी खाली मुलिजु। इदु भुडंना अकाल कु ज्या रु उइकु लगान्दी झाती निजु। एलिययाह अल्या हिंघ होना इदो निजु।
साढें 3 सुम हिडं नोगोन्दी परमेश्वर सु एलिययाह जो लिसु थन र्खचु मु मुरायाड़ं। इदु सु एलिययाह जो थोकते जु इस्राएल कु राज्य रु दिलन अहाब जो काडथे धामु हन्दु लिसु। इदु हन्दु अहाब कु दरु दिजु जब अहाब सु इदु ताडंसु ते इदु सु लिसु जैनु,, गे निहेन मुसीबत ढुडनु घानु हन्दु ,, एलिययाह सु जवाब दासु मुसीबत ढुडनु घानु ते घेलि। घेसु यहोवा जो किसिदिसु। इदु हुचाना कु परमेश्वर ली खलन की बाल देवता कु भक्ति घा निचु। थन गे इस्राएल राज्य कु भिर मी कर्मेल धाड़ंरु रु रेलन रामु निनि।
अतःभिर मी कर्मेल धाड़ंरु रु दिचु। इदु हुरासीरी ले राचु जो लि निसु कि इदु बाल देवता कु भुडं कु फानिचु अन्दु बाल देवता कु भविष्य पेनु मी निजु। इदु बिर 450 पीसा कु नासा मीजन निजु। एलिययाह सु मीजन जो लिसु हुम्बा होना अफी मन रु फेरसीलन ताडंदनघ् अन्दु यहोवा परमेश्वर ली ते इदु कु भक्ति घामु। बाल देवता ली ते इदु कु भक्ति घामु।
इदु एलिययाह सु बाल देवता कु भविष्य पेनु मी सु लिसु ,ताकु लाडं कु बली दालन चु इदु कु स्या कु बलिदान घामु हन्दु ताकु अलग दाड़ंसिड़ं तामु इदु हन्दु मीह मुदुमु। इदकु नोगोन्दी जी ले इदमा घंडंदी ताकु खिजु दाड़ंसिड़ं रु जी इदु स्या ताइदी। इदु परमेश्वर दाड़ंसिड़ं रु मि चाड़ंदा ते गे पेयाडदन कि इदु झेनु परमेश्वर ली इदु बाल देवता कु भविष्य पेनु मी सु ताकु बली तैयार घासु इदु हन्दु मी मुलेगेसु।
इदु बाल देवता कु भविष्य पेनु मी सु बाल जो प्रार्थना घासु ,है बाल देवता निगु यना ,,उइ सु भुडंना झया उसु प्रार्थना घा निजु अज्यु ढाहीजु अज्यु दोहना सु अफी कु चाकु सु थुमसु इदु हन्दु बाल देवता सु फुंडं मुदासु अज्यु इदु गुबरी मी मलगे सु।
बाल देवता कु भविष्य पेनु मी सु बाल देवता सु प्रार्थना घामु रु भुडना ज्या किलगे सु। इदु सु प्रार्थना घामु बंद किघादीचु तब एलिययाह सु खिजु लंयड़ं कु स्या परमेश्वर कु दाड़ंसिड़ं रु कितादुजु इदकु नोगोन्दी उइकु मी सु ती कु विशाल भंन्ढुरु कु इदु बलिदान रु ती दासु तक घामु हन्दु लिसु जब होना स्या सीघं अज्यु दो होना सु दाडंसिड़ं तिघड दिघाड कु धरती रु भुडना घालन थीनु कल निचु।
इदु एलिययाह सु प्रार्थना घासु ,,हे यहोवा,अब्राहम,इसहाक,अज्यु याकूब उकु परमेश्वर निडं थेया कि घे इस्राएल कु परमेश्वर ली अज्यु अनुमा ली जी घनकु सेवा घानु लि। जी जवाब दामु चिडंयांडं खमजो की अन्दु जन पेयदा की घे झीकु हुचना कु परमेश्वर लि।
इदु हन्दु तूंखु सु मी लेजु अज्यु इदु सु स्या ,सिघं ,दाडरु,सारु अज्यु दोहना तुकतू दाड़ंसिडं नोगोन्दी कु ती जो किचेदिसु। जब मी जन सु अनुमा ताडंसु इदु थांडंरु किलेजु अज्यु फासु ,यहोवा परमेश्वर ली। यहोवा परमेश्वर ली।
इदु एलिययाह सु लिसु बाल देवता कु ताकु भविष्य पेनु मी टाड़ंलन दिमु मुचिङ इदु हन्दु मी जन बाल देवता कु भविष्य पेनु मी कुचूमसु अज्यु इदोघ खर्चु खिजु किघादुसु अज्यु उई किसेदीचु।
इदु एलिययाह सु अहाब राजा सु लिसु ,छाटो सु अफी सुडंरु फुंडंलन दी ,खलन कि मु रानू नीनी छाटो ही खु धुमसीलन रानी अज्यु दालना मु शरु कलजु। यहोवा ती कु अकाल पुरकू निजु। अन्दु सु प्रकट लिजु यहोवा हुचना कु परमेश्वर ली।
ताकचो एलिययाह सु अफी लन पुराकिनीजु परमेश्वर सु एलीषा मुडं कु ताकु हुरासीरी सु अफी भविष्य पेनु मी लीमु हन्दु कुचमे निजु। परमेश्वर सु एलीषा कु द्वारा दलना चमत्कार निजु। ताकु चमत्कार नामान कु साथु लिजु। इदु ताकु दुश्मन कु सेना सरदार निजु। इदु रु ताकु यानु छिना कल निजु। नामान सु एलीशा कु बारी रु यहनजु कि इदु हन्दु उइ एलीशा कु दरु राजु अज्यु इदुसु उइजो जेनु घामु हन्दु विनती घासु। एलीशा सु नामान सु लिसु की दिलन यरदन ती रु जेयदु बार ढुबकी लगे सु।
नामान रिस पीराजु इदु सु अनूमा घामु हन्दु महा लिसु खलन की उई सु ना समज मी कु लन लागे निजु। इदु हन्दु नोगोन्दी जी अफी मन किखी दुचु अज्यु दिलन यरदन ती रु 7 जेयदु बार ढुबकु लगेसु। जब अंतिम बार इदु ती सु भांडंरु राजु ताकचा परमेश्वर सु इदु जेनु की घा दिचु।
परमेश्वर सु इस्राएल सु मी कु दरु इदु दलना सु भविष्य पेनु मी पांडंसु इदु बिर झन सु मूर्ति कु भक्ति घामु बंद घामु हन्दु लिसु। इदु कु ओजेसु उइकु ताकु खिजु कु रकसा जेनु बोली घामु चिडंनी। अज्यु खीजु रु जेनु दया घामु चिडंनी। इदु भविष्य पेनु मी सु मीजन रु चेतावनी दासु की इदु कु यानू लन कु घामू बंद घामु नीनी अज्यु इदु ओजेसु परमेश्वर कु काडथे कु मानमु ली। उई मीजन सु अनमा मुघाजे परमेश्वर इदु उई कु फैसला घाडदा ,अज्यु उइकु सजा दाडंदा।
अल्या ज्या इदु मीजन परमेश्वर कु आदेश कु पालन मुघासु। अक्सर उईसु भविष्य पेनु मी कु साथु यानु व्यवहार घासु अज्यु दो होना सु गुबज्या गुबज्या उइ सु सेदडंदा। ताकु बार इदु सु यिर्मयाह भविष्य पेनु मी कु जरनु कुऑ किघादुचू अज्यु इदु सेमु कु हन्दु पाकसी दीचु। इदु कुऑ कु थाडरु कच्चार रु किदसजु इदु हन्दु तब राजा सु इदरु दया राचु अज्यु उइ अफी सैनिक कु आदेश दासु कि यिर्मयाह सिजम सु तुकतू इदु कुऑ र्खचु भाडरु रेलन राजु।
भविष्य पेनु मी सु परमेश्वर कु अज्यु सु फालन चिंडं निजु खलन कि मीजन सु उइ जौ रीस घा निजु इदु सु मीजन जौ चेतावनी दासु खलन की उइसु पक्षाताप मुघासु ते परमेश्वर उइकु नाश घादडंदां। इदु हन्दु मीजन कु अनुमा ची घासु की परमेश्वर सु उई कु लगान्दी मसीह कु पांडंमु वादा घासु।
बाइबल कु लुभुडं 1 राजाओ अध्याय 16.18; राजाओ 5; ताकु यिर्मयाह 38 से कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।