3. घू रालन

होनम ज्या कु नोगोन्दी धरती रु दलना मीजन कल निजु। इदु यानु अज्यु दाकक्षीमु मीजन कल निजु। इदु अलाड़ं यानु निजु परमेश्‍वर सु भुड़ंना धरती घु सु खत्म घामु कु फैसला घासु।

इदु हन्दु परमेश्‍वर नूह जो खुश निजु। इदु यानु मीजन कु घुन्दा रु सुड़ंनु ताकु जेनु मी निजु। परमेश्‍वर सु नूह जो बतेसु ताकु दलना पुनु घु पाड़ंनु निनि। इदु वजह सु इदजो नूह जो पुनु नाव बनेमु हन्दु लिसु।

परमेश्‍वर सू नूह से लिसू कि 140 ताकु पीसा ताकु मीटर भुनू निचू 23मीटर परनू ताकू 13'5 चेसम बिन्दु नाई पुनु सिड़ं कु नाव गामू हन्दू लिसू। सुम मंजिला चिम ,अज्यु दलना कमरा ,ताकु छत ,अज्यु खोली। इदु नाव नूह ,इदकु खु अज्यु धरती कु बिर जन जानवर जो घू सु बचेमु हन्दु लिजु।

इदू हन्दु नुह परमेश्‍वर काड़थे मानुसु। इदसु नूह अज्यु सिरी जो इताना नाव बनेसु जो परमेश्‍वर सु लिसु इदु नाव पुनु निजु इदु बनेमु हन्दु दलना हिड़ं लागेसु। नूह सु मीजन जो रानु घू कु बारे रु चेतावनी दासु। अज्यु इदु परमेश्‍वर चन्दु धिनी,खलन कि मीजन सु विश्‍वाश मुघासु खलन कि इता होना धरती रु मु मुराजु।

परमेश्‍वर सु नूह अज्यु खु अफी हन्दु अज्यु रे माला हुलाड़ंरी झाती चिड़ंमु कु आदेश दासु। जब बिर जन कियाड़ंसिजु तब परमेश्‍वर सु नूह जो लिसु इदु ज्या इदकु ,इदकु भुदाचुमे ,इदकु सुम सेयजन अज्यु इदकु भुदाचुमे जन नाव रु दिमु निजु। जो इदु घुई मीजन निजु।

परमेश्‍वर बिर रे माला अज्यु पक्षी नर अज्यु मादा जो नूह दरु पाड़ंसु कि उइ नाव रु दि तरलो इदु घू सु टाड़ंसीलो। परमेश्‍वर सु अनमा घालन बिर जानवर कु जेयदु नर जेयदु मादा पाड़ंसु। इदु नाव रु भुतरु पिराजु तब परमेश्‍वर सु नाव कु दारम बन्द किघादुसु।

तब मु पिराजु ,अज्यु मु रालना पिसा ज्या होना अज्यु पिसा मुन्छू होना मु रालना सिड़ंजु। धरती कु बिर झन अज्यु पुनु धाड़ंरु ती रु डुबेजु।

धरती रु सुड़ंनु बिर जन पुड़ंजू इदू जो मिजन अज्यु रे माला नाव रु निजु इद बिर कुटाड़ंजु इदू नाव रु तीरु भोटया छा निजू अज्यु नाब रु भुतरु बिरझन बिर डुबने सु कुटाड़चु।

मु थमलन वक्त नाइ ला होना सु नाव ती रु भोटया छा निजु अज्यु नाइ ला कु ज्या नोगोन्दी ती अल्या कलजु। तब ताकु ज्या इदु नाव ताकु धाड़ंरु कु चोटी रु कुसुड़ंजु। इता धरती ती सु कुभड़ं निजु। सुम ला नोगोन्दी धाडंरु कु चोटी तन निजु।

इदु पीसा ज्या कु नुक्छु नूह सु ताकु कौवा जो इदु उड़ंमु हन्दु भाड़ंरु दिसु इदु ती किछरजु। इदु कौवा छरनु धरती मासीमु हन्दु तिखाड़ं दिखाड़ं दिसु ,इदु घुबरी ले भड़ं मुताड़ंजु।

ताकु ज्या नूह सु कबुतर भाड़ंरु पाड़ंसु। इदु हन्दु घुबरी ले छरनु धरती मुताड़ंसु। इदु हन्दु नूह दरो कुहनसु। ताकु हप्ता ज्या नूह सु इदु कबुतर दुबारा पाड़ंसु। इदु अफी आरु रु जैतून सिड़ं कु मिनु ढाली रेलन थोकते राजु। इदु नूह जो पते लगेसु कि ती अल्या ली निजु अज्यु सिड झुलन रानी।

नूह सू ताकू हप्ता ज्या कुरुड़ंजि निजु। सुम ज्या सू इदू कबूतर भाड़ंरु पाड़ंसु अन्दु ज्या इदु सुड़ंमु कु भड़ं कुतड़ंसु। इदु र्खचु थोकते मुराजु। इदु पते चलेसु बिर ती छर निजु।

निसु ला नोगोन्दी परमेश्‍वर सु नूह जो लिसु ,घे अज्यु घे कु खु अज्यु बिर रे माला नाव र्खचु भाड़ंरु राजु। अज्यु आदेश दासु कि दलना संयजन अज्यु खी खीमे ढुड़ंनी अज्यु धरती भुड़ंदेया। नूह अज्यु इदकु खु नाव र्खचु भाड़ंरु राजु।

नूह कु नाव सु भाड़ंरु कु नोगोंन्दी इदसु ढाड़ंसिड़ं बनेसु। बली दानु रे माला जन अल्या कुरलन बली दासु। परमेश्‍वर इदु बली सु खुश लिजु अज्यु नूह अज्यु इदु खु आशिर्वाद दासु।

परमेश्‍वर सु लिसु जी वादा घादी मीजन यानु लन घादा इदकु वजह सु जी खजारी धरती जो खजारी शा्प मुदाड़ंदा अज्यु दुनिया घु वजह सु नाश मुलायड़ंन। खलन कि मीजन अफी मिलाड़ं र्खचु पाप घालना राजु।

तब परमेश्‍वर सु अफी वादा कु निशान कु हन्दु तुकतू इन्द्र धनुष जो बनेसु। जब खजारी ले तुखु रु इन्द्र धनुष तन निजु। तब परमेश्‍वर अफी वादा ची घाघदा। इदमा ले मीजन ची घाघदा।