15. किरिया र देश

सरा साडी ने, एबर हाय बेरा आयला कि इस्रायली लोक किरिया देश, कनान ने ओला। हाय देश ने यरीहो नाम र गोटक नगर रेला। हातार सुरचा काचे हातार चारो बाटे मजबूत काती आचे रेला।यहोशु हाय नगर ने दुयटा भेदी मन के पोटायला। हाय नगर ने राहाबम र वेश्या रेबार आय। हाय ये दुय भेदी मन के लुकायला, आवरी फिर पाचे हाय तीके नगर ले बाची करी निकारबार ने सायता करला। हाय असन ऐई काचे करला कायकाचे हाय महापरू थाने विश्वाश कारबार आय। जोन बेरा इस्रायली लोक यरीहो के नास करबाय तेबे हायमन राहाब आवरी हातार घरोर लोक र रक्चा कारबार किरिया करी रेला।

इस्रायली लोक मन के किरिया र देश ने ओलबा काचे यरदन नदी के पार कारबार रेला। महापरू यहोशु ले बोलला, ”याजक मन के पोयले जायके देस।”जाड दाय याजक मन यारदन नदी ने खुदर गोड़ सोंगायलाय तेबे पानी धारा बोयबा टा ठेबी गला, जार ले कि इस्रायली लोक नदी र दुसर बाटे सुखला भूईं ने जायके सकलाय।

हाय लोक यरदन नदी पार करलाय तेबे महापरू यहोशु ले बोलला कि यरीहो थाने हमला करबा काचे तियार राहा, जोन हाय खुबे दृड़नगर रेला। महापरू हाय लोक मन ले बोलला के तिकर याजक आवरी सेनिक छः दिन तक हाय नगर र चारो बाटे लगायबार आय। याजक आवरी सेनिक असनी ही करलाय।

तेबे सातव दिन, एस्रायाली मन हाय नगर र चारो बाटे सात बार किंदर लाय। तिकर नगर र चारो बाटे सातवी किंदर लाय पाचे, याजक मन खुदर तुरही मन के फुकलाय आवरी सेनिक मन जोर दार शब्द करलाय।

तेबे यरीहो र चोरो बाटर काति घसरी गला! जसन महापरु आज्ञा डी रला इसरायली मन नगरर सबु चीज के नास करी देलाय। हाय मन केवल राहाब आउरी हातार घरर लोग मन के छाडी देलाय, जोन इसरायली मनर भाग बनी जाई रेलाय। जेबे कनान ने रेबा दूसरा लोग मन सुन लाय कि इसरायली मन यारिहो के नास करी देलाय, तेबे हाय मन डरी गलाय कि इसरायली मन तिकर उपरे बले हमाला करबाय।

महापरू इसरायली मन के आज्ञा दि रला कि कनान ने रेबा बीती कोनी बले जाति संगे शांति संधि ना करबा राय। मान्तर गिबोनी नामर गोटक कनानी जाति यहोशू के झूट बोलुआय कि हाय मन कनान ले दूर गोटक जागा ने रेबा लोग आत। हाय मन यहोशु ले तिकर संगे शांतिसंधि करबा काचे अनुरोध करूआत। यहोशू आउरी दूसरा इसरायली अगुआ मन महापरू ले ना पचारु आत कि हाय मनके काय करबा राय। एतार बजाय, हाय मन गिबोनी मन संगे शांतिसंधि करुआत।

तीन दिनर पाचे, इसरायली मन के मालुम होऊआय कि गिबोनर लोग मन कनान थाने रेयते रेलाय। हाय मन रिसा होईजाऊ आत कायकाचे कि गिबोनी मन हाय मनके धोका दि रहूआत। मान्तर हाय मन तिकर संगे करला बीती शांतिसंधि के बनाय करी सोंगाउआत काय काचे कि हाय महापरूर छोमे करला बीती रहूआय। तेबे खिनिक मा बेरार पाचे, कनान ने रेबा बीती गोटक दुसरा जाति, एमोरीर राजा सुनुआय कि गिबोनि मन इसरायली मन संगे शांतिसंधि करला आचेत, एकाचे अपनार – अपनार सेना मन के गोटक – गोटक करी बड़े सेना बनाउआय आउरी गिबोन थाने हमला करी देउआय। गिबोनी मन तिकर सहायता करबा काचे यहोशू लगे सन्देश पटाउआत।

अतः यहोशू इसरायली मनर सेना के रुंडा करूआय आउरी गिबोनी मन लगे खेटबा काचे हाय मन पूरा राती हिन्डूआत। सकार पार हाय मन एमोरी मन के चकित करी देउआत आउरी तिकर उपरे हमला करी देउआत।

हाय दिने महापरु इसरायली मन काचे लडू आय। हाय एमोरी मन के घबराय देउआय आउरी हाय बड़े – बड़े ओला घसराय करी खुबे एमोरी मनके मारी देउआय।

महापरू बेर के बले बादरी ने गोटक जागा ने ठेबाय देउआय कि इसरायली मन के पर्याप्त समय मिलो कि एमोरी मन के पूरा तरह ले हाराय दोत। हाय दिने, महापरू इसरायली मन काचे बड़े विजय के पाउआय

जेबे महापरू हाय सेना मन के हारायलार पाचे, खुबे कनानी जातिर लोग मन इसरायल थाने हमला करबा काचे रुंडा होऊआत। यहोशू आउरी इसरायली मन हमला करी हाय मनर सबु के नास करी देउआत।

ए युद्ध मनर पाचे, महापरू इस्राएलर सबु गोत्र के प्रतिज्ञार हाय देश ने तिकर बाटा के देउआय। तेबे महापरू इस्राएल के हातार सबु सीमा ने शांति देउआय।

जेबे यहोशु डोकरा होई जाऊआय तो हाय इस्राएलर सबु लोग के गोटक संगे हागदेउआय। तेबे यहोशु हाय मन के सुरता कराऊआय कि हाय मन हाय वाचा के पालन करबा काचे प्रतिज्ञा करला आत जोन टा के महापरू तिकर संगे सिनेय परबत ने बांधला आचे। हाय लोग मन महापरू प्रति विशवास योग्य रेबा काचे आउरी हातार व्यवस्था के पालन करबा काचे किरया करूआत।