16. छाड़ायबा बीता

यहोशु र मोरलार पाचे इस्रायली मन महापरू गोट के ना मानलाय। हाय मन महापरू र नियम र पालन ना करला, आवरी हायवाचा र देश बाचाला कनानी मन के बहारे ना निकरालाय। इस्रायली मन अपनार सतर महापरू, यहोवा के छाडी कनानीमनर देवतार उपासना करबा र शुरू करी देलाय। इस्रायली मन लगे कोनी राजा ना रेला, ऐई काचे जाके जोन सही लागला हाय असनि करलाय।

महापरू र आज्ञा के ना मानबार द्वारा एस्रायाली मन गोटक रितिके शुरू करी देलाय जाके कतक बार दुहराय रेलाय। ये रीती ए रीती ऐई तरह चलला, खिनिक बोरस तक इस्रायली महापरू आज्ञा के ना मानलाय, तेबे हाय तीके तिकर दुश्मन हारयाबा र द्वारा दंड देसी। ये दुश्मन एस्रायाली मन ले तिकर सामान के जुरलाय, तिकर धन के नास करी देबाय, आवरी हयथानले खुबे के मारी देबाय।फिर जेबेइस्रायली मनर दुश्मन तिकर उपरे कतक बोरस तक जबरदस्ती करबाय, एतर पाचे एस्रायाली खुदर पाप र पश्चताप करबाय आवरी महापरू ले बचायबा काचे पारताना करबाय।

सबु हार जेबे इस्रायली करबाय तेबे महापरू तीके बचायसी। हाय गोटक छाड़ायबा बीता र द्वारा असन करसी –गोटक असन लोक जोन तिकर दुशमन र विरुद्ध लड़सी आवरी तीके हरायसी। तेबे देश ने शांति होयसी आवरी हाय छाड़ायबा बीता तिकर उपरे अच्छा ले शासन करसी। महापरू हाय लोक मन के बचायाबा काचे खुबे ले छाड़ायबा बीता के पोटायला। महापरू लगर दुशमन र जाति, मिदयानी मन र द्वारा एस्रायाली मन के हरायबा द्वारा फिर ले एनती करला।

मिदयानी मन सात बोरस तक इस्रायली मनर फसल के जुरलाय। इस्रायली लोक खुबे डरी रेलाय, आवरी हाय मन गुफा ने लुकाय कि मिदयानी लोक तीके दगराय के ना सकोत। फिर ले, तीके बचायाबा काचे महापरू के हागदेलाय।

गिदोन नामर गोटक एस्रायाली माने रेला। गोटक दिन, हाय गोटक गुप्त जगह ने गेंहू फापड़ ते रेय जाके मिदयानी लोक हाके चोरके ना सकोत। यहोवा र सरगदूत गिदोन लगे आई करी बोलला, ”ये शुर बीर सूरमा, महापरू तोर संगे आचे। जा आवरी एस्रायाली मन के मिदयानी मन ले बाचाव।”

गिदोन र बाबा लगे मूर्ति देबा गोटक बेदी रेला। सबुले पोयला गोट जोन महापरू ने गिदोन के करबा काचे बोली रेला हाय बेदी के टुटायबार रेला। मातर गिदोन लोकमन ले डर बार आय, ऐई काचे हाय राती होबा काचे टाकला। तेबे हाय हाय बेदी के टूटाय करी टुकड़ा –टुकड़ा करी देला। हाय महापरू काचे नुआ वेदी बोनायला आवरी हाय्थाने महापरू काचे बलि चेगायला।

आयबा सकार लोक मन दकलाय कि कोनी बेदी के टूटाय करी टुकड़ा –टुकड़ा करी देला आचे, ऐई काचे खुबे रिस होयलाय। हाय मन गिदोन के मरी देबा काचे हातार घरे गलाय, मातर गिदोन र बाबा बोलला, ”तोमी काय काचे अपनार देबता र सायता करबा काचे कोसीस करबा आस? जोन हाय देवता आय तेबे हाके अपनार राका खुदे करके दियास!”कायकाचे हाय असं बोलला ऐई काचे लोक मन गिदोन के ना मारलाय।

तेबे एस्रायाली मन के जुरबा काचे मिदयानी लोक दिर ले आयलाय। हायमन खुबे रहूआता कि तिकर गिनती ना करी होय। गिदोन तिकर विरुद्ध लड़बा काचे एस्रायाली मन के गोटक संगे हागदेला। गिदोन महापरू ले दुय चीन र मांग करला कि हाके विस्वास हो कि महापरू सते हाके इस्रायल के बाचायबा काचे बोलसी आचे।

पोयले चीन काचे, गिदोन मेंडार ऊँन के भूईं ने सोंगाय महापरू ले बोलला सकार र ओस गोटक मात्र हय्य मेंडार ऊँन थाने घसरो आवरी भूईं थाने ना घसरो। महापरू असनि ही करला। आयबा सकार, हाय महापरू ले बोलला भुई भीजी जाओ मतर मेंडार ऊन सुकला रओ। महापरू असन बी करला। ये दुय चिर चलते, गिदोन विश्वास करला महापरू सते चायुआय कि हाय एस्रायाली मन के मिदयानी मन ले बचाओ।

तेबे गिदोन ने सेनिक मन के खुदर लगे हाग देला आवरी 32,000 माने आयलाय। मातर महापरू तिकर के बोलला ये खुबे आचेत करी। गिदोन हाय सबु 22, 000 के घरे पोटाय देला जोन लड़बा ने डर ते रेलाय। महापरू गिदोन ले बोलला कि ये माने एबे बी खुबे रेलाय। ऐई काचे गिदोन 300 सेनिक मन के छाडी करी हाय सबु के घर पिटाय देला।

हाय राती महापरू गिदोन ले बोलला, ”मिदयानी मनर छावनी ने जा आवरी तिकर गोटाय बा दाय सुन। जड़ दाय तुय सुनबीस कि हाय मन काय गोटायबा आत तेबे तु तिकर उपरे हमला करबा ने ना डरबीस”ऐई काचे हाय राती, गिदोन तले छावनी ने गला आवरी हाय गोटक मिदयानी सेना के अपनार दोस्त र गोट सांगते सुन ला जोन हाय सोपना ने दकी रेला। हाय मानेर दोस्त बोलला, ”ये सोपना मुय दकि रई। हाय माने र दोस्त बोलला, ”ये सोपना र अरत आय गिदोनर सेना हामी मिदयानी सेना के हाराय देयसी!"जेबे गिदोन ए सुनला तेबे हाय महापरूर स्तुति करला।

तेबे गिदोन खुदर सैनिक मनलगे लेवटला आउरी हाय सबु के गोटक – गोटक नर्सिंगा गोटक माटीर बर्तन, आउरी गोटक मसाल देला। हाय मन हाय छावनी के घेरी देलाय जोन थाने मिदयानी सैनिक मन सोई रेलाय। गिदोनर 300 सैनिक मन खुदर मसाल मन के बरतन ले ढाकी रेलाय एकाचे मिदयानी लोक हाय मसालर उजर के ना दखके सकलाय।

तेबे गिदोनर सबु सैनिक मन खुदर बरतन मनके गोटकि बेरा टुटाय करी अचानक मसालर जोय के दखाय देलाय। हाय मन खुदर नरसिंगा के फूंकलाय आउरी किरकिर लाय,"यहोवा र आउरी गिदोनर तलवार!"

महापरू मिदयानी मनके घबराय देउआय, एकाचे हाय मन एक दूसरा के मारके – काटके मुराउआत। हाडकीच दाय,गिदोनर संदेस वाहक मनके खुबे असन इसरायली मन के मिदयानी मनर पीछा करबा ने तिकर सहायता करबा काचे हागदेय के पटाउआय। हाय मन हाय थानले खुबे के मारी देउ आत आउरी बाकि के पीछा करी हाय मनके इस्राएल देश ले बाहरे निकलाय देउआत। हाय दिने 1,20,000 मिदयानी मन मोरी गलाय। ए तरह ले महापरू इस्राएल के बाचाउ आय।

हाय लोग मन गिदोन के खुदर राजा बनाय बार चाहते रहूआत,मान्तर गिदोन हाय मनके अमता ना करके देउआय, मान्तर हाय तिकर ले हाय सोनार आभूषण के मागुआय जोन टा के हाय मन थानले खुबे झन मन मिदयानी मन ले जूरी रहूआत। हाय लोग मन खुबे मात्रा ने गिदोन के सोना देउआत।

तेबे गिदोन हाय सोना ले गोटक विशेस फोटी बनाउआय जसन कि महायाजक मन पिन्दते रेलाय। मान्तर लोग मन हातार उपासना करबार शुरू करी देलाय जसन कि हाय गोटक मुरती आय। तेबे महापरू फिरले इसरायली मन के दंडित करला काय काचे कि हाय मन मुरतीर उपासना करी रहूआत। महापरू तिकर दुसमन मन के हाय मनके हाराय बा काचे सक्षम करूआय। आखरी ने हाय मन फिरले महापरू के सहायता करबा काचे पारतना करूआत, आउरी महापरू तिकर लगे हाय मनके बाचाय बा काचे दूसरा छडायबा बीता के पटाऊ आय।

ए बीती गोट कई बार घाटू आय: इसरायली मन पाप करबाय,महापरू हाय मनके दंडित करसी,हाय मन पश्चाताप करबाय, आउरी महापरू हाय मन के छाड़ाय बा काचे काकी बले पटाय सी, महापरू खुबे असन छाड़ाय बा बीता मनके पटायला जोन मन इसरायली मनके तिकर दुसमन मनले बाचाय लाय।

आखरी ने,हाय लोग मन दूसरा देशर लोग मन असन महापरू ले खुदर काचे गोटक राजार मांग करूआत। हाय मन गोटक अमता राजा चाहते रेलाय जोन डेंगा आउरी ताकतबर रहो, आउरी जोन युद्ध ने तिकर अगुआई करके सको। महापरू के ए निवेदन पसंद ना आऊआय, मान्तर हाय तिके असन राजा देउआय जसन हाय मन मांगी रहूआत।