17. दाऊद संगे महापरू वाचा

शाऊल इस्राएल ए पोयला राजा रेला। हाय डेन्गा आवरी सुंदरा रेला, जसन लोक चायते रे बिलकुल अंती रेला। इस्रायल थाने खुदर शाशन र पोयले कतक बोरस शाऊल गोटक अचा राजा रेय। मतर पाचे हाय दुष्ट माने बनी गला जोन महापरू र गोट के ना मानला, ऐई काचे महापरू गोटक दुसर जाति र माने के चुनला जोन गोटक दिन हातार जगह ने राजा बनसी।

महापरू दाऊद नामर गोटक जुआन एस्रायाली माने के चुन करी गोटक दिन शाऊल र जगह थाने राजा होयबा काचे तियार करबा शुरू करला। दाउद बैतलहम नगर र गोटक धोरी रेला। कइ बेरा, दाउद सेर आवरी भालू के बी मारी रऊआय काय काचे दाउद राका बेरा हातार बाबा र मेंडा मन थाने हायमन हमला करी रेला। दाउद गोटक नम्र रेला आवरी धर्मी माने रेला। हाय महापरू थाने भोरसा करला आवरी हातार गोट के मनुआय

जेबे दाउद ऐबे जुआन माने रेला, डेन्गा चोड़ा गोलियत र बिरुद्ध लड़ाई करला। गोलिता गोटक खुबे अच्छा सैनिक रेला। हाय खुबे मजबूत आवरी लगभग तीन मीटर डेन्गा रेला!मातर महापरू गोलियत के मरबा र आवरी इस्रायल के बचाय बबा ने सहायता करला। एतार पाचे, दाउद इस्रायलर दुश्मन ले कतक बार जीतला आचे। दाउद गोटक बड़े सैनिक बनी गला, आवरी हाय खुबे युद्ध ने इस्रायली सेना मनर अगुवाई करला। लोक मन हातार खुबे प्रशंसा करलाय।

लोकमन दाउद कतक मोया करलाय कि शाऊल हाके कुचर होयके लागला। आखिर शाऊल हाके मारबा चायते रेला, ऐई काचे दाउद हाके आवरी हातार सेनिक मन ले लुक बा काचे झारे पोरायला। गोटक दिन, जेबे शाऊल आवरी हातार सैनिक दाउद के डगरायबा ने लगी रेलाय तेबे शाउल गोटक गुफा ने गला। ये हाई गुफा आय जोन थाने दाउद लुकी रेला, मातर शाउल हाके न दकला। दाउद शाउलर पीटी हातार खुबे लगे जाई रेला आवरी हातार फोटी ले गोटक टुकटा काटू आय। पाचे, जेबे शाउल हाय गुफा ले निकरला तेबे दाउद हाके हाग देयी करी हाय धरला फोटी र टुकड़ा दकाउ आय। ये रीती ले, शाउल जान ला कि दाउद राजा बनबा काचे हाके मार देबा काचे मना करी देला।

खिनिक बेरा र पाचे, शाउल युद्ध ने मोरी गला, आवरी दाउद इस्रायल र राजा बनी गला। हाय गोटक अच्छा राजा रेला, आवरी लोक मन हातार ले मोया सोंगाय लाय। महापरू दाउद के आशीषित करला आवरी सफल बनायला। दाउद कतक युद्ध लड़लाय, आवरी महापरू इस्रायल र दुश्मन के हाराय बा ने हातार सहायता करला। दाउद यरूशले नगर के जीती करी खुदर राजधानी बनायला, जोन थाने हाय रेबार आय आवरी शासन करला। दाउद चालीस बोरस तक राजा रेला। ये बेरा र दोरना, इस्रायल सामर्थी अवरी धनवान बनी गला।

दाउद गोटक मंदिर बनायबा चायते रेहूआय जोई थाने इस्रायली महापरू र आराधना कर के सकोत आवरी हातार काचे बलिदान चेगाय के सकोत। लगभग 400 बोरस ले, मुसा र बनायला बड़ी ने महापरू र आराधना करते रेलाय आवरी हातार काचे बलिदान चेगायते रेलाय

मातर हयती नातान नामर गोटक भविष्यवक्ता रेला। महापरू हाके दाउद ले ये बोल बा काचे पोटायला :”तुय खुबे युद्ध लड़लिआस, ऐई काचे तु ये मन्दिन के ना बनायिस। तोर बेटा एके बनायसी।तेबे बी मुय तोके खुबे आशीषित करबी। तोर गोटक बोंशज हमेसा काचे मोर लोक मन थाने राजा र रुप ले शासन करसी।” अमदेंआ काचे शासन करलाय हाय दाउद र गोटक मात्र बोंसज जिसु महापरू रेला जिसु महापरू के चुनला लोक रेला जोन संसार र लोकमन के तिकर पाप ले बचायसी।

जेबे दाउद नातान र सन्देश के सुनला तेबे हाय महापरू र धन्यवाद करला आवरी हातार स्तुति करला। महापरू हातार प्रतिसटा के बडायते रहु आय आवरी खुबे आशीष देते रहू आय।बेशक, दाऊद ना जानते रहू आय कि महापरू ए गोटक के केबे पूरा करसी। ए बेरा हामी जानू कि इस्रायली मन के गोटक खुबे बेरा तक, लगभग 1, 000 बोरस तक जिसु महापरू आयबा ने टाक के पोड़सी।

दाउद कतक बोरस तक न्यायपूर्वक खुदर लोक मन थाने शासन करला। हाय बड़े निष्ठा ले महापरू र गोट के मान ला आवरी महापरू हाके आशीषित करला। हालाकि, खुदर जीवन र सरा सरी ने हाय महापरू र विरुद ने भयानक पाप करला।

गोटक दिन दाउद खुदर महेल र भरे दकला आवरी गोटक सुन्दर बायले के पानी धोयते दकला। हाय हाके ना जानते रेला, मातर हाके पता करला कि हातार नाम बेतशेबा रेला।

खुदर आंख के फेर बार बजाय, दाऊद हाके खुदर लगे आनबा काचे कोकि पोटायला। हाय हातार संगे सोयला आवरी हाके आपस घरे पोटायला। खिनिक बेरा पाचे बतशेबा ये बोली करी दाउद लगे संदेस पोटायला कि हाय पेटे आचे।

बतशेबा र मुनुक ऊरिय्याह नामर गोटक माने रेला। दाउद र अच्छा सैनिकमन थान ले गोटक रेला। ए बेरा हाय युद्ध करबा काचे बाहरे जाई रहू आय। दाउद ऊरिय्याह के युद्ध ले आपस हाग देई करी हाके खुदर बायले संगे रेबा काचे बोलला। मातर दूसरा सैनिक मन युद्ध ने रेलाय ऐई काचे ऊरिय्याह घरे जीबा काचे नाई बोलला। दाउद ऊरिय्याह के आपिस युद्ध ने पोटायला आवरी सेनापति ले हाके असन जगह ने सोंगायलाय जोन थाने दुशमन सबुले ताकत बार होत ताकि हाय मोरी जाओ। तेबे असन होयला कि ऊरिय्याह युद्ध ने मोरि गला।

ऊरिय्याह युद्ध ने मोरलार पाचे दाउद बतशेबा ले विवाह करला। पाचे, हाय दाउद र बेटा के जनम देला। दाउद जोन करला हातार ले महापरू खुबे रिसा रेला, ऐई काचे हाय नातान भविषवक्ता दाउद के ए सांगबा काचे पोटायला कि तार पाप कतक घिन घिना रेला। दाउद खुदर पाप र पश्ताप करला आवरी महापरू हाके माफ़ करी देला। खुदर सरा सरी जीवन दाय, खुदर कटिन बेरा बी दाउद महापरू पीटी –पिटी हिडला आवरी हातार गोट के मानला।

मातर दाउद र पीला मोरी जाऊ आय। ए रीती ले महापरू दाउद के दंड देला। एतार अलावा, दाउद र मोरबा तक, हातार खुदर घरोर लोक मन हातार विरुद्ध लड़ाई करलाय, आवरी दाउद र खुदर शक्ति कम होई जाई रेला। मातर महापरू विस्वास योग्य रेला आवरी एबे बी हाय अनती करला जोन हाय दाउद के करबा किरिया करी रेला कि हायकरसी, भले ही दाउद हातार गोट ना मानला। पाचे दाउद आवरी बतशेबा दुसर बेटा जनम होयला, अवरी हायमन हातार नाम सुलैमान सोंगाय लाय।