18. जोन बाटा गला राज्य

दाउद राजा चालीस बोरस तक शासन करला। तेबे हाय मोरी गला, आवरी हातार बेटा सुलैमान इस्रायल थाने शासन करबा शुरू करी देला। महापरू सुलैमान ले गोटायला आवरी हाके पोचारला कि हाय सबुले खुबे काय चाऊआस कि महापरू हातार काचे करो। सुलैमान महापरू ले मागला कि हाय ताके बुद्धिमान बनाय देओ करी। ऐ गोट महापरू के खुश करला, ऐई काचे महापरू सुलैमान के संसार र सबु ले बुद्धिमान माने बनाय देला। सुलैमान खुबे गोट के सिकला आवरी हाय गोटक बुद्धिमान शासक रेला। महापरू हाके खुबे धनवान बनाय देई रेला।

यरूशलेम ने सुलैमान हाय मंदिर के बनायला जाके हातार बाबा सोची रेला आवरी सामान के कूड़ा करला। अबर लोक मिलाप बीती बड़ी र बजाय मंदिर ने महापरू र आराधना करबार आय आवरी हातार काचे बलि चड़ाउआत। महापरू आई करी मंदिर ने रेबार आय, आवरी हाय खुदर लोक संगे रेबार आय

मातर सुलैमान दुसर देश बायले मन ले मोया करला। हाय खुबे ले, लगभग 1,000 बायले मन ले बिया करी महापरू र गोट ना मानला!ऐई थानले खुबे बायले दुसर देश ले आई रेलाय आवरी खुदर संगे खुदर देबता मन के आनी रेलाय आवरी तिकर उपवास करबा जारी सोंगय लाय। जड़ दाय सुलैमान डोकरा होयला तेबे हाय बी तिकर देवता मन र उपवास करला।

ऐई कारन महापरू सुलैमान ले रिसा रेला। हाय बोल कि हाय इस्रायल देश के दुय राज्यमन ने बाटी देवा काचे हाके दंड देयसी। हाय सुलैमान र मोरलार पाचे असन करसी।

सुलैमान र मोरलार पाचे रहबाम राजा बनला। इस्रायल देश र सबु लोक हाके खुदर राजा रुप ने अपनायबा काचे गोटक संगे कूड़ा होयलाय। हायमन रहबाम ले निदा करलाय सुलैमान र तीके खुबे कठिन बुता कराय रेला आवरी खुबे टेक्स धरी रेला। हायमन रहबाम ले बिनती करलाय कि हायमन ले दितिक बुता कराओ।

मातर रहबाम तीके बड़े ही मुरुकता ले बोलला, ”तोमी बोलबा आस कि मोर बाबा सुलैमान तोमके कठिन बुता करायला। मातर मुय तोमके हातार ले बी खुबे कठिन बुता करायबी, आवरी मुय तोमके खुबे दुखित करबी।”

जेबे लोक असन बोलते सुनलाय तेबे हयथान ले कतक ने हातार विरुद्ध करलाय। दस गोत्र मन बी हाके छाड़ी देलाय ;हातार संगे अबर बस दुय गोत्र ही बाच लाय। ऐई दुय गोत्र मन खुद के यहूदा र राज्य बोलाय।

बाकि दस गोत्र मन यारोबाम नाम र माने के खुदर राजा बनायलाय। ए गोत्र देश र उत्तर –पूर्वी बभाग ने रेलाय। हायमन खुद के इस्रायल र राजा बोलाय।

मतार यारोबाम महापरू र विरुद्ध दंगा करलाय आवरी लोक मन पाप करबायला। हाय खुदर लोकमन र द्वारा उपासना करबा काचे दुयटा मूर्ति मन के बनायला। हाय मन अबर यहूदा र राज्य ने यरूशलेम ने महापरू र मंदिर ने हातार आराधना करबा काचे ना गला।

यहूदा आवरी इस्रायल राज्य दुश्मन बनी गलाय आवरी हरमेसा गोटक दुसर र विरुद्ध लड्बार आय।

इस्राएल र नुआ राज्य ने, सबु राजा पापी रेलाय। ऐई थानले कतक राजा तिकर जगह ने राजा बनबा र चायते रहू आत दुसर इस्रायलि मन र द्वारा मारा गलाय।

इस्रायल राज्य र सबु राजामन आवरी खुबे लोक मन मूर्ति मन र उपासना करलाय। जाड़ दाय हायमन असन करलाय, तेबे हाय मन हरमेशा वेश्या मन संगे सोयलाय आवरी एती तक कि कतक बार मूर्तिमन र छोमे पीला मन के बलि बी करलाय।

यहूदा राज्य र राजा, दाउद र वंशज रेलाय। ऐई राजा मन ले कतक भोल माने रेलाय जोनमन न्याय पुर्बक शासन करलाय आवरी महापरू र आराधना करलाय। मातर यहूदा र खुबे राजा पापी रेलाय। हायमन नीच जसन शासन करलाय, आवरी मूर्ति मनर उपासना करलाय। एती ले कि येतिले कतक राजा मन झूटा देबता मन र छोमे खुदर पीला मन के बलि करी दलाय। यहूदा र खुबे लोकमन बी महापरू र विरुद्ध दंगा करलाय आवरी दुसर देबता मन र उपासना करलाय।