19. आगमजानि

महापरू हरमेसा इस्रायली मन लगे भविष्यवक्ता मन के पोटायते रेला। भविष्यवक्ता महापरू ले संदेस के सुनबार आय आवरी फिरले हाके लोक के सांगते रेलाय।

जेबे अहाब इस्रायल राज्य राजा रेला तेबे हाय बेरा एलिय्याह भविष्यवक्ता रेला। अहाब गोटक घिन घिना माने रेला। हाय झुटा बाल देवता र उपासना करबा काचे लोक के मजबूर करला। ऐई काचे अलिय्याह अहाब ले बोलला कि महापरू हाय लोक मन के दंडित करके जायसी आचे। हाय हाके बोलला, ”जड़ दाय मुय बोरसा होयबा काचे ना बोली तेबे तक इस्रायल राज्य ने बोरसा ना होयसी आवरी ना ओस घसरसी।”ऐ गोट ने अहाब अतक रिसा करी देला कि हाय एलिय्याह के मारी देबा फेसला धरला।

ऐई काचे महापरू ने एलिय्याह ले बोलला कि हाय झारे जाई करी अहाब लुकी जाओ। एलिय्याह झारे हाय सोता लगे गला जोन थाने जीबा काचे महापरू हाके सांगी रेला। रोजे सकारे आवरी रोजे संजे, छेड़े एलिय्याह काचे रोटी आवरी माउस धरी करी आनबार आय। ऐई सबु बेरा, अहाब आवरी हातार सेना एलिय्याह के डगरते रेलाय, मातर हायमन हाके डगर के ना सकलाय।

बोरसा ना होयला खिनिक बेरा पाचे हाय सोता सुखी गला। ऐई काचे एलिय्याह लगर गोटक देश ने जायते गला। हाय देश ने गोटक गरीब विधवा रेला जार गोटक बेटा रेला। तिकर लगे अन सरी रेला काय काचे हायती फसल ना होई रेला। मातर फिर बी, हाय बायले एलिय्याह र देक रेक करला, ऐई काचे महापरू हातार आवरी हातार बेटा र आवश्कता मन के पूरा करला, ऐई कारन हातर आटा र बर्तन आवरी हातार तेलर कुप्पी केबी खाली ना होयला। हाय पूरा अकाल र दोरान तिकर लगे अन रेला। एलिय्याह किनीक बोरस तक हायती रेला।

सड़े तीन बोरस र पाचे, महापरू एलिय्याहके बोलला कि हाय फिर ले बोरसा करसी। हाय एलिय्याह ले आपिस इस्रायल र राज्य ने जाई करी अहाब ले गोटाय बा काचे बोलला। ऐई काचे एलिय्याह अहाब लगे गला। जड़ दाय अहाब दकला तेबे हाय बोलला, ”अच्छा तुय आस, मुसीबत जन्मायबा बीता!”एलिय्याह जबाब देला, ”मुसीबत जन्मायबा बीता तुय आस!तुय यहोवा के त्याग देलीस। हाई सच्चा महापरू आय, मातर तु बाल र उपासना करबी आस। अबर तोके इस्रायल राज्य र सबु के कर्मेल पोरबत थाने धरी आन।”

ऐई काचे सबु लोक कर्मेल पोरबत ने गलाय। हाय माने मन बिआयी रेलाय जोन बाल र संदेस के बोलते रेलाय। ये बाल र भविष्यवक्ता रेलाय। हाय सबु 450 रेलाय। एलिय्याह लोक ले बोलला, ”कब तक तोमी खुदर मन के फिरा करी सोंगा? अगर यहोवा महापरू आय तेबे हातार आराधना करा!अगर बाल महापरू आय तो हातार उपासना करा!”

तेबे एलिय्याह बाल र भविष्यवक्ता मन ले बोलला, ”गोटक बोयला के बलि करी हातार माउस के बलिदान होयबा काचे वेदी थाने सोंगा, मातर जोय ना लगा। हातार पाचे मुय बी असनि करबी, आवरी गोटक अलगा वेदी थाने मुय हाय माउस के सोंगायबी। तेबे अगर महापरू देवी थाने जोय घसरसी तेबे तोमि लोक जाना कि हाय सच्चा महापरू आय।”तेबे बाल र भविष्यवक्त मन गोटक बलि तियार करलाय मातर जोय ना घसरला।

तेबे बाल र भविष्यवक्ता मन बाल ले पारतना करलाय, ”ये बाल, हामर सुन!”पूरा दिन पारतना करलाय आवरी किरकिरलाय आवरी येती तक कि खुद के कडरी ले काट लाय, मातर बाल जबाब ना देला, आवरी हाय कोनी जोय ना घसरायला।

बाल र भविष्यवक्ता मन बाल ले पारताना करबा ने लगभग पूरा दिन बिताय देलाय। आकरी मनर हाय मन पारतना करबा बोंद करी देला। तेबे एलिय्याह दुसर बोयला माउस के महापरू र वेदी थाने सोंगायला। हातार पाचे, हाय लोक मन ले पानी र बड़े बर्तन मन के हाय बलिदान थाने अबर तक रोकाय के बोलला जाड दाय माउस, दारू आवरी एती ले कि वेदी आसपास र भुई पूरा भीजी ना गला।

तेबे एलिय्याह बी पारतना करला, ”है यहोवा, अब्राहम, इसहाक, आवरी याकूब का महापरू, हामके दकाव कि तुय इस्राएल र महापरू आस आवरी एटा कि मुय तोर दास आय। मोके जबाब देस जार ले ये लोक जानी जिबाय कि तुय सच्चा महापरू आस।”

जपके ही, बादरी ले जोय घसरला आवरी हाय माउस, दारूमन,चट्टान, माटी, आवरी एटा तक कि वेदी आस पास र पानी के बी जलाय देला। जड़ दाय लोक मन ये दकलाय, हायमन भुई थाने घसरलाय आवरी बोललाय, ”यहोवा हि महापरू आय!यहोवा ही महापरू आय!”

तेबे एलिय्याह बोलला, ”बाल र गोटक बी भविष्यवक्ता बाची करी ना जायके सकोत!”ऐई काचे लोकमन बाल र भविष्यवक्ता मन के धरी लाय आवरी तीके हायती ले अलग आनलाय आवरी तिकर मोरी देलाय।

तेबे एलिय्याह अहाब राजा ले बोलला, ”जपके ही खुदर घर के पाराय जा, काय काचे बोरसा होयु आय बे।”जपके हि बादरी घना होई गला, आवरी खुबे बोरसा शुरू होयला। यहोवा हाय सुखा के सराय देला। ये ले परकत होयला कि यहोवा ही सच्चा महापरू आय।

जेबे एलिय्याह खुदर बुता के सराय देला, तेबे महापरू एलिशा नामर गोटक माने के खुदर भविष्यवक्ता होयबा काचे चुन ला। महापरू एलिशा र माध्यम ले खुबे चमत्कार करला। गोटक चमत्कार नामान संगे होयला। हाय गोटक दुश्मन र सेना र सरदार रेला, मातर हाके चामड़ी र घिन गिना रोग होई रेला। नामान एलिशा र बारे ने सुनि रेला, ऐई काचे हाय एलिशा लगे आयला आवरी हाके हाय ठीक करबा काचे विनती करला। एलिशा नामान ले बोलला ई जाई करी यरदन नदी र पानी ने सात बार डूपकी लगाव।

नमान रिसा होयला। हाय असन करबा काचे नाइ बोलला, काय काचे ये हाके मुरकता जसन लागबार आय। मातर पाचे हाय खुदर मन के बदली देला आवरी जाई करी यरदन नदी र पानी ए सात बार लगायला। जड़ दाय जेबे सरा सरी हाय पानी ले बाहरे निकरला तेबे महापरू हाके ठीक करी देला।

महापरू इस्रायल लोक मनलगे दुसर खुबे ले भविष्यवक्ता मनपोटायला। हाय सबु लोक मन ले मूर्ति मन र उपासना करबा काचे बंद करी देबा काचे बोलला। एतार बजाय, तीके गोटक दुसर संगे न्याय पुर्बक व्यहार करबार आय आवरी गोटक दुसर थाने दया कारबार आय।हाय लोक मन भविष्यवक्ता के चेतावनी देलाय कि तिकर घिन गिना बुता मन के करबा बंद करी देबार आय आवरी एतार बजाय महापरू गोटमन के पालन करबार आय। अगर हाय लोकमन असन ना करले तेबे महापरू तीके दोषी मानी करी तकर न्याय करसी, आवरी तीके दंड देयसी।

खुबेय बेरा, हाय लोकमन महापरू आज्ञा के ना मानलाय। हरमेसा हायमन भविष्यवक्ता मन सगे बुरा करलाय आवरी ऐती तक कि केबे –केबे तीके मारी देलाय। गोटक बार, हायमन यिर्मयाह भविष्यवक्ता के सुकला चूंआ ने डाली देलाय आवरी हाके हायती मोरबा काचे छाडी देलाय। हाय चूंआ र तले चिकल ने धसी गला। मातर तेबे राजा के हातार उपरे दया आयला आवरी हाय खुदर सैनिक मन के आदेश देला कि यिर्मयाह के मोरबार पोयले हाके चूंआ ले बाहरे खीचा।

भविष्यवक्ता मन महापरू बाटले बोलबार जारी सोंगाय लाय भले लोकमन तिकर ले नफरत करलाय। हायमन लोक मन के चेतावनी देलाय कि अगर हायमन पश्चताप ना करले तेबे महापरू तीके नास करी देयसी। हायमन लोक मन के ऐ बी सुरता करायला कि महापरू तिकर लगे जिसु महापरू के पोटायबार किरिया करी करला आचे।