23. जिसु र जनम

युसूफ नामर धर्मी माने संगे मरियम कि मगनी होई रेला। जेबे हाय सुनला कि मरियम पेटे आचे करी तेबे हाय जानते रेला कि हाय हातार पीला नुआय करी। मातर, हाय मरियम के बदनाम करबार ना चायते रहूआय, ऐई काचे हाय हातार थाने कृपा करबार आवरी हाके चुपचाप तलाक देबार सोचला। मातर एतार ले पोयले हाय असन करता, गोटक सरगदूत हातार सोपना ने आई करी हातार ले गोटायलाय।

हाय सरगदूत बोलला, ”हे युसूफ, मरियम के अपनार बायले रुप ने आनबा काचे ना डर। हातार भीतरे जोन पीला आचे हाय पवित्र आत्मा बाटले आय। हाय गोटक पीला के जनम देयसी। हातार नाम जिसु सोंगा (जार अर्थ आय, यहोवा बाचाउ आय ‘)कायकाचे हाय लोक मन के तिकर पाप मन ले बचायसी।”

अगर युसूफ मरियम ले बिया करला आवरी हाके अपनार बायले रुप ने घरे आनला, मातर हातार पीला के जनम देबा तक हाय हातार संगे ना सोयला

जेबे मरियम र जनम देबा बेरा खेटी रेला, तेबे हाय आवरी युसूफ बैतलहम जीबार गोटक लम्बा यात्रा करलाय। तीके हायती जीबार ही रेला कायकाचे रोमी अधिकारी इस्रायल ने रेबासबु लोक मन के गिनती करबा चायते रयूआत। हाय मन चायते रहूआत कि सबु हायती जाऊ जोन थाने तिकर पूर्वज रेबार आय। राजा दाउद र जनम बैतलहम ने होई रेला, आवरी हाय मरियम आवरी युसूफ दुनो र पूर्वज रेला।

मरियम आवरी युसूफ बैतलहम गलाय, मातर हायती गोरु सोंगायबा जगह र अलावा तिकर ठेबा काचे कोनी थाने जगह ना रेला। हाई जगह रेला जोनतीमरियम अपनार पीला के जनम देला। हाय हाके चरनी ने सुआय देला काय काचे हायती हातार काचे काई ओचना ना रेला। हायमन हातार नाम जिसु सोंगायलाय।

हाय राती, हायती लगर कि खेत न्र खिनिक धोरी अपनार मेंडा र झुंड र रखा करते रेलाय। अचानक ले, गोटक चमकदार सरगदूत तिकर उपरे परकट होयलाय, आवरी हाय मन डरी गलाय।हाय सरगदूत बोललाय, ”ना डरा, काय काचे मोर लगे तोमर काचे शुभ संदेस आचे। बैतलहम ने जिसु महापरू, स्वामी र जनम होयला आचे!”

जाई करी हाय पिला के डगरा, आवरी तोमी हाके फोटी ने लपेटला होयला आवरी चरनी ने सोला पायबास।”अचानक ले, आकाश सरगदुत भरी गलाय। हाय मन महापरू स्तितु करते रहूआत। हायमन बोलुआत, ”सबु महिमा सरग र विराजमन महापरू के मिलो। पृथ्वी थाने हाय लोकमन ने शांति हो जार चिंता करुआय!”

तेबे सरगदूत जायते गलाय। हाय धोरी मन अपनार मेंडा मन के छाड़ी करी हाय पीला के दके जाई रेलाय। जपके ही हाय जगह ने खेटलाय जोन थाने जिसु रेला आवरी हाके चरनी ने सोयला पायलाय, जसन हाय सरगदूत बोली रेला। हायमन खुबे हरिक रेलाय। तेबे हाय धोरी आपस हायती लेउटी गलाय जोन थाने तिकर मेंडामन रेला। हाय मन जोन बले सुनलाय आवरी दकलाय हाय सबु काचे हायमन महापरू र स्तुति करते रहूआत।

पूरब ले दूर देश ने किनीक माने रेलाय। हाय मन तरार अध्ययन करि रेलाय आवरी हाय मन खुबे बुद्धिमान रेलाय। हायमन गोटक असामन्य तरार के के आकाश ने दकलाय। हायमन बोल लाय एतार अर्थ आय कि यहूदी मन र नुआ राजा र जनम होयला। ऐई काचे हाय पीला के दकबा काचे अपनार देश ले यात्रा करबार निर्णय करलाय। गोटक लम्बा यात्रा पाचे, हाय बैतलहम आयलाय आवरी हाय घर के पायलाय जोन थाने जिसु आवरी हातार माता –पिता ठेबी रेलाय।

जेबे ऐ मानेमन जिसु के अपनार माँ संगे दकलाय तेबे हायमन घुटना देकी करी आराधना करलाय। हाय मन जिसु के कीमती उपहार देलाय। फिर ले हाय मन घरे आपस लेउटी गलाय।