26. जिसु अपनार सेवा शुरू करुआय

शैतान र परीक्षा मन के नुई बोललार पाचे, जिसु आपिस गलील जगह ने आययला। ऐई हाय जगह आय जोन थाने हाय रेबार आय। पवित्र आत्मा हाके खुबे सामर्थ देयते रेलाय आवरी जिसु गोटक जगह ले दुसर जगह ने गला आवरी लोक मन के शीक्षा देला। सबु हातार बारे ने अच्छा गोटायलाय।

जिसु नासरत नगर ने गला। ऐ हाई गांव आय जोन थाने हाय अपनार बालकपन ने रेबार आय। सब्त र दिन, हाय आराधना करबा जगह गला। अगुवा मन हाके यशायाह भविष्यवक्ता र सन्देश र गोटक पुस्तक देला। हाय मन चायते रेला कि हाय हातथान ले पड़ो। अगर जिसु हाय पुस्तक के खोली करी हातार गोटक भाग के लोक मन काचे पड़ ला।

जिसु पड़ ला, ”महापरू अपनार आत्मा देला आचे ताकि मोय कंगाल मन के सुसमाचार प्रचार कर सको करी। हाय मोके एई काचे पोटायला आचे कैदी मन के आजाद करू, काना के फिल ले आँख देउ करी, आवरी तीके छुटकारा देउ जाके दुसर लोक कुचलते रेलाय। ये हाय बेरा आय जेबे महापरू हामी थाने कृपालु होयसी आवरी सहायता करसी।”

फिर ले जिसु बोसला। सबु लोक हाके बड़े ध्यान ले दकते रेयत। हाय मन जुआन रेलाय कि पवित्रशास्त्र र जोन भाग हाय एबे पड़ी रेला हाय जिसु महापरू र बारे ने रेला। जिसु बोलला, ”जोन गोट एबे तोमर काचे पोड़ला, हाय ये बेरा घटित होयते रेला।”सबु लोक बोकवा रेलाय। हायमन बोलाय, ”काय ए युसूफ र बेटा नुआय आय? ”

तेबे जिसु बोलला, ”ए सच आय कि लोक कोनी असन भविष्यवक्ता के केबी ना अपनाउआय जोन नगर ने पली –बड़ी रओ। एलिय्याह भविष्यवक्ता र बेरा, इस्रायल ने खुबे विधवा रेलाय। मातर जेबे साड़े तीन बोरस तक बोरसा ना होला तो महापरू एलियाह के इस्रायल कोनी विधवा करबा काचे ना पोटायला। एतार बजाय, हाय एलिय्याह के कोनी अन्य देश र विधवा लगे पोटायला।”

जिसु बोलबार जारी सोंगायला, ”आवरी एलिशा भविष्यवक्ता र बेरा ने, इस्रायल ने चामड़ी रोग ले पीड़ित रेलाय। मातर एलिशा ने हाय थान ले कोनी के बले चंगा ना करला। हाय एकला इस्रायल र दुश्मन सेनापति नामान के चंगा करला।”मातर जोन लोक जिसु के सुनते रेलाय हायमन यहूदी रेलाय। एयिकाचे जेबे हायमन हाके ये बोलते सुनलाय तेबे हेमन हाके रिसा होयलाय।

नासरत र लोक मन जिसु के धरलाय आवरी हाके आराधना र जगह ले जिकते बाहारे नेलाय। हायमन हाके मारी देबा काचे तले पोकायबा काचे गोटक चट्टान रसिरा थाने नेलाय। मातर जिसु भीड़ थान ले निकरला आवरी नासरत नगर के छाड़ी जायते गला।

फाचे जिसु सबु गालील क्षेत्र ने गला, आवरी बड़े भोड़ हातार लगे गला। हायमन असन खुबे लोकमन धरी आयलाय जो बीमार आवरी विकलांग रेलाय। हायती ले किनीक दक के, हिंडके, सुन के या बोलके ना सोकबार आय, आवरी जिसु तीके चंगा करला।

एतार अलावा, खुबे असन लोक जिसु लगे आयलाय जोन थाने दुष्टात्मा मन रेला। जिसु दुष्टात्मा मन के हायथान ले निकर जीबा काचे आदेश देला। हाय दुष्टात्मा अक्सर किरकिर ला, ”तुय महापरू बेटा आस!”भीड़ र लोक चकित रेलाय, आवरी हायमन महापरू र स्तुति करलाय।

फिर ले जिसु बारा माने के चुनला जाके हाय अपना प्रेरित बोलला। हाय प्रेरित मन हातार संगे यात्रा करलाय आवरी हातार ले शिक्षा पायला।