28. सौकार जुआन माने

गोटोक दिने, गोटक सौकार जुआन शासक जिसु लगे आसी ताके पोचारला, “ए बड़े गुरु, अनंत जीबन पाएबा काचे मोके काए करके पड़सी? ” जिसु ताके बोल्ला, “तुइ मोके ‘बड़े’ काए काचे बोलूआस? सिरीप गोटोक आका बड़े आचे आउरी हाए महापरू आए। मातर अगर तुइ अनंत जीबन पाएबार चाएंबिस तेबे महापरूर व्यवस्ता के मान।”

“मोके कोन-कोन आज्ञा मोनके मानबार जरूरी आए? ” हाए पोचारला। जिसु जवाप देला, “हत्या ना कर। बेबिचार ना कर। चोरी ना कर। झूठ ना बोल। निजार बाबा आओरी माँ र इज्जत कर, आओरी निजार आली पालीर लोक संगे सोमान प्रेम कर।”

मातर हाए जुआन माने बोल्ला, “मुई निजार सान दाएले ई सोबू आज्ञा मनके मानबी आची। मोके सबू दाए काचे जीउ रेबा काचे आओरी काए करके पड़सी? ” जिसु ताके दकला आओरी ताके प्रेम करला।

जिसु जवाप देला, “जोदि तुइ अच्छा होएबार चाएबिस तेबे जाइकरी निजार सोबुके बिकीदेस आओरी हाए धन गरीब लोकमन आने बांटी देस, आओरी टोके सरग आने धन मिलसी। आओरी आसिकरी मोर पिटी-पिटी आओ।”

जोनटा जिसु बोल्ला जेबे हाए जुआन माने सुनला तेबे हाए बहुत मुरमुरा होई गला, काएकाचे की हाए खुबे सौकार रेला आओरी हाए निजार सोबू धन संपाति के देबार ना चाएंते रेला। हाए मुड़ी करी जिसु लगले ऊटी गला।

तेबे जिसु निजर चेला मनके बोल्ला, “महापरूर राज आने सौकार मोनोर ओलबाटा भारी मुश्किल आए! हाँ, गोटोक सौकार मानेर महापरूर राज आने ओलबार पालटा कोनी उंटर सूजी के नाक बाटले होइकरी निकरी जिबाटा आसान आए।”

जेबे जिसु बोल्ला आओरी चेलामन सुनलाए तेबे हाए सोबू चौंकि गलाए। हाएमन बोल्लाए, “जोदि असनी आए तेबे महापरू काके बाचाएसी? ”

जिसु चेलामनके दकला आओरी बोल्ला, “लोकमन काचे निजर उद्धार करबाटा संभव नुआए। मातर महापरू काचे काई बी करबाटा असंभव नुआए।”

पतरस जिसु के बोल्ला, “हामी चेला निजर सोबू के छाड़ी करी तोर पिटी-पिटी आएलू। तेबे हामर पुरस्कार काए मिलसी? ”

जिसु जवाप देला, “सोबू गोटोक लोक जोन मोन मोर लागि घर, भाई, भइनी, बाबा, माँ, पीला टोकी, नोएले धन संपाति के छड़लाए, हाए ताके 100 गुना अनगर पाएसी आओरी अनंत जीवन के बी पाएसी। मातर बहुत लोक जोन आकतु आचेत हाए पिटी बाटे होएबाए, आओरी बहुत लोक जोन पिटी बाटे आचेत छोमे होएबाए।”