29. निर्दयी कोमीयार काआनी

गोटोक दिने, पतरस जिसु के पोचारला, “ए गुरु, मोके निजार भाई के केतक हार खेमा देले ठीक आए जेड़दाय हाए मोर विरुद्ध पाप करूआए? सात हार कारले होएसी? ” जिसु बोलला, “सात हार नाई, मातर सात ले सत्तर हार!” एतार दुआरा, जिसुर मतलब आए की हामके सोबुदाए खेमा करबार ठीक आए। पाचे जिसु गोटोक काआनी सांगला।

जिसु बोल्ला, “महापरूर राज गोटोक राजा पारा आए जोन निजार दास ले हिसाब नेबार चाएते रेला। तार गोटोक कोमीया 2,00,000 बोरोसोर कोमीयाकामर गोटोक बड़े लागार करजदार रेला।”

मातर हाए कोमीया निजर लागा के ना देके पारला, तेबे राजा बोल्ला, “एतार लागा छुट्बा काचे ए माने के आओरी एतार परिवार के कोमीया मोनोर हिसाबे बिकी दियास।”

“हाए कोमीय राजार लगे मांडीखूटा दी घरसर्ला, ‘ किरपा करी मोर संगे जाग, आओरी मुई निजर पूरा लागार पैसा के दी देबी। ’ राजा कोमीया के जीउ दुकला, हाएकाचे हाए तार सोबू लागा के छाड़ी देला आओरी ताके जाएके देला।”

“मातर जड़कदाय हाए कोमीया राजा लेगले बाआरे गला, तेबे ताके तार गोटोक संगर कोमीया मिल्ला जोन तार चार मासर कोमीयाकामर लागा लागि रेला। हाए कोमीया निजर संगर कोमीया के धरला आओरी बोल्ला, ‘जोंटा तोर उपरे मोर लागा आचे मोके छूटी देस!”

“हाए संगर कोमीया मांडीखूटा आने घसरी करी बोल्ला, ‘दया करी मोर काचे जाग, आओरी मुई निजर लागार पैसार पूरा छूटी देबी। ’ मातर तार पालटा, हाए कोमीया निजर संगर कोमीया के जईल आने सोंगाए देला जेबे तक की हाए हाए लागा के ना छूटी दिए।”

“जोन सोबू होई रेला केतक दूसरा कोमीयामन दकलाए आओरी बहुत परिसान होएलाए। हाएमन राका लगे गलाए आओरी ताके सोबू सांगलाए।”

“राजा हाए कोमीया डाकी करी बोल्ला, ‘ए बदमास कोमीया! मुई तोर लागा के ई काचे चाड़ी रेली जे तुइ मोके बिनती करी रेलिस। तोके बी असनी करबार रेला। ‘ राजा एतक रिशा रेला कि हाए बदमास कोमीया के जईल आने सोंगाए देला जेबे तक कि हाए निजर सोबू लागा के ना लेओटाए देसी।

तेबे जिसु बोलला, “मोर सरग आने रेला बाबा तोमोर सोबू संगे असनी करसी जोदि तोमी निजर भाई के मनले खेमा ना करास।”