30. जिसु पाँच हजार लोकमन के खुआउआए

जिसु निजर प्रेरित मोनके परचार करबा आओरी लोकमन के सिख्या देबा काचे बहुत दूसरा-दूसरा गाँव आने पोटाएला। जेबे हाएमन लेओटलाए जोन लगे जिसु रेला टेबे हाएमन सांगलाए की हाएमन काए करी रेलाए। तेबे जिसु हाएमनके झीलर दूसरा बाटे तार संगे गोटोक शांति जागा आने जाइकरी खिंडिक समय बिसायबा काचे डाकला। आओरी हाएमन गोटोक डोंगा आने चेगलाए आओरी झीलर दूसरा बाटे ऊटी गलाए।

मातर हाएती बहुत असन लोकमन रेलाए जोन जिसु आओरी तार चेला मन के जिबाटा दकी रेलाए। ए लोकमन हाएमन ले आकतु झीलर दूसरा बाटे जिबा काचे झीलर छेदे-छेदे पोलाएलाए। आओरी जेबे जिसु आओरी चेलामन खेटलाए तो लोकमनर गोटोक बड़े भीड़ हाएमन के जागीकरी हाएथाने आकतु ले रेलाए।

हाए भीड़ आने बाएले आओरी पीला टोकी मोनके बिना हिसाब करी 5,000 ले अदिक मुनुस लोक रेलाए। जिसु हाए लोकमनर उपरे जीउ दुकला। जिसु काचे हाए लोक बिना धरीर मेंडि मनर पारा रेलाए। ई काचे हाए हाएमनके सिख्या देला आओरी हाएमन संगे जोन लोक बीमार रेलाए हाएमन के अच्छा करला।

दिनर सोंज दाए, चेलामन जिसु के बोल्लाए, “एबे बेल होएला आओरी आली पालि कोनी गाओं निआए। ए लोकमन के जा बोल ताकि हाएमन जाइकरी काई हो खाओत।”

मातर जिसु चेलामनके बोल्ला, “तोमी हाएमनके खाएबा काचे काई दियास!” हाएमन जवाप डेलाए, “हामी असन कसन करके पारबू? हामर लगे खाली पाँचटा रोटी आओरी दुईटा माच आचे।”

जिसु निजर चेलामनके बोल्ला की हाएमन भीड़ आनर लोकमन के घाँस आने पचास-पचास लोक हिसाबे झुंड बनाए बोसबा काचे बोला।

तेबे जिसु पांचटा रोटी आओरी दुइटा माच के धारी सरग बाटे दकला, आओरी हाए भोजन काचे महापरू के धन्यवाद देला।

पाचे जिसु रोटी आओरी माचे मन के तुकड़ा-तुकड़ा टूटाएला। हाए लोकमनके देबा काचे चेलामनके हाए तुकड़ामन देला। चेलामन हाए भोजन के देते रेलाए, आओरी हाए भोजन केबे ना सरला! हाए सोबूलोक खाइकरी अच्छा होएलाए।

तार पाचे, चेलामन हाए भोजन के रुंडाएलाए जोंटा के ना खाई रेलाए आओरी हाएटा बारा टा टोकरी के भोरबा काचे बराबर रेला! हाए सोबू भोजन हाए पांचटा रोटी आओरी दुइटा माच ले आसी रेला।