31. जिसु पानी उपरे हिंडूआए

पाँच हजार लोकमन के खुआएबार पाचे, जिसु निजर चेलामनके डोंगाए जिबा काचे बोल्ला। हाए हाएमनके झीलर दूसरा बाटे जिबा काचे बोल्ला जेबेकि हाए छनक काचे हाई लगे थेबला। आओरी चेलामन गलाए आओरी जिसु भीड़ लोक के पोटाएला कि हाएमन घरे जाओत। तार पाचे, जिसु पार्थना करबा काचे गोटोक पोरबोत आने गला। हाए थाने हाए एकला रेला, आओरी हाए खुबे राति ले पार्थना करला।

हाए समय, चेलामन निजर डोंगा के चलाए-चलाए जाएते रेलाए, मातर पोबोन हाएमनर उल्टा बाटे चलते रेला। खुबे राति होएबाके बी खाली झीलर मोजि गता खेटी रेलाए।

हाए समय जिसु पार्थना कार्बाटा सराएला आओरी निजर चेलामन लगे लेओटबार चालू करला। हाए डोंगा बाटे जिबा काचे पानी उपरे हिंडके मुलाएला।

तेबे चेलामन ताके दकलाए। हाए मन डरी गलाए काएकाचे कि हाए मन सोचलाए कि हाए कोनी डुमा आए। जिसु जानीरए कि हाएमन डरला आचेत, हाएकाचे हाए हाएमन के कोलार होई बोल्ला, “ना डरा, एटा मुई आए!”

तेबे पतरस जिसु के बोल्ला, “हे मापरू, जोदि एटा तुइ आए तेबे मोके पानी आने हिंडी करी तोर लगे आएबार आदेश देस।” जिसु पतरस के बोल्ला, “आओ!”

आओरी पतरस डोंगा ले उतरला आओरी जिसु लगे जिबा काचे पानीर खंडी आने हिंडबार चालू करला। मातर खिंडिक धूर जाइकरी, आए निजार आँखी जिसु ले गुचाए देला आओरी लहर मोनके दकबार आओरी पोबोन के अनुभव करबार चालू करी देला।

तेबे पतरस डरी गला आओरी पानी आने बुड़के मुलाएला। हाए कोलार होएला, “ए मापरू, मोके बाचा!” जिसु हड़कीच दाए हाथ बढ़ाए करी ताके धरला। तेबे हाए पतरस के बोल्ला, “तोर बिसबास बहुत कम आचे! निजर सुरख्या काचे तुइ मोर आनले भोरोसा काए काचे ना करलिस?”

तेबे जिसु आओरी पतरस डोंगाए चेगलाए, आओरी तुरंत पोबोन बोएबाटा बंद होई गला। पानी ओगाए होई गला। चेला मन भोकुआ होई करी जिसुर छोमे माँड़ीखूटा देलाए। हाएमन तार आराधना करलाए आओरी ताके बोल्लाए, “सते आका तुइ महापरूर बेटा आए।”