32. जिसु भुत धरला बीता के आवरी गोटोक बीमार बाएले के सुस्ता करुआए

जिसु आओरी तार चेलामन निजार डोंगा संगे हाए जगाए गलाए जोनती गिरासेनी लोक रेबा राए। हाएमन हाए जगाए खेटी करी डोंगा ले उतरलाए।

हाए थाने गोटोक माने रेला जाके दुस्टात्मा धरी रेला।

ए माने के एतक बोकू रेला की कोनी ताके धरके ना पारते रेलाए। केतक हार लोकमन तार हाथ आओरी गोड़ आने सिकोला बी बांदलाए, मातर हाए टूटाए देबाराए।

हाए माने हाए जागार कोबोर भाटाए रेबाराए। हाए माने पूरा दिन आओरी पूरा राति कोलार होएबाराए। हाए फाटी टूटी ना पिन्द्बाराए आओरी केबे-केबे निजके पोकना मन ले मारी होएबाराए।

हाए माने पोलाए करी जिसु लगे आएला आओरी तार छोमे मांडीखूटा देला। तेबे जिसु हाए मानेर भीतरर दुस्टात्मा ले कता होएला आओरी बोल्ला, “ए माने ले बारे निकर!”

हाए दुस्टात्मा बड़े आबाज आने कोलार होएला, “ए जिसु, परम परधान महापरूर बेटा, तोर मोरले काए काम आचे? दया करी मोके ना सता!” तेबे जिसु हाए दुस्टात्मा ले पोचारला, “तोर नाओ काए आए? ” हाए जबाप देला, “मोर नाओ सेना आए, काएकाचे की हामी खुबे आचू।” (रोमोर सेना आने केतक हजार सैनिकर गोटोक समूह “सेना” रेला। )

हाए दुस्टात्मामन जिसु गुआरलाए, “दया करी ई जागा ले हामके बारे ना पोटा!” हाई पोरबोत आने बोरिया मोनोर गोटोक रासी चरते रेलाए। ई काचे हाए दुस्टात्मामन जिसु के गुआरलाए की, “दया करी हामके हाए बोरियामन उपरे पोटाएदेस!” जिसु बोल्ला, “ठीक आए, तिकर उपरे ऊटी जा!”

आओरी हाए दुस्टात्मामन हाए माने ऊपर ले निकरी करी हाए बोरियामन आने ओलिगलाए। हाए बोरियामन पोलाए करी गोटोक ठियाँ टीला आने ले झील आने डोगाएदेलाए आओरी बुड़ी मोरलाए। हाए रासी आने आली-पालि 2,000 बोरिया रेलाए।

हाएथाने हाए बोरियामनर देख रेख करबा लोक रेलाए। जोन सोबू होएला जेबे हाए माएमन दकलाए तो हाएमन गाँवभीतरे पोलाएलाए। जिसु जोनटा करीरेला हाएमन सोबुके सांगलाए। हाए गाओंर लोक निकरी आएलाए आओरी हाए माने के दकलाए जार उपरे दुस्टात्मा रेला। हाए शांति ले, फाटी टूटी पीनी करी, आओरी गोटोक सोमान लोक पारा ब्यबोहार करी-करी बोसी रेला।

हाए लोकमन बहुत डरी रेलाए आओरी हाएमन जिसु के जा बोली बोल्लाए। आओरी जिसु डोंगा उपरे चेगला। हाए माने जार उपरे दुस्टात्मामन रेलाए हाए जिसु संगे जिबा काचे बिनती करला।

मातर जिसु ताके बोल्ला, “नाई। मोर इच्छा आए की तुइ घरे जाई करी सोबुके सांग कि महापरू तोर काचे काए करलाए। हाएमनके सांग के कंता महापरू तोर उपरे दया करी रेलाए।”

ई काचे हाए माने ऊटी गला आओरी सोबू के ई बारे ने सांगला जोनटा जिसु तार काचे करी रेला। तार काआनी सुनबा सोबू गोटोक लोक भकुआ होई गलाए।

जिसु झीलर दूसरा बाते लेऊटी आएला। तार हाएती खेटबार पाचे, गोटोक बड़े भीड़ तार आली-पालि रुंडलाए आओरी ताके दबाए लागलाए। हाए भीड़ आने गोटोक बाएले रेला जोन बारा बोरोस ले लोऊ बोएबार समस्या ले पीढ़ित रेला। हाए निजर सोबू धन डाक्टोर मोनके दी रेला ताकि हाएमन ताके अच्छा करके सकोत, मातर तार रोग आओरी अदिक खराप होई जाई रेला।

हाए सुनी रेला कि जिसु केतक बीमार लोकमन के अच्छा करी रेला आओरी हाए सोचला, “मुई निश्चित आची कि जोदि मुई खाली जिसुर कपड़ा के बी छींले, तेबे बी मुई अच्छा होई जीबी!” ई काचे हाए जिसुर पिटी बाटले आएला आओरी तार कपड़ा के छींला। जसन हाए ताके छींला, लोऊ बोएबाटा बंद होई गला।

हड़किच दाए, जिसु जानला कि तार भीतरले सामर्थ निकरला आचे। ई काचे हाए पिटी बाटे उल्टी पोचारला, “मोके कोन छींला? ” चेलामन जबाप देलाए, “ए लगे केतक सारा लोकमन तोर चारो बाटे भीड़ लागाएला आचेत, आओरी तोके ठेगलबा आचेत। तेबे तुइ काएकाचे पोचरलीस कि मोके कोन छींला? ”

हाए बाएले जिसुर छोमे थरथरते आओरी डरी करी निजर माँड़ी टेकी बोसी देला। तेबे हाए ताके साँगी देला कि हाए काए करला आचे, आओरी ए बी सांगला कि हाए अच्छा होई गला आचे। जिसु ताके बोल्ला, “तोर बिसबास तोके अच्छा करला। शांति ले जा।”