33. गोटोक किसानर काआनी

गोटोक दिन, जिसु झीलर छेदर लगे रेला। हाए लोकमनर गोटोक बड़े भीड़ के सिखाएते रेला। ताके सुनबा काछे एतक सारा लोक आसी रेलाए कि जिसु लगे हाए सोबुके गोटाएबा काछे जागा ना बाचला। ई काचे हाए पानी आने ठीआ डोंगा आने चेगला। हाएथाने हाए बोसला आओरी लोकमन के सिख्या देला।

जिसु हाएमनके ए काआनी सुनाएला, “गोटोक किसान मोंजी रोपबा काचे बारे निकरला। जेड़डाय हाए हाथ संगे मोंजी मोनके बिचते रेला तो केतक बीज बाटे घसरला। मातर चेड़ेमन आसी करी हाए सोबू मोंजीमोनके खाई देलाए।”

“दूसरा मोंजी पोकना माटी आने घसरला जोनती बहुत कम माटी रेला। पोकना माटी आने घसरला मोंजी बहुत झटके आकरलाए, मातर तार चेरमन माटी भीतरे जिबा काचे ना पारलाए। जेबे बेल निकरला आओरी गरम होएला तेबे हाए बूटामन मुरजी गलाए आओरी मोरी गलाए।”

“तेबले बी दूसरा मोंजीमन लाटा बूटा आने घसरलाए। हाए मोंजीमन बाड्बार चालू करलाए, मातर काटामन हाएमनके दबाएदेलाए। ई काचे काटारेला माटी आने घसरला मोंजीमन ले निकरला बूटा मनले काई बी अनाज ना जनमाएके पारला।”

“दूसरा मोंजी अच्छा माटी आने घसरलाए। हाए मोंजी बड़े आओरी जेतक मोंजी रोपलार रेला हाएथानले 30,60, आओरी एतक ले कि 100 गुना अनाज जनमाएलाए। जोन कोनी बी महापरूर पिटी बाटे जाऊआए, हाए हाए कता आने धियान देओ जोनटा मुई सांगबी आची!”

ई काआनी चेलामन के गुपाए देला। ई काचे जिसु बुजाएला, “हाए मोंजी महापरूर वचन आए। हाए बात गोटोक आसान माने आए जोन महापरूर वचन के सुनूआए, मातर ताके ना बुजुआए। तेबे शैतान तार लेगले वचन के चोरी धरी जाऊआए। मातर शैतान ताके वचन के बुज़बाले दूर सोंगाऊ आए।”

“हाए पोकना माटी असन माने आए जोन महापरूर वचन के सुनूआए आओरी सर्दा संगे ताके गरहन करूआए। मातर जेबे मुश्किल समय असूआए, नोएले जेबे दूसरा लोकमन ताके सताऊआत, तेबे हाए महापरू ले दूर ऊटी जाऊ आए। मतलब हाए महापरू आने भोरोसा करबार बंद करी देऊआए।”

“हाए कांटा रेला माटी असन माने आए जोन महापरूर वचन के सुनूआए। मातर हाए सोबू कतार चिंता करबार चालू करी देऊआए, आओरी हाए बहुत धन कोमाएबार कोशिश करूआए, आओरी हाए बहुत चीज के पाएबार कोशिश करूआए। केतक समय पाचे, एबे हाए महापरू के प्रेम करबा आने ठीक निआए। ई काचे जोन हाए महापरूर वचन ले सिकीरेला हाए ताके महापरू के सर्दा करबाती ठीक ना रेला। हाए गेऊँर ढंगलार पारा आए जोन कोनी अनाज जनम ना करूआए।”

“मातर अच्छा माटी हाए माने आए जोन महापरूर वचन के सुनूआए, तार उपरे विश्वास करूआए, आओरी फल जनमाऊ आए।”