34. जिसु दूसरा काआनीमन के सिकाय देऊआए

जिसु महापरूर राजर बारेने आओरी बहुत काआनी सुनाएलाए। उदाहरन काछे, हाए बोल्ला, “महापरूर राज गोटोक सरसुर मोंजी पारा आए जाके कोनी निजार बेड़ाए रोपिदेला। तोमी जानास कि सरसुर मोंजी सोबू मोंजी मोनले सान रेउआए।”

“मातर जेबे सरसुर मोंजी बाड़ी जाऊआए तो हाए बगीचा आने सोबू गचमन ले सोबूले बड़े होई जाऊआए, एतक बड़े कि चेडेमन आसी करी हाए गचर देना आने आराम करूआए।”

जिसु गोटोक दूसरा काआनी सांगला, “महापरूर राज जंदरी पारा आए जोनटाके धरी गोटोक बाएले आंटार जोता आने मिसाए देऊआए टेबे हाएटा पूरा जोता आने फैली जाऊआए।”

“सरगर राज हाए खजाना पारा आए जोनटा के कोनी बेड़ाए लुकाए देलाए। कोनी दूसरा माने के हाए खजाना मिली गला आओरी हाए हाएटा के पाएबार बहुत इच्छा करला। ई काचे हाए ताके आउरी तोपी डेला। हाए सर्दा ले एतक पूरी रे कि हाए जाइकरी निजार सोबू के बिकीदेला ताकि हाए हाए बेड़ा के घेनके सकसी जोनती हाए खजाना रेला।”

“सरगर राज गोटोक बहुत मूल्यबान सुध मोती पारा आए। जेबे कोनी मोतीमोनोर बेपारी ताके मिलाऊआए टेबे हाए ताके घेनबा काचे निजार सोबू बिकी देऊआए।”

हाएथाने केतक लोक रेलाए जोन सोचते रेलाए कि महापरू हाएमनके ई काचे गरहन करसी कि हाए अच्छा काम करते रेलाए। ए मन असन लोक मनके छोटे मानबाराए जोन हाए अच्छा काम मनके ना करबाराए। ई काचे जिसु ए काआनी सांगला: “दुइटा माने रेलाए आओरी दुनों पार्थना करबा काचे मंदिर आने गलाए। हाएमन ले गोटोक मासूल धरबा लोक रेला, आओरी दूसरा गोटोक धर्मी अगुवा रेला।”

“हाए धर्मी अगुवा ई हिसाब ले पार्थना करला, ‘हे महापरू, तोर धन्यवाद हो कि मुई दूसरा लोकमन पारा, जसन कि डाकू, अन्य करबा लोक, ब्याविचार करबा लोक, आओरी एतारले बी ए थाने रेला मासूल धरबा लोकर पारा गोटोक पापी नुआए।”

“उदाहरन काचे, मुई सोबू हप्ता मुई दुई हार उपास रेउआए, आओरी मुई मोके मिसबा लोक के धन आओरी सामानर दसवाँ हिस्सा तोके देऊआए।”

“मातर हाए मासूल धरबा लोक हाए धर्मी अगुवा ले बहुत दूर ठीया होई गला। हाए उपरे सरग बाते आँखी बी ना उठाएला। तार पालटा, हाए निजर मुट्ठी ले निजर छती के मारला आओरी पार्थना करला, ‘ए महापरू, दया करी मोर उपरे दया कर कि मुई गोटोक पापी आए।”

पाचे जिसु बोल्ला, “मुई तोमके सते बोल्बिची, महापरू हाए मासूल धरबा लोकर पार्थना के सुनला आओरी ताके धर्मी बोल्ला। मातर हाए हाए धर्मी अगुवार पार्थना के मन ना करला। महापरू सोबू गोटोक घमंडी के मुंड ले तले करसी, मातर हाए सोबू हाए लोक के इज्जत देसी जोन निजके नम्र करूआए।”