35. दयालु बुआर काआनी

गोटोक दिन, हाए बहुत लोक के सिकाय देते रेला जोन टार सुनबा काचे रुंडी रेलाए। ए लोक मासूल धरबा लोक आओरी संगे दूसरा लोक बी रेलाए जोन मन मुसार ब्याबसता के मानबार पर्यास ना करी रेलाए।

केतक धर्मी अगुवा मन डकलाए कि जिसु ए लोकमन संगे गोटोक संगर लोक पारा कता होएते रेला। ई काचे हाएमन एक दूसरा के ए बोलबाटा चालू करी देलाए कि हाए गलत करते रेला। जिसु हाए मनर गोटाएबाटा सुनला, ई काचे हाए हाएमनके ए काआनी सांगला।

“गोटोक लोक रेला जार दुईटा बेटा रेलाए। सान बेटा तार बाबा के बोल्ला, ‘ए बाबा, मोके एबे मोर बाटा दरकार आए!” आओरी बाबा निजर दुनों बेटा मनर मोजिगता निजर धन संपातिर बाटा करी देला।”

“झटके आका सान बेटा निजर सोबू के रुंडाए करी दूरर देश आने ऊटी गला आओरी पापी जीबन जिंबा आने सोबू धन के बर्बाद करी देला।”

“तार पाचे, जोनती सान बेटा रेला हाए देश आने गोटोक भयंकर अकाल पड़ला, आओरी तार लगे खादी घेनबा काचे पैसा ना रेला। ई काचे ताके जोन काम मिल्ला हाए बोरियामनके चराएबाटा रेला। हाए एतक दुखी आओरी भूका रेला कि हाए बोरियामनर भोजन खाएबार चाएते रेला।”

“पाचे, हाए सान बेटा निजके बोल्ला, ‘मुई काए कार्बी आची? मोर बाबार सोबू कोमीया मन लगे खाएबा काचे खुबे आचे, होएले बी मुई ए थाने भूके मोरबी आची। मुई मोर बाबा लगे लेऊटी जीबी आओरी मोर बाबार गोटोक कोमीया बनबार काचे बिनती करबी।”

“आओरी हाए सान बेटा लेऊटी करी निजर बाबार घर बाटे जिबार चालू करला। जेबे कि हाएटा एबे बी दूर रेला, तार बाबा ताके दकला आओरी तार उपरे जीउ दुकला। हाए पोलाए करी निजर बेटा लगे गला आओरी ताके छाती ले लागाए करी चुमला।”

“हाए बेटा बोल्ला, ‘ए बाबा, मुई महापरूर आओरी तोर खिलाप पाप कर्ली आची। मुई तोर बेटा बोलाएबार लाएगर बी निआए। ’”

“मातर बाबा निजर गोटोक कोमीया के बोल्ला, ‘झटके जाई सोबूले अच्छा कपड़ा धरी आओ आओरी मोर बेटा के पिंदा! तार आंड्की आने मुँदी आओरी तार गोड़े चेपोल पिंदा। पाचे सोबूले अच्छा बाचा मारा ताकि हामी खाएबू आओरी तियार बनाएबू, कि मोर बेटा मोरी जाई रेला, मातर एबे हाए जीउ आचे! हाए हाजी जाई रेला, मातर एबे हामी ताके मिलाएलू!’”

“ई काचे लोकमन तियार बनाएबार चालू करलाए। केतक समय जिबा के, बड़े बेटा बेड़ा ले काम करी घरे आएला। हाए गीत आओरी नाचबार आबाज के सुनला आओरी चोमकी गला कि ए काए होएसी आचे।”

“जेबे बड़े बेटा के जान पड़ला कि ई काचे तियार बनाएबा आचेत कि तार भाई घरे आएला, तेबे हाए बहुत रिशा होएला आओरी घरे ना ओल्ला। तार बाबा बारे आसी करी ताके तिकर संगे तियार बनाएबा काचे बोल्ला, मातर हाए नाई बोल्ला।”

“हाए बड़े बेटा तार बाबा के बोल्ला, ‘ई सोबू बोरोस आने मुई तोर काचे सतधरम कार्म करली! केबे बी तोर कता के नाई ना बोली, मातर तुइ केबे मोके गोटोक सान मेंडि बी ना डेलीस ताकि मुई निजर संग मन संगे भोजी करके सकबी। मातर तोर ई बेटा तोर धन के पापी काम आने बर्बाद करी देला। आओरी एबे जेबे हाए आएला तेबे तार काचे तियार बनाएबा काचे तुइ सोबूले अच्छा मेंडि के मारी डेलीस!”

“ बाबा जबाप देला, ‘ए मोर बेटा, तुइ सोबुदाए मोर संगे आचीस, आओरी जोन सोबू मोर आए हाए सोबू तोर आए। मातर हामर काचे तियार बनाएबार सई आए कि तोर भाई मोरी जाई रेला, मातर एबे हाए जीउ आचे। हाए हाजी जाई रेला, मातर एबे हामे ताके मिलाएलू!’”