36. रूप दकाएबाटा

गोटोक दिन, जिसु निजर तीन चेला, पतरस, याक़ूब, आओरी यूहन्ना के तार संगे धरला। (ए यूहन्ना नाओर चेला हाए माने नुआए जोन जिसु के बपतिस्मा दी रेला। ) हाएमन पार्थना करबा काछे बड़े पहाड़ आने गलाए।

जेबे जिसु पार्थना करते रेला तो तार मू बेल पारा उजल होई गला। तार कपड़ा उजल पारा धोब होई गलाए, जसन पुरथ्बि आने कोनी करके सकोत तारले बी अदिक धोब।

तेबे मूसा आओरी एलियाह भविषयबकता दरसन डेलाए। ए लोक पुरथ्बि आने ई समय ले करोड़ो बोरोस पएले रेबराए। हाएमन जिसु के तार मोरबार बिसय आने कता बोललाए, काएकाचे की हाए झटके आका येरूसलेम आने मोरी जाएसी।

जेबे मूसा आओरी एलियाह जिसु संगे कता होएते रेलाए तेबे पतरस जिसु के बोल्ला, “हामर ए लगे रेबा टा ठीक आए। हामी तीन लोक तीनटा मंडप बनाएबू, गोटोक मूसा काचे, आओरी गोटोक एलियाह काचे।” मातर पतरस ना जानी रेला की हाए काए करते रेला।

जेबे पतरस कता होएते रेला, तो गोटोक चमत्कारी बादली आसी करी तिकर उपरे चाईं गला। पाचे हाएमन बादली ऊपर ले गोटोक आबाज के आएबाटा सुनलाए। हाए बोल्ला, “एटा मोर बेटा आए जाके मुई प्रेम करूआए। मुई तार सर्दा आची। तार सुना।” हाए तीनों चेलामन डरी गलाए आओरी माटी आने सोई देलाए।

तेबे हाएमनके छिंला आओरी बोल्ला, “ना डरा। उटा।” जेबे हाएमन चारो बाते दकलाए, तो जोन बी हाएटी रेला खाली जिसु रेला।

जिसु आओरी हाए तीनों चेलामन हाए पहाड़ ले लेऊटी करी तले आएलाए। तेबे जिसु हाएमनके बोल्ला, “एबे जोनटा ए लगे होएला तार चर्चा कारी संगे ना करा। मुई झटके मोरी जीबी आओरी पाचे जीउ होएबी। तार पाचे, तोमी लोकमन के सांगके सकास।”