37. जिसु लाजर के मोरला ले जीआऊ आए

लाजर नाओर गोटोक माने रेला। तार दुइटा भइनिमान रेलाए तिकर नाओ मरियम आओरी मार्था रेला। हाए सोबू जिसुर अच्छा दोस्त रेलाए। गोटोक दिन, कोनी गोटोक जिसु के सांगला कि लाजर बहुत बीमार रेला। जेबे जिसु एटा सुनला तो हाए बोल्ला, “ए बीमारी लाजरर मोरबा संगे ना सरे। तार पालटा, एटा लोकमन के महापरूर इजत करबा काचे आगे बड़ाएसि।”

जिसु निजर दोस्त मनके प्रेम करबाराए, मातर जोनती हाए रेला हाएति हाए दुईदिन ले जागला। हाए दुई दिनर पाचे, हाए निजर चेलामनके बोल्ला, “आसा, आपिस यहूदिया जु।” चेलामन जबाप देलाए, “मातर ए गुरु, एबे खिंडिक पएले हाएतिर लोक तोके मारबार चाएते रेलाए!” जिसु बोल्ला, “हामर दोस्त लाजर सोएला आचे, आओरी मोके ताके जगाएबार आचे।”

जिसुर चेलामन जबाप देलाए, “ए मापरू, जोदि लाजर सोएलाआचे, तेबे हाए अच्छा होई जाएसी।” तेबे जिसु सोमान भासा आने बोलीदेला, “लाजर मोरी गला आचे। मुई सर्दा आचे कि मुई हाएति ना रेली, ताकि तोमी मोर उपरे बिस्वास करके सका।”

जेबे जिसु लाजरर गाँव खेटला तेबे लाजरर मोरलार चार दिन होई रेला। मार्था जिसु ले मिसबा काचे बारे आएला आओरी बोल्ला, “ए मापरू, जोदि टुइ इति रेतीस तो मोर भाई ना मोरता। मातर मुई बिसबास करूआए कि जोन काई बी तुइ महापरू ले मांगबिस हाए तोके देसी।”

जिसु जबाप डेला, “पुनरूत्थान आओरी जीवन मुई आए। जोन कोनी मोर उपरे बिस्वास करूआत जोदि हाए मोरी बी जाओ तेबे हाए जिंसी। जोन कोनी मोर उपरे बिस्वास करुआए हाए केबे ना मरे। तुइ ए उपरे बिस्वास करूआस? ” मार्था जबाप देला, “ए मापरू, मुई बिस्वास करूआए कि तुइ महापरूर बेटा आए।”

तेबे मरियम आएला। हाए जिसुर गोड़े घसरी करी बोल्ला, “ए मापरू, जोदि तुइ इति रेतीस तो मोर भाई ना मोरता।” जिसु ताके पोचारला, “तोमी लाजर के कोनती सोंगाएलास?” हाएमन ताके सांगलाए, “कोबोर आने।” तेबे जिसु कांदके मुलाएला।

हाए कोबोर गोटोक गुंपा रेला जार दुआर आने गोटोक पोकना के ठेगली रेलाए। जेबे जिसु कोबोर आने खेटला तेबे हाए तिके बोल्ला, “पोकना के गुचा।” मातर मार्था बोल्ला, “हाए मोरिकरी चार दिन होएला आचे। तारले गंद आएते रेसी।”

जिसु जबाप देला, “मुई ना बोली रेली कि जोदि तोमी मोर उपरे बिस्वास करबास तेबे महापरूर ताक़त के दकबास?” ई काचे हाएमन पोकना के गुचाएलाए।

तेबे जिसु उपरे सरग बाते दकी करी बोल्ला, “ए बाप, मोर सुनबा काचे मुई तोर धन्यबाद कार्बी आची। मुई जानी कि तुइ सोबुदाए मोर सुनूआस, मातर मुई ए लगे ठीया ए सोबू लोकमनर मदद करबा काचे बोल्ली ताकि ए मन बिस्वास कोरोत कि तुइ मोके पोटाएलिस।” तेबे जिसु कोलार होएला, “ए लाजर, बारे निकर!”

आओरी लाजर बारे निकरला! हाए एबे बी कपड़ा आने लेपटी रेला। तेबे जिसु ताके बोल्ला, “ए कपड़ा के निकराएबा काचे तार मदत करा आओरी ताके खुला करा।” ई चमत्कारर लागि बहुत यहूदीमन जिसु उपरे बिस्वास करलाए।

मातर यहूदीमनर धर्मी अगुवामन जिसु ले जलन करलाए, ई काचे हाए मन जोजोना बनाएबा काचे गोटोक लगे रूंडा होएलाए कि कनता करी जिसु आओरी लाजर मरते मारबू।