38. जिसु के धराऊआत

सोबू बोरोस, यहूदी लोकमन फसहर पोरोब बोनाएबाराए। एटा ए बारेने गोटोक पोरोब रेला कि केतक खुबे बोरोस पएले महापरू तिकर पुरका मनके मिसर देश आनले छाड़ाए रेला। आली पालि तीन बोरोसर पाचे जिसु सार्बजनिक रूप ले परचार आओरी सिख्या देबाटा चालू करला। जिसु निजार चेलामन मनके सांगला कि हाए तिकर संगे यारूसलेम आने फसहर पोरोब के बनाएबार चाएसी आचे, आओरी ए बी कि हाए हाएती माराए जाएसी।

जिसुर चेलामन आने गोटोक यहूदा नाओर माने रेला। यहूदा प्रेरित मोनोर धनर थैली सोंगाएबार आसाहारी रेला, मातर केबे-केबे हाए हाए थैली आनले पैसा निकराएबाराए। जिसु आओरी चेलामनर यारूसलेम आने खेटबार पाचे यहूदा यहूदी अगुवामनर लगे गला। हाए पैसार पालटा जिसु के तिकर हाथे धराएबार प्रस्ताब सोंगाएला। हाए जानी रेला कि यहूदी अगुवा स्वीकार ना करबाराए कि जिसु जिसु महापरू रेला। हाए जानी रेला कि हाए ताके मरते मारबार छाएते रेलाए।

महायाजकर बोलबार लागि यहूदी अगुवा मन जिसु के तिकर हाथे धराएबा काचे यहूदा के तिरिस चांदीर सिक्का देलाए। एटा हाई हिसाबे होएला जनता भविष्यवक्ता बोली रेलाए। यहूदा मानी गला आओरी सिक्का धरी ऊटी गला। हाए जिसु के धरबा आने तिकर सहाएता करबा काचे कोनी मौका डगराएके मुलाएला।

यारूसलेम आने, यीसु निजार चेलामन संगे फसहर पोरोब बोनाएला। फसहर भोजीर चलते, जिसु रोटी धरी करी टूटाएला। हाए बोलला, “एके धरा आओरी खा। एटा मोर सरीर आए जोनटा मुई तोमोर काचे देबी आची। एके मोर हेत आने करा।” ई परकार ले, जिसु बोल्ला कि हाए तिकर काचे मोरी जाएसी, मतलब तिकर काचे हाए निजर सरीर के बलि चेगाए देसी।

पाचे जिसु गोटोक दाखरसर गिलास धरला आओरी बोल्ला, “एके पीआ। एटा नुआ किरियार मोर खून आए कि मुई रोकाएबी ताकि महापरू तोमोर पापमन के खेमा करो। सोबू हार एके पिबा दाए मोर याद आने एके करा जोनटा मुई एबे करबी आची।”

तेबे जिसु निजर चेलामनके बोल्ला, “तोमोर ले गोटोक लोक मोके धराएसी।” चेलामन चोमकी गलाए, आओरी पोचारलाए कि कोन असनी काम करसी। जिसु बोल्ला, “मोके धराएबा लोक हाए आए जाके मुई ए रोटीर टुकड़ा देबीचि।” तेबे हाए रोटी यहूदा के देला।

हाए रोटीके धरलार पाचे, यहूदा आने शैतान पुरला। यहूदा निकरी करी जिसु के धराएबा काचे यहूदी अगुवा मनर मदत करबा काचे ऊटी गला। एटा रातिर समय रेला।

भोजीर पाचे, जिसु आओरी तार चेला जैतून पोरबोत आने गलाए। जिसु बोल्ला, “तोमी सोबू आजी राति मोके छाड़ी देबास। एटा लिकलार आचे, ‘मुई धरी के मारबी आओरी सोबू मेंडिमन एने हाने होई जिबाए।”

पतरस जबाप देला, “भले बाकी सोबू तोके छाड़ी देओत, मुई ना छाड़ी!” तेबे जिसु पतरस के बोल्ला, “शैतान तोमी सोबू के नेबा काचे चाएसी आचे, मातर ए पतरस, मुई तोर काचे पार्थना कर्ली आची कि टुइ बिस्वास ले ना गुची ना जा। होएले बी, आजी राति, गांजार ना डाकते तुइ तीन हार मना करबिस कि तुइ मोके जानी बोली।”

पतरस तेबे जिसु के बोल्ला, “भले मुई मोरी गले बी, मुई केबे बी तोके ना जानी बोली ना बोली!” आओरी सोबू चेलामन असनी आका बोल्लाए।

तेबे जिसु निजर चेलामन संगे गतसमनी नाओर गोटोक जागाए गला। जिसु निजर चेलामनके पार्थना करबा काचे बोल्ला ताकि शैतान तिकर पोरिख्या ना नेओ। तेबे जिसु निजे पार्थना करबा काचे ऊटी गला।

जिसु तीन हार पार्थना करला, “ए मोर बाप, जोदि संभव होएसी तो दयाकरी ए दुखर गिलास पीबा काचे मोके ना दे। मातर जोदि लोकमनर पाप खेमा करबा काचे कोनी आओरी बाट निआए, तेबे तोर आका इच्छा पूरा हो।” जिसु बहुत हरबर रेला आओरी तार पोसना खुनर बूंद पारा रेला। ताके ताक़त देबा काचे महापरू गोटोक सरगदूत के पोटाएला।

सोबू हार पार्थनार पाचे, जिसु निजर चेलामनर लगे लेऊटी आएला, मातर हाएमन सोई गलाए। जेबे जिसु तीसरा हार लेउटला तेबे जिसु बोल्ला, “उटा! मोके धराएबा लोक ए लगे आचे।”

यहूदी अगुवा, सैनिकमन, आओरी गोटोक बड़े भीड़ संगे यहूदा आएला। हाएमन तलबार आओरी लाठी मन धरी रेलाए। यहूदा जिसु लगे जाइकरी ताके बोल्ला, “ए गुरु, जुआर, “आओरी ताके चुमला। हाए धरा पड़बा लोक के यहूदी अगुवामन उपरे जानाएबा काचे असन करला। तेबे जिसु बोल्ला, “ए यहूदा, काए तुइ गोटोक चुम्मा ले मोके धराबिस? ”

जड़कदाए हाए सैनिक जिसु के धरते रेलाए, तो पतरस निजर तलबार निकराएला आओरी महायाजकर गोटोक कोमीयार कान काटी देला। जिसु बोल्ला, “तलबार के दूर कर! मुई निजर बाप ले मोर बचाव करबा काचे सरगदूतर गोटोक सेना काचे बिनीति करके सकी। मातर मुई मोर बापर कता के मानबार आचे।” तेबे जिसु हाए मानेर कान के अच्छा करी देला। तेबे सोबू चेलामन पोलाएलाए।