39. जिसु उपरे मुकदमा चलुआए

एबे एटा आदा रातिर समय रेला। हाए सैनिक जिसु के महायाजक लगे नेलाए, की हाए जिसु ले प्रस्न कारबार चाएते रेला। पतरस दूर ले तिकर पीछा करते रेला। जेबे सैनिक जिसु के घरे नेलाए, तेबे पतरस बारे थेबी करी खुदके जोय संगे गरम करते रेला।

घर भीतरे, यहूदी अगुवामन जिसु उपरे मुकदमा चलाएलाए। हाएमन तार विरुद्ध झुटा कतामन के बोलबा काछे बहुत झुटा गवाहमन के धरी आनलाए। जेबेकि, तिकर कतामन गोटोक दूसरा ले ना मिसते रेला, ई काछे यहूदी अगुवा ए साबित ना करके सकलाए कि हाए काई कतार दोषी रेला। जिसु काई ना बोल्ला।

आओरी मुई, महायाजक सीदा जिसु के दकला आओरी बोल्ला, “हामके सांग कि तुइ आका जीउता महापरूर बेटा जिसु महापरू आए? ”

जिसु बोल्ला, “मुई आए, आओरी तोमी मोके महापरू संगे बोसला टा आओरी सरग ले आएबाटा बी दकबास।” महायाजक निजार कपड़ा के चिरला कि जोन जिसु बोल्ला हाए हाए कता आने बहुत रिशा रेला। हाए दूसरा अगुवामन उपरे धाका डेला, “हामके एटा सांगबा काचे कोनी दूसरा गवाहर दरकार निआए कि ए माने काए करला आचेत! तोमी खुद आका हाए एटा बोलबाटा सुनला आचे कि हाए महापरूर बेटा आए। तार बारेने तोर काए आदेश आए? ”

सोबू यहूदी अगुवामन महायाजक के जबाप देला, “हाए मोरबार लाएगर आचे!” तेबे हाएमन जिसुर आँखी आने पट्टी बांदलाए, तार उपरे थुकलाए, आओरी तार हांसी उड़ाएलाए।

आओरी पतरस, जेबे हाए घरर बारे जागी रेला। तेबे गोटोक कोमीया बाएले ताके दकला। हाए ताके बोल्ला, “तुइ बी जिसु संगे रेलिस!” पतरस मना करी देला। पाचे, कोनी दूसरा टोकी बी ए कता के बोल्ला, आओरी पतरस आओरी ले मना करी देला। आओरी, केतक लोकमन बोल्लाए, “हामी जानु कि तुइ जिसु संगे रेलिस ई काचे कि तोमी दुइलोक गलील आनर आस।”

तेबे पतरस बोल्ला, “जोदि मुई ए माने के जानी तेबे महापरू मोके सोराप देओ!” झटके आका पतरसर ई हिसाबे किरिया खाएलार पाचे, गोटोक गाँजा डाकला। जिसु पिटी बाते मुड़ी पतरस के दकला।

पतरस हाएती ले ऊटी गला आओरी फूटी-फूटी कांदला। हाई समय, जिसु के धराऊ यहूदा डाकला कि यहूदी मन जिसु मृत्यु दंड देलाए। यहूदा बहुत दुखी होई गला आओरी जाइकारी खुदके मारी देला।

एबे हाए देशर राजपाल पिलातूस रेला। हाए रोम काचे काम करबाराए। यहूदी अगुवामन जिसु के तार लगे आनलाए। हाएमन चाएते रेलाए कि पिलतूस ताके मृत्युदंड देओ आओरी ताके मारी देओ। तेबे पिलातूस जिसु के पोचारला, “काए तुइ यहूदीमनर राजा आए? ”

जिसु जबाप देला, “तुइ सते बोल्लिस। मातर मोर राज इति पृथबी आनर नुआए। जोदि होई रेले मोर दास मोर काचे युद्ध करताए। मुई पृथबी आने महापरूर बारेने सत सांगबा काचे आएली आची। सोबू गोटोक लोक जोन सत ले प्रेम करूआत हाएमन मोर सुनूआए। “पिलतूस बोल्ला, “तेबे सत काएआए? ”

जिसु संगे गोटाएलार पाचे, पिलतूस बारे भीड़ लगे आसी बोल्ला, “मुई आसान काई कारण ना पाएली कि ए माने के मारा जिबार लाएगर आए।” मातर यहूदी अगुवामन आओरी भीड़ कोलार होई बोल्लाए, “ताके क्रूस आने चेगा!” पिलतूस जबाप देला, “हाए काई बी गलत कारबार दोषी नुआए।” मातर हाए आओरी बी ऊंचा आबाज आने कोलार होएलाए। तेबे पिलतूस तीसरा हार बोल्ला, “हाए दोषी नुआए!”

पिलतूस डरी गला कि हाए भीड़ झगड़ा चालू करी देबाए, ई काचे हाए निजार सैनिकमनर द्वारा जिसु के क्रूस आने चेगाएबा काचे मानी गला। रोमी सैनिकमन जिसु के कोरडा मारलाए, आओरी ताके राजसी कपड़ा पिंदाएलाए, आओरी तार मुंडे कांटार मुकुट पिंदाएलाए। तेबे हाएमन ए बोली करी तार हांसी उड़ाएलाए, “दका, यहूदीमनर राजा!”