40. जिसु के कुरूस काठ आने चेगाऊआत

जिसुर हांसी उड़ाएलार पाचे, सैनिक ताके क्रूस आने चेगाएबा काछे नेलाए। हाएमन हाए क्रूस के ताके आका उटाएके बोल्लाए जोन थाने हाए मरसी।

हाए सैनिक जिसु के हाए जागाए नेलाए “खोपड़ी” बोलूआत आओरी तार हाथ आओरी गोड़मन के क्रूस आने ठोकी देलाए। मातर जिसु बोल्ला, “ए बाप, ए मनके खेमा कर, काएकाचे की ए मन ना जानेट कि ए मन काए करबा आचेत।”

तेबे सैनिकमन जिसुर कपड़ा काछे चिट्टीमन पोकाएलाए। जेबे हाएमन असन करलाए तेबे हाएमन हाए भबीस्यबानी के पूरा करलाए, “हाएमन मोर कपाड़ामनके आपस आने बाटा करबाए, आओरी मोर कपड़ा काचे चिट्टीमन पोकाएलाए।”

हाए लगे दुइटा डाकू रेलाए, जाके सैनिकमन हाई समय आने क्रूस आने चेगाए रेलाए। हाएमन हाएमनके जिसुर दुई बाटे सोंगाए रेलाए। हाएमनले गोटोक डाकू जिसु हांसी करला, मातर दूसरा डाकू बोल्ला, “काए तुइ ना डरिस कि महापरू तोके दंड देसी? हामी खुबे खराब काम करलार दोषी आऊ, मातर ए माने दोषी नुआए।” पाचे हाए जिसु के बोल्ला, “जेबे तुइ निजर राज आने आएबिस तेबे दयाकरी मोके हेत सोंगा।” जिसु जबाप देला, “आजी आका तुइ मोर संगे सरग आने रेबीस।”

यहूदी अगुवामन आओरी भीड़र दूसरा लोकमन जिसुर हांसी उड़ाएलाए। हाएमन ताके बोल्लाए, “जोदि तुइ महापरूर बेटा आए, तेबे क्रूस ले तले उतर आओरी खुदके बाचा! तेबे हामी तोर उपरे बिस्वास करबू।”

तेबे हाए पूरा-पूरी देशर बादली पूरा काला होई गला, भले हाए दिन मुंडेबेला रेला। ए मुंडेबेलार समय काला होई रेला आओरी तीन घंटा ले आसनी आका रेला।

तेबे जिसु डाकी करी बोल्ला, “पूरा होएला! ए बाप, मुई निजर आत्मा तोर हाथे देबीचि।” तेबे हाए निजर मुंड के तले करला आओरी निजर जीउ के छाड़ी देला। जेबे हाए मोरला तेबे गोटोक भूकंप आएला। हाए बड़े पर्दा जोनटा महापरूर रेलादाएले लोकमन के अलग करते रेला ऊपर ले तल बाटे फाटी करी दुई गोंदा होई गला।

निजर मृत्युर द्वारा, जिसु लोकमन काचे महापरू लगे आएबार बाट खोली देला। जेबे जिसुर देखभाल करबा गोटोक सैनिक जोन काई होई रेला हाए सोबू दकला तेबे हाए बोल्ला, “सटे आका, ए माने सतधरम रेला। ए महापरूर बेटा रेला।”

तेबे युसुफ आओरी निकुदेमुस नाओर दुइटा यहूदी आएलाए। हाएमन बिस्वास करबाराए कि जिसु जिसु महापरू रेला। हाएमन पिलतूस ले जिसुर सरीर के मांगलाए। हाएमन तार सरीर के कपड़ा आने लेप्टाएलाए। तेबे हाएमन गोटोक पोकना ले काटी करी बनाएलार कोबोर आने नेलाए आओरी तार भीतरे सोंगाएलाए। तेबे हाएमन हाए कोबोरर बाट के बंद करबा काचे गोटोक बड़े पोकना के ठेंगलि देलाए।