41. महापरू जिसु के मोरला थानले जियाऊआए

सैनिकमनर द्वारा जिसु के क्रूस आने चेगाएलार पाचे, यहूदी अगुवामन पिलातूस के बोल्लाए, “हाए झुटा, जिसु बोली रेला कि हाए तीन दिनर पाचे मोरला थानले जी उट्सी। काकी तो ए गोटोर सत जानबा काछे कोबोरोर देखभाल करके पोड़सी कि टार चेलामन टार सरीर के चोरी करी ना नेओत। जोदि हाएमन असन करबाए टेबे हाए बोलबाए कि हाए मोरला थानले जी उटला।”

पिलातूस बोल्ला, “केतक सैनिकमन के धरिकरी जा, आओरी जसन तोमी करके सकास असनी देखभाल करा।” ई काचे हाएमन हाए कोबोर लगर ओलबा बाटर पोकना आने गोटोक चिना लागाए देलाए। हाएमन ए जानबार काचे कि हाएती सैनिकमन के बी बोसाए देलाए कि कोनी बी तार सरीर के ना चोरके परोत।

जिसुर मोरलार पाचर दिन सबतर दिन रेला। कोनी बी सबतर दिन काम ना करबाराए, ई काचे जिसु के कोनी भी दोस्त कोबोर आने ना जाइरेला। मातर सबतर पाचेर दिन, सकाले बहुत बोड़दाए, केतक बाएलेमन जिसुर कोबोर आने जिबा काचे तियार होएलाए। हाएमन तार सरीर आने आओरी बी मसालमनके लागाएबार चाएते रेलाए।

हाए बाएलेमनर खेटबार पएले, कोबोर आने गोटोक बड़े भूकंप आएला। सरग ले गोटोक सरगदूत आसी करी हाए पोकना के ठेगली डेला जोन कोबोरर ओलबा बाट के ढापी होई रेला आओरी हाए उपरे बोसीला। हाए सरगदूत उजल पारा चमकते रेला। कोबोर आने सैनिक रेलाए हाएमन ताके दकलाए। हाएमन एतक डरी गलाए कि मोरला लोक पारा माटी आने घसरी गलाए।

जेबे हाए बाएलेमन कोबोर आने खेटलाए तेबे सरगदूत हाएमन के बोल्ला, “ना डरा। जिसु इति निआए। हाए मोरला थानले जी उटला आचे, जसन कि हाए बोली रेला कि हाए जी उट्सी! कोबोर डगरा आओरी दका।” हाए बाएलेमन कोबोरर भीतरे आओरी जोनती जिसुर सरीर के सोंगाए रेलाए हाएती डगराएलाए कि तार सरीर हाएथाने ना रेला!

तेबे हाए सरगदूत हाए बाएलेमनके बोल्ला, “जाइकरी तार चेलामनके सांगा, ‘जिसु मोरला थानेल जी उटला आचे आओरी हाए तोमोर छोमे-छोमे गलील जाएसी।”

हाए बाएलेमन भकुआ होएलाए आओरी बहुत सर्दा होएलाए। हाए चेलामन के ए अच्छा खबर सांगबा काचे पोलाएलाए।

जेबे हाए बाएलेमन के ए अच्छा खबर सांगबा काचे निजर बाटे रेलाए, तेबे जिसु तिकर उपरे दरसन देला। हाएमन तार गोड़े घसरलाए। तेबे जिसु बोल्ला, “ना डरा। जाइकरी मोर चेलामनके गलीग जिबा काचे बोला। हाएमन हाएती मोके दकबाए।”