3. जलप्रलय
भौत समय पछा, संसारमी भौत मानसन बस्न्थ्या। तिनन भौतइ दुष्ट रे हिंसात्मक हुनाइ गया थ्या। यो आब इति भौत खराब भयो कि परमेश्वरले सारा संसारलाई एक ठुलो जलप्रलयले नास अद्द्या निर्णय अर्यो।
तर परमेश्वर नोआ सित खुसी थ्या। दुष्ट मानसनका बीचमी उन एक धर्मी मानस थ्या। परमेश्वरले नोआलाइ आफले पठाउन लाग्या जलप्रलयको बारेमी भण्यो। तबइकिलाइ उनले नोआलाइ एक ठुलो जहाज बनाउन लायो।
परमेश्वरले नोआलाई करिब एक सय चालीस मिटर लामो, तेईस मिटर चौडाई, रे चौध मिटर उच्चो जहाज बनाउनाइ भण्यो। नोआले तइ जहाजलाइ काठको प्रयोग अरीबर तीन तहमी बनाउनु पड्डया थ्यो, जाँ भौत कोठा, छत रे एक झ्याल हुनु पड्डया थ्यो। तइ जहाजमी नोआ, उनरा परिवार, रे हरेक किसिमका जमिनमी बस्सया जनावर जलप्रलयको समयमी सुरक्षित रनुपड्डया थ्यो।
नोआले परमेश्वरको आज्ञा माणयो। नोआ रे उनरा तीन चेलाले परमेश्वरले भणया जसोइ जहाज बनायो। जहाज एकदमै ठूलोभया हुनाले तइलाइ बनाउन भौत वर्षलाग्या थ्यो। नोआले मानसनलाइ आउन्या जलप्रलयको चेतावनी दियो रे तिननलाइ परमेश्वर तीर फर्किन सचेत अरायो, तर तिननले उनरा कुरणीमी विश्वास अरेइन।
परमेश्वरले नोआलाई रे उनरा परिवारलाइ लगइ आज्ञा दियो कि आफलाइ रे जनावरलाई चाइन्या जति खाने कुरणी जम्मा अर। जब सब कुरणी तयार भयो, परमेश्वरले नोआलाई भण्यो कि अब जहाजमी जान्या समय आया छ, रे तिनन जम्मा आठ जना: उन, उनरि स्वानी, उनरा तीन चेला रे तिन बुहारी सबइ जहाजमी चढया।
परमेश्वरले भाले रे पोथी अरीबर सबइ किसिमका पशु पंक्षीको एक-एकजोडा नोआका वाँ पठायो, ताकि जलप्रलयको समयमी ती सबइ जहाजमी सुरक्षित रन सकुन। परमेश्वरले बलिका निउती चाइन्या सबइ किसिमका पशु हरेकको सात-सात जोडा भाले रे पोथी अरीबर पठायो। जब तिनन सबइ जहाज भितर गया, तब परमेश्वर आफइले जहाजको ढोका बन्द अरि दीयो।
तइ पछा पानी पड्ड सुरुभयो। चालीस दिन रे चालीस रात सम्म लगातार पानी पडीरयो। पृथ्वीका तलतीर बठेइ लगइ पानी बेगसित उर्लीबर आयो। सारा संसार रे उच्चा चुचुरा समेत पानीले डुबया थ्या।
सुख्खा जमिनमी रन्या सबइ मर्या, जहाज भितर भया मानस रे पशुपंक्षी जीउना रया। जहाज पानीमी तैरिनोइ गयो रे भितर भया सबइलाइ डुब्द बठेइ जोगाइबर राख्यो।
पानी थामिया पाँच महिना सम्म जहाज तैरिरह्यो, रे तइ समयका बिचमी पानी सुकीबर जन्नाथ्यो। पइ एक दिन एक पाहाडका टुप्पामी जहाज रोकियो, तर पृथ्वी आजी सम्म लगइ पानीमी डुबिरइथ्यो। और तीन महिना पछा, अन्य पहाडका मालतीरका भाग धेकिन पस्या।
और चालीस दिन पछा नोआले एउटा कव्वालाइ पानी सुक्या छ कि छैन भणी हेद्दाइ बाहिर पठायो। कव्वा इथ-उथ अद्दोइ सुख्खा जमिनका खोजीमी उड्डलाग्यो, तर तइले सुख्खा जमिन नभेट्या हुनाले फर्कीबर आयो।
पछा नोआले एक ढुकुरलाइ पठायो। तर तइले लगइ काइ सुख्खा जमिन पाउन सकेइन, तबइकीलाइ त्यो नोआका वाँ फर्कीबर आयो। तइको एक हप्ता पछा उनले आजी तइ ढुकुरलाइ बाहिर पठायो, रे तइले आफ्ना ठुङमी एक जैतुनको हाँगा लेइबर आयो। पानी सुकीबर जन्नाथ्यो, रे बिरुवा आजी पलाउन्ना थ्या।
अर्खो एक हप्ता पछा नोआले तेसरा बेर तइ ढुकुरलाइ बाइर पठायो। यइ बेर तइले आराम अद्द्या ठाउँ पायो रे त्यो फर्कीबर आएइन। पानी सुकीबर जन्नाथ्यो।
दुई महिना पछा, परमेश्वरले नोआलाइ भण्यो, “तु रे तेरा परिवार सबइ पशु पंक्षी जहाज बठेइ बाइर निक्कल स्क्न्छौ। तुइले भौत सन्तान रे नाति पनाती जन्मा रे आजी सारा पृथ्वीमी भरिनाइ जा।” पइ नोआ रे उनरा परिवार जहाज बठेइ बाहिर आया।
जहाज बठेइ बाइरआया पछा नोआले परमेश्वरकी निउती एक वेदी बनायो रे तइ वेदीमी बलिकी निउती राखिया केइ जनावरको बलि चढायो। परमेश्वर तइ बलि बठेइ खुशी भया रे नोआ रे उनरा परिवारलाइ आशिष दियो।
परमेश्वरले प्रतिज्ञा अर्यो, “आब आजी म कभइ लगइ मानसका दुष्टताका खातिर यइ पृथ्वीलाइ श्रापित बनाउन्या आथिन, अथवा जलप्रलय बठेइ संसारलाइ नास अद्द्या आथिन, पइलगइ मानसन बाल्यकाल बठेइ पापी हुनाहान।”
पइ परमेश्वरले प्रतिज्ञाको चिन्ह स्वरूप पइलो इन्द्रेणी बनायो। हरेक बेर जब अग्गासमी इन्द्रेणी धेकीन्छ, परमेश्वरले आफ्ना मानसनसित अर्या प्रतिज्ञा सम्झनाहान।
बाइबल कथा : उत्पत्ति६-८
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।