25. शैतान ईशु के परिकिया करुआय

ईशुर बतिसमा होयलार तुरतर पाछे, पवितर आतमा ताके झारने नेला। ईशु हाँयताने चालीस दिन आवरी चालीस राती रला। हाँय समया ने हाँय उपास करला आवरी शैतान ईशुर लगे आसी करी पाप करायबा काचे हातर परिकिया करला।

पहिले शैतान ईशु के बोलला, जोदि तुई मापरुर बेटा आस तो ये पकना के रोटी बनाओ तुई खायबीस।

मातर ईशु शैतान के बोलला, मापरुर वचन ने ये लिखला आचे। जीव रबा काचे मुनुक के रोटीर जरूरत नुआय, मातर तीके सबु हाँय गोटर जरूरत आय, जोन मापरू तीके बोलूआय।

तैबे शैतान ईशु के मन्दिरर सबुले डेंग ऊपरे नेला। हाँय ताके बोलला, जोदि तुई मापरुर बेटा आस तो ये थानले ढोगाओ कसन बोलले लिखला आचे, मापरू तोके ऊटायबा काचे तार सरगदूतमन के आज्ञा देयसी, कि तोर पाँव के पकना ताने ना पाओ।

मातर ईशु हाँय ना करला जोन शैतान ताके करबा काचे बोली रला। एतार छाड़ी हाँय बोलला, मापरू सबू गोटक के बोलुआय, तुई परबू तोर मापरुर परिकिया ना कर।

आवरी शैतान ताके मजपुरर सबू राज के दखायला। हाँय ताके दखायला कि हाँय कतक शक्ति बिता रला, आवरी हाँय कतक सम्पन्न रला। हाँय ईशु के बोलला, मुई तोके ये सबू देबी, जोदि तुई मांडी के टेकी करी मोर उपास करले।

ईशु जबाब देला, हे शैतान मोरलगले जा। मापरू वचन ने हाँय लोकमन के आदेश देऊआय, केबल मोर परबू मापरुर भजन कीर्तन करा, मापरुर रूपने केबल हाँकी आदर करा।

ईशु शैतानर परिकिया ले ना हारला, ऐइकाचे शैतान तार लगले गला। तैबे सरगदूत आसी करी ईशुर सेवा करलाय।