26. शु तार सेवा मुरायला

शैतानर परिकियामनर इंकार करलार पाछे, ईशु गलील क्षेत्र ने लैवटी आयला। ये हाँय जगा आय जोनताने हाँय रयते रला। पवितर आतमा ताके कुबे शक्ति देयते रला। आवरी ईशु गोटक जगा ले उजवा जगा ने गला,आवरी लोकमन के शिक्षा देला। सबु हातार बारे ने अछा गोट बोललाय।

जेबे ईशु नासरत शहर ने गला। जेबे हाँय शुरुमा रला, तेबे हाँय ये गाँव ने रयते रला। विश्राम दिने हाँय आराधना जगा ने गला। अगुवामन ताके यशायाह भविषद सागबा बितार गोटक पुस्तक देलाय। हाँयमन जानबा काचे होयते रलाय,कि हाँय हाँयतानले पढ़ो तैबे ईशु हाँय पुस्तक के उलटायकरी हातार गोटक भाग के लोकमन काचे पढ़ला।

ईशु असन परकार ले पढ़ला, मापरू मोके तार आतमा देला आचे, कि मुई कंगालमन के नगत खबरर परचार करके सकबी। हाँय मोके ऐइकाचे पटायला आचे, कि कैदीमन के छाड़ायबी, आन्धामनके आंखी देबी, आवरी तीके छुटकारा देबी। जोन मनके उजवा लोक कुचलबा आत। ये हाँय समया आय, जैबे मापरुर हामर ऊपरे दया होयसी आवरी हामर साथ देयसी।

तेबे ईशु बसला, सबु लोक ताके धियान ले दखते रलाय, हाँयमन जानते रलाय कि पवितर शास्त्रर जोन भाग हाँय येबे पढ़ी रला। हाँय मसीहीर बारे ने रला। ईशु बोलला,” जोन गोट मुई येबे तोमर काचे पढ़ली आची हाँय ये समया ने बिलकुल घटसी आचे। सबु लोक चकित रलाय। हाँयमन बोललाय काय ये युसूफर बेटा नुआय।

तैबे ईशु बोलला, ये सत्ते आय कि लोक असन भविषद सागबा बिता के कोनी पने कैबे मन ना करेत। जोन तिकर शहर ने बाड़ला आचे। एलिय्याह भविषद सागबा बितार समया ने, जैबे साढ़े तीन बरस तक पानी ना मारला, तैबे इसराइल देश ने कुबे रांडीमन रलाय।मातर मापरू एलिय्याह के इसराइलर कोनी रांडीर सहायता करबा काचे ना पटायला। येके छाड़ी, हाँय एलिय्याह के उजवा देशर रांडी लगे पटायला।

ईशु बोलते रला, एलिशा भविषद सागबा बितार समया ने कुबे लोकमन चामड़ीर रोग ले पीड़ित रलाय। मातर एलिशा हाँयमन के चंगा ना करला हाँय केबल इसराइलर शत्रुमनर सेनापति नामान के चंगा करला। मातर जोन लोक ईशु के सुनते रलाय हाँयमन यहूदी रलाय। ऐइकाचे जैबे हाँयमन ताके ये बोलबार सुनलाय तैबे हाँयमन ताके रिस होयलाय।

नासरतर लोकमन ईशु के धरलाय, आवरी हाके आराधना जगा ले ओड़ -घोड़ते बाहरे नेलाए। हाँयमन ताके गोटक चचरा पकना ऊपरे नेलाय कि तले घसराय मारबा काचे।,मातर ईशु कुबे लोकमन ले निकरी गला आवरी नासरत शहर के छाड़ी करी गला।

आवरी ईशु सबु गलील क्षेत्र ने गला, आवरी कुबे लोक तार लगे आयलाय। हाँयमन कुबे असन लोकमन के आनलाय जोन मन बेमार आवरी विकलाग रलाय। हाँयमन तानले कोनी आन्धा रलाय, आवरी कोनी कोड़ेया, बैहरा,कोंदा रलाय, आवरी ईशु तीके चंगा करला।

एतार छाड़ी कुबे असन लोक के ईशु लगे आनलाय, जोन मन के दुष्ट आतमा रला। ईशु दुष्ट आतमा के तिकर ऊपरले निकरबा काचे आदेश देला आवरी हाँयमन निकरी गलाय। सबु लोक चकित रलाय आवरी हाँय मन मापरुर भजन कीर्तन करलाय।

आवरी ईशु बारह माने के चुनला जोनमन के हाँय तार चेला बोलला हाँय चेलामन तार संगे बुललाय। तार ले शिक्षा पायलाय।