37. ईशु लाजर के मोरला तानले जियायला

लाजर नावर गोटक मुनुक रला। ताके दुयटा बहिन रलाय, तिकर नाव मरियम आवरी मार्था रला। हाँय सबू ईशुर घनिष्ट संगवारी रलाय। गोटक दिने कोनी ईशु के सांगलाय कि लाजर कुबे बीमार रला। जैबे ईशु ये सुनला तैबे हाँय बोलला, ” ये बीमार मरबा मरबा काचे नुआय, मातर मापरुर महिमा काचे आय। कसन बोलले लोक मापरुर आदर करबाय।

ईशु तार संवारीमन के मया करबार आय, मातर जोनताने हाँय रला, हाँयताने हाँय दुयदिन टाकी रला। हाँय दुई दिनर पाछे हाँय तार चेलामन के बोलला, आसा यहूदिया परदेश ने लैवटी जो। चेलामन जबाब देलाय, मातर, हे गुरु येबे किडिक समया पहिले हाँयतानर लोक तोके मारबा काचे होयते रलाय। ईशु बोलला, हामर संगवारी लाजर सोयला आचे आवरी मोके ताके चेताय बार आय।

ईशुर चेलामन जबाब देलाय, हे परबू जोदि लाजर सोयला आचे, तैबे हाँय अछा सोयसी। तैबे ईशु तीके परकट करी बोलला, लाजर मरला आचे मुई हरिक आची कि मुई हाँय ताने ना रली, कसन बोलले तोमि मोर ऊपरे बिसबास करके सका।

जड़कदाय ईशु लाजरर गाँव केटला, तैबे लाजरर मोरलार चार दिन होई रला। मारथा ईशु के भेट होयके बाहरे आयला, आवरी बोलला, “हे परबू जोदि तुई ये ताने रले मोर भाई लाजर ना मरता। मातर मुई बिसबास करबी आची कि जोन पने तुई मापरू के मागबीस हाँय तोके देयसी।”

ईशु जबाब देला, पुनरुत्थान आवरी जीबन मुई आय। जोन कोनी मोर ऊपरे बिसबास करुआय, जोदि हाँय मरी गले पने तेबे पने जियसी जोन कोनी मोर ऊपरे बिसबास करसी। हाँय कैबिही ना मरसी काय तुई एतार ऊपरे बिसबास करुआस? मारथा जबाब देला, हे परबू मुई बिसबास करुआय, कि तुई मापरुर बेटा मसीह आस।

तैबे मरियम आयला, मरियम ईशुर पाँव पड़ीकरी बोलला, हे परबू जोदि तुई ये ताने रले मोर भाई लाजर ना मरता। ईशु हाँके पचारला तुई लाजर के कोन लगे सोगायली आस? मरियम सांगला मोड़ाभाट्टी ताने। आव आवरी दख, तैबे ईशु कांदला।

हाँय मोड़ाभाट्टी गोटक करपन रला, करपनर बाटने पकना के छुट्टी रलाय। जड़कदाय ईशु मोड़ाभाट्टी ने केटला तैबे हाँय तीके बोलला, पकना के गुचाहा। मातर मारथा बोलला, लाजरर मरलार चार दिन होयला आचे। हातार ले कुबे दुर्गध आयसी।

ईशु जबाब देला, काय मुई तोमके ना सांगी रली कि जोदि तोमि मोर ऊपरे बिसबास करले मापरुर शक्ति के दखबास? ऐइकाचे हाँयमन पकना के गुचायलाय।

तैबे ईशु ऊपरे सरग बाटे दखी करी बोलला, “हे पिता मोर सुनबा काचे मुई तोर धन्यवाद करबी आची। मुई जानी कि तुई आकट सुनुआस, मातर मुई ये ताने ठिंहा होई ये सबु लोकर संग देबा काचे बोलली, बिसबास करोत कि तुई मोके पटायलिआस। “तेबे ईशु आगदेला” हे लाजर बाहरे निकरी आव।”

तैबे लाजर बाहरे निकरी आयला। हाँय येबे पने पटई ने लेपटलार रला। ईशु ताके बोलला, ये पटई के निकरायबा काचे तार संग दियास। आवरी ताके आजाद करा। ये चमत्कार के दखी कुबे यहूदीमन ईशुर ऊपरे बिसबास करलाय।

मातर यहूदीमनर धार्मिक अगुवामन ईशु के कुचर होयलाय, ऐईकाचे हाँयमन विचार करबाकाचे गोटक संगे रुंडा होयला कि कसन ईशु आवरी लाजर के मारी होयसी।