38. ईशु के धराऊआत

सबु बरस यहूदी लोक फसल तियार मानते रलाय। एतार बारे ने गोटक परब रला, कि कतक पीड़ीर पहिले मापरू तिकर वंशर लोक के मिसर देशर कमिया ले छाड़ाय रला। अनुमान ने तीन बरसर पाछे, ईशु सार्वजनिक ले परचार आवरी शिक्षा देबार मुरायला। ईशु तार चेलामन के सांगला कि हाँय तिकर संगे यरूशलेम ने फसल तियार के मानबा काचे होई रला, आवरी ये पने कि हाँय हाँयताने मारी जायसी।

ईशुर चेलामन संगे गोटक यहूदा नावर माने रला। यहूदा चेलामनर पैसार थैली के सोगायबार जिम्मेदारी रला, मातर हाँय आकट हाँय थैली तानर पैसा के निकरायबार आय। ईशु आवरी चेलामनर यरूशलेम केटलार पाछे यहूदा यहूदी अगुवामनर लगे गला। यहूदा पैसा पालटा ईशु के तीके देबा काचे बोलला, हाँय जानते रला कि यहूदी अगुवामन स्वीकार ना करते रलाय कि ईशु ही मसीह रला। हाँय जानते रला कि हाँयमन ताके मारबा काचे होयला आत।

बड़े पुजारी बोलबा के यहूदी अगुवामन ईशु के तिकर हाथे दरबा काचे यहूदा के तीस सिक्का देलाय। ये असन परकार ले होयला। जसन कि भविषद सागबा बिता मन बोली रलाय कि असनी होयसी। यहूदा मानला आवरी पैसा के धरी करी गला। यहूदा ईशु के बंदी करबा काचे तिकर साहयता करबा काचे मौका के दखते रलाय।

यरूशलेम ताने ईशु तार चेलामन संगे फसल तियार बनायला। फसल तियारर भोज करबा दाय, ईशु रोटी के धरी गोंदा करला। हाँय बोलला, येके धरा आवरी खाहा। ये मोर शरीर आय जोनके मुई तोमर काचे देबी आची, येके मोर सुरता करबा काचे करा। ये प्रकार ले ईशु बोलला, कि हाँय तिकर काचे मरी जायसी, अर्थात तिकर काचे हाँय तार शरीर के बलि देई देयसी।

आवरी ईशु गोटक दाखरस कटोरा के धरला आवरी बोलला, येके पिया। ये नुवावाचार मोर लहू आय जाके मुई बहायबी कि मापरु तोमर पापमन के क्षमा करो। सबूदाय येके पियबादाय मोके सुरता करा, जाके मुई येबे करबी आची।

तैबे ईशु तार चेलामनके बोलला, तोमर संगर गोटक लोक मोके धरायसी। चेलामन चकित होयलाय आवरी पचारलाय कि कोन असन काम करुआय। ईशु बोलला, मोके धरायबा बिता हाँय आय जाके मुई रोटीर गोंदा देबी आची। तैबे ईशु, हाँय रोटी यहूदा के देला।

रोटी के धरलार पाछे, यहूदा के शैतान समायला यहूदा निकरी करी ईशु के बंदी करायबा काचे यहूदा अगुवा के साहयता करबा काचे गला। ये रातीर बेर रला।

खायलार पाछे, ईशु आवरी तार चेलामन जैतून परबत ने गलाय। ईशु बोलला, तोमि सबु मोके आजी रातीके छाड़ी देबास। ये लिखला आचे, मुई चरवाह के मारबी आवरी सबु भेड़मन तितर -बितर होयबाय।

पतरस जबाब देला, भले सबु तोके छाड़ी देले पने मुई तोके ना छाड़ी। तैबे ईशु पतरस के बोलला, शैतान तोमि सबुके धरबा काचे होयला आचे।, मातर हे पतरस मुई तोर काचे पारतना करली आची, कि तुई बिसबास ले ना गुच्छ। आवरी आजी राती कुकड़ा बासबार पहिले तुई तीन हार इंकार करबीस, कि तुई मोके ना जानी बली।

पतरस तैबे ईशु के बोलला, भले मुई मरी जीबी मुई कैबीही तोर इंकार ना करी। बाचला सबू चेलामन पने असनी बोललाय।

तैबे ईशु तार चेलामन संगे गतसमनी नावर जगा उपरे गलाय। ईशु तार चेला मन के पारतना करबा काचे बोलला, शैतान तिकर परिकिया नाकरो। तैबे ईशु पारतना करबा काचे गला।

ईशु तीन हार पारतना करला, “हे मोर पिता जोदि सम्भव आचे तो किरपा करी ये दुःखर कटोरा पियबा काचे मोके ना देस।” मातर जोदि लोकमनर लगे क्षमा करबा काचे कोनी आवरी बाट नियाय तो तोर ईच्छा पूरा होवो। ईशु कुबे व्याकुल रला, आवरी हातार पसना लहूर तिपार असन रला। ताके शक्ति देबा काचे मापरू गोटक सरग दूत के पटायला।

सबुहार पारतना करलार पाछे, ईशु तार चेलामन लगे लैवटी आयला।तैबे ईशु बोलला, उठा! मोके धरायबा बिता ये लगे आचे।

यहूदी अगुवामन, सिपाहीमन, आवरी कुबे लोकमन संगे यहूदा आयला। हाँयमन तलवार, लाठी दरी रलाय। यहूदा ईशुर लगे आसी करी बोलला, “हे गुरु नमस्कार आवरी ईशु के चुमला।” हाँय बंदी करबा बिता यहूदी अगुवामन के दखायबा काछे असन करला। तैबे ईशु बोलला, हे यहूदा काय तुई गोटक चूमा देई मोके धरायबी आस।

जैबे हाँय सिपाही ईशु के धरते रलाय, तैबे पतरस तार तलवार निकरायला, आवरी बड़े पुजारीर सेवकर कान के काटी देला। ईशु बोलला, तलवार के गुचाओ। मुई पिता के मोर बाचायबा काचे सरगदूतमनर गोटक सेना काचे विनती करके सकी। मातर मोके मोर पितार गोट मानबार आय, तैबे ईशु हाय मुनुकर कान अछा करी देला। तैबे सबू चेलामन परायलाय।