39. ईशुर ऊपरे मुकदमा होयबाटा

येबे मोजी रातीर समया होई रला। हाँय सिपाही ईशु के बड़े पुजारीर घरे आनलाय कसन बोलले हाँयमन ईशु के पचारबा काचे होयते रला। पतरस लापिले तिकर पिटी -पिटी आयते रला। जैबे ईशु के घरे नेलाय, तैबे पतरस बाहरे तेबी करी जोय चेकते रला।

घर भीतरे यहूदी अगुवामन ईशुर उपरे मुकदमा चलायलाय। हाँयमन तार विरोध ने गलत गोट के बोलबा काचे कुबे गलत गवा देऊमन के आनलाय। तिकर गोट हेतार -हातार ले सहमत ना रला। ऐईकाचे यहूदी अगुवामन ये पुरूप करके ना सकलाय, कि ईशु कोनी गोटर दोषी रला। ईशु कांही ना बोलला।

तैबे बड़े पुजारी मन ईशु बाटे दखी करी बोलला, “हामके सांग काय तुई जीवित मापरुर बेटा मसीह आस?”

ईशु बोलला, मुई आय आवरी तोमि मोके मापरु संगे बसलार आवरी सरग ले आयबाटा के पने दखबास। बड़ेपुजारी तार पटई के चिरला कसन बोलले जोन ईशु बोलला, हाँय गोट के कुबे रिस होईरला। हाँय उजवा अगुवा मन के चिचायला, हामके ये सागबा काचे कोनी उजवा गवा जरूरत नियाय, कि ये मुनुक काय करला आचे। तोमि सबु ताके ये बोलबार सुनलास, कि हाँय मापरूर बेटा आय। हातार बारे ने तोमर काय विचार आय।

सबू यहूदी अगुवा मन बड़े पुजारी के जबाब देलाय, हाँय मरबार योग्य आय। तैबे हाँयमन ईशुर आंखी ऊपरे पट्टी बाधलाय, हातार उपरे थूकलाय, हाके मारलाय आवरी हातार मजाक उड़ायला।

आवरी पतरस जैबे हाँय घरर बाहरे टाकी रला। तैबे गोटक दासी टोकी ताके दखला। हाँय ताके बोलला, तुई पने ईशुर संगे रलीस। पतरस माना करी देला, पाछे कोनी उजवा टोकी ये गोट के बोलला, पतरस आवरी माना करी देला। तैबे लोकमन बोललाय, जानू कि तुई ईशु संगे रलीस कसनबोलले तोमि दुनो गलीलर आस।

तैबे पतरस बोलला, जोदि मुई ये मुनुक के जानी तो मापरु मोके शराप देओ। पतरस असन किरिया कायलार पाछे तुरते, गोटक कुकड़ा बासला। ईशु पिटी उलटी करी पतरस के दखला।

पतरस हाँयतानले गला आवरी सुयंकी – सुयंकी करी कांदला। अड़की दाय ईशु के धरायला बिता यहूदा दखला कि यहूदी अगुवामन ईशु के मृत्यु दण्ड देला आत। यहूदा कुबे दुखी होयला, आवरी जाई करी खुद मारी होयला।

हाँय देशर राज्यपाल पिलातुस रला। हाँय रोम काचे काम करते रला। यहूदी अगुवामन ईशु के पिलातुस लगे आनलाय। हाँयमन बोलते रलाय कि पिलातुस ईशु के मृत्यु दण्ड देओ, आवरी हाके मारी देओ। तैबे पिलातुस ईशु के पचारला, “काय तुई यहूदीमनर राजा आस?”

ईशु जबाब देला, “तुई सत्ते बोललीस।” मातर मोर राज मजपुर नुआय। जोदि होयले मोर दास मोर काचे जुद्ध करताय। मुई मापरुर बारे ने सत्ते के सांगबा काचे आयलीआची। सबू लोक जोन सत्ते के मया करूआत। हाँय मोर सुनुआय, पिलातुस बोलला, तैबे सत्त कायाय।

ईशुर संगे गोटायलार पाछे, पिलातुस बाहरे लोक लगे आई बोलला, मुई असन काँई कारण ना पाई कि ये मुनुक मारबार योग्य होओ। मातर यहूदी अगुवामन आवरी लोकमन चिचायकरी बोललाय, “हाके कुरूस उपरे चेगाह।” पिलातुस जबाब देला, “हाँय कांही पने गलत करलार दोषी नुआय।” मातर हाँयमन आवरी अधिक चिचायलाय। तैबे पिलातुस तीन हार बोलला, “हाँय दोषी नुआय।”

पिलातुस डरला कि हाँय भीड़ दंगा मुरायबाय, ऐइकाचे हाँय तार सिपाहीमनर दवारा ईशु के कुरूस ऊपरे चेगायबा काचे मानलाय। रोमी सिपाही मन ईशु के कोड़ा मारलाय। आवरी ताके राज पटई पिन्दायलाय, आवरी तार मुंड ऊपरे कांटार बनालार मुकुट पिन्दायलाय। तैबे हाँयमन ये बोली करी हातार मजाक करलाय, “दखा यहूदीमनर राजा।”