41. मापरु ईशु के मरला तानले जियायला

सिपाहीमन ईशु के कुरूस उपरे चेगायलार पाछे, यहूदी अगुवा मन पिलातुस के बोललाय, हाँय झुटा ईशु बोली रला कि हाँय तीन दिन ने जीव उठसी। काही दखबा काचे मोड़ाभाट्टीर राखा करबार होयसी, कि तार चेलामन तार लाश के चोरी करी ना नेओत। जोदि हाँयमन असन करले हाँयमन बोलबाय कि हाँय मरला तानले जीव उठला आचे।

पिलातुस बोलला, सिपाही मनके निया आवरी जसन तोमि करके सकास असनी मोड़ाभाट्टीर राखा करा। ऐइकाचे हाँयमन मोड़ाभाट्टी बाटर पकना ऊपरे मुहर लगायलाय। हाँयमन दखबा काचे हाँयताने सिपाही के बसायलाय, कोनी पने हातार लाश के चोरके ना सकोत।

ईशुर मरलार पाछर दिन विसराम दिन रला, कोनी पने विसराम दिने काम ना करबार आत। ऐइकाचे संगर लोक कोनीपने मोड़ाभाट्टी ने नायलाय। मातर विसरामदिनर पाछर दिने बड़े सकरिया दाय बायले मन ईशुर मोड़ाभाट्टी ताने जिबाकाचे तियार होयलाय। हाँयमन तार लाश उपरे आवरी सुगंध लगायबा काचे होयते रलाय।

हाँय बायलेमनर केटबार पहिले, मोड़ा भाट्टी ने गोटक बड़े भूकम्प होयला। सरग ले गोटक सरग दूत आसी करी हाँय पकना के गुचायदेला। जाके मोड़ाभाट्टी ने जिबार बाटे ढाफी रलाय, आवरी हाँय लगे बसी रला। ये सरग दूत ऊजर अमता चमकते रला, मोड़ाभाट्टी लगे जोन सिपाही मन रलाय हाँयमन ताके दखलाय। हाँयमन डरी करी मरलार अमता होई भूई ने गसरलाय।

जड़कदाय हाँय बायलेमन मोड़ाभाट्टी ने केटलाय, तैबे हाँय सरग दूत तीके बोलला, “ना डरा”। ईशु एताने नियाय। ईशु मोरला तानले जीव ऊटला आचे। जसन ईशु बोली रला कि मुई जियबी। मोड़ाभाट्टी ने डगराहा आवरी दखा। बायलेमन मोड़ा भाट्टी आवरी जोन ताने ईशुर लाश के सोगायलार रला। हाँय ताने डगरायलाय आवरी दखलाय कि लाश हाँयताने ना रला।

तैबे सरग दूत बायलेमन के बोलला, जाई करी ईशुर चेलामन के सांगा, ईशु मरला तानले जीव उठला आचे। आवरी ईशु तोमर छोमे -छोमे गलील शहर ने जायसी।

हाँय बायलेमन चकित होयलाय, आवरी कुबे हरिक होयलाय। बायलेमन चेलामन के ये नगत खबर सांगबा काचे परायलाय।

जैबे हाँय बायले मन चेलामन के ये नगत खबर सांगबा काचे जायते रलाय। तैबे ईशु बाटे दखा देला। हाँयमन ईशुर पांय ने गसरलाय। तैबे ईशु बोलला, “ना डरा”। जाई करी मोर चेलामन के गलील शहर ने जिबा काचे बोला। हाँयमन हाँयताने मोके दखबाय।