42. ईशुर सरग ने लैवटी जिबार

जोन दिने मापरू ईशु के मरला तानले जियाय रला, ईशुर दुयटा चेलामन गाँव जायते रलाय। ईशुर संगे जोन घटना होई रला। हातार बारे ने गोटायते रलाय, हाँयमन के विसबास रला कि हाँय मसीह रला, मातर तैबे पने हाँय मारी गला। येबे हाँय बायलेमन बोलबा आत कि आवरी हाँय जियला आचे। हाँयमन ना जानते रलाय कि काहर गोट के बिसबास करबार आय।

ईश तिकर लगे आसी करी तिकर संगे हिंडते रला मातर हाँयमन ताके ना चितायलाय। ईशु पचारला कि हायमन काहर बारे गोटायबा आत, हाँयमन ताके बितला दिनर ईशुर संगे होयलार सबु घटना के सांगलाय। हाँयमन विचार करलाय कि हाँयमन कोन परदेशी संगे गोटायबा आत जोन ना जानते रला कि यरूशलेम ने काय होई रला।

तैबे ईशु तीके समझायला कि मापरुर वचन मसीहीर बारे ने काय सागुआय। कुबे पहिले भविषद सांगबा बितामन सांगी रलाय, कि अधरमी लोक मसीह के पीड़ित करबाय आवरी मारी देबाय। मातर भविषद सांगबा बितामन ये पने सांगी रलाय कि ईशु तीन दिनने जीव उठसी।

जैबे हाँयमन हाँय शहर ने केटलाय, जोन ताने हाँयमन दुनो लोक के तेबबार रला। अड़कीदाय अनुमान ने शंज होई रला, हाँयमन ईशु के तिकर संगे तेबबा काचे विनती करलाय तैबे ईशु तिकर संगे गोटक घरे गलाय, शंजबेरार भात कायबा काचे बसलाय। ईशु गोटक रोटी के धरी हातार काचे मापरू के धन्यवाद देला, आवरी रोटी के गोंदा करला, उदापड़े हाँयमन जानलाय कि ये ईशु रला। मातर अड़कीदाय ईशु तिकर आंखी ने दखा ना देला।

हाँयमन दुनो लोक हेके – हाके बोललाय, “ये ईशु रला!” ऐ इकाचे जैबे हाँय हामके मापरुर वचन के समझायते रला, तैबे हामी कुबे हरिक रलू! तुरते हाँयमन निकरी करी यरूशलेम लैवटी गलाय। जड़कदाय हाँयमन केटलाय तैबे हाँयमन चेलामन के सांगलाय ईशु जीव आचे, हामी ताके दखलू।

जड़कदाय चेलामन गोटायते रलाय, ईशु उदापड़े हाँई बाकरा ने परकट होयला। ईशु बोलला, तोमके, “शान्ति मिरो”। चेलामन विचार करलाय कि ये कोनी भुत आय। मातर ईशु बोलला, “तोमि काय काचे डरबा आस?” तोमि काय काचे ना विचार करास कि मुई सत्ते ईशु आय। मोर हाथमन आवरी घोड़मन के दखा।

ईशु बोलला, मोर बारे ने मापरुर वचन पने सागुआय असन घटना होयसी मुई तोमके सांगी रली कि अमता होयबार जरूरी आय। तैबे ईशु तीके मापरुर वचन के अच्छा समझायला। ईशु बोलला, पहिले भविषद सांगबा बितामन लिखी रलाय कि मुई ईशु के दुःख उठाय बार होयसी, मरबार होयसी, आवरी तीन दिनने मरला तानले जीव उठबार होयसी।

भविषद सांगबा बितामन ये पने लिखी रलाय कि मोर चेलामन मापरुर वचन के परचार करबाय। चेलामन सबु गोट के पश्चाताप करबा काचे सागबाय। जोदि हाँयमन असन करबाय तैबे मापरू तीके पाप के क्षमा करसी। मोर चेलामन ये खबरर प्रचार करबार यरूशलेम तानले मुरायबाय। तैबे हाँयमन सबु जगा सबु जातिमन लगे जिबाय। तोमि सबु लोक मोर सबु गोटर आवरी कामर गवा आहास, जोन मुई बोलली, आवरी करी रली आवरी हाँय सबु पने जोन मोर संगे होयला।

चालीस दिन तक ईशु तार चेलामन उपरे कुबे हार परकट होयला। गोटक हार तो ईशु गोटकी समया ने पाँच सौ ले अधिक लोकमन लगे परकट होयला। ईशु तार चेलामन लगे कुबे तरीकामन के देला कि हाँय जीव रला, आवरी ईशु तीके मापरुर राजर बारे ने सिखायला।

ईशु तार चेलामन के बोलला, मापरू मोके सरग आवरी मजपुरर सबु गोटक लोक ऊपरे राज करबार अधिकार देला आचे। ऐइकाचे येबे मुई तोमके बोलबी आची, जाई करी सबु जातिमनर लोकमन के चेला बनाहा। असन करबा काचे, तोमके तीके पिता, पुत्र, आवरी पवितर आतमार नावले बतिसमा देबार आय। जोन पने मुई तोमके आज्ञा देली आची हाँय सबु आज्ञा के मानबार पने तोमके तीके सिखायबार आय। सुरता करी राहा मुई आकट तोमर संगे रबी।

ईशुर मरलार जीव उठलार चालीस दिनर पाछे, ईशु तार चेलामन के बोलला, जड़कदाय तक कि मोर पिता तोमके शक्ति ना देहे, तैबे तक यरूशलेम ने तेबी राहा। हाँय तोमर ऊपरे पवितर आतमा पटायबार दवारा असन करसी। “तैबे ईशु सरग ने गला” आवरी गोटक बादरी ईशु के चेलामनर आंखी ले लुकायला। ईशु सरग ने सबुर उपरे राज करबा काचे मापरुर बुजनी हाथ बाटे बसला।