43. सेवा मुरायबाटा

ईशुर बाटे लैवटी जिबार पाछे, चेलामन यरूशलेम ताने तेबी रलाय जसन ईशु तीके करबा काचे आदेश देई रला। हाँय तानर बिसबासी लोक सबुदाय पारतना करबा काचे रुडते रलाय।

सबु बरसर फसल तियारर पाछे, पच्चास दिनर पाछे, यहूदी लोक पिन्तेकुस नावर गोटक महत्व पूर्ण दिन के बनायते रलाय। पिन्तेकुस हाँय समया रला जैबे यहूदी लोक गेंहू कटबा टाके बनायते रलाय। सबु मजपुर ले यहूदी लोक पिन्तेकुस दिने गोटक संगे बनायबा काचे यरूशलेम ने आसी रलाय ये बरस पिन्तेकुस बनायबार समया ईशुर सरग ने गलार अनुमान ने गोटक ह्प्तार पाछे आसी रला।

जोन समया ने सबु बिसबासी लोक गोटक लगे रूंडी रलाय। जोन घरे हाँय मन रलाय, उदापड़े हाँय घरे कुबे लेहरा ले भरला, तैबे जोय अमता कांही सबु बिसबासीमनर मुंडमन ऊपरे परकट होयला। हाँयमन सबु पवितर आतमा ले भरलाय आवरी हाँयमन उजवा भाषामन ने मापरुर भजन कीरतन करलाय ये हाँय भाषा रला जाके बोलबा काचे पवितर आतमा देई रला।

यरूशलेम ने रबा बिता लोकमन हाँय कोलार सुनबा के हाँयमन कुबे लोक रूंडी करी द्खबा काचे गोटक संगे आयलाय कि काय होयसी आचे। लोकमन बिसबासीमन के मापरू दवारा करलार बड़े -बड़े कामर घोषणा करबाटा के सुनायला लोकमन चकित होई रलाय, कसन बोलले लोकमन हाँय काममन के तीकर भाषामन ने सुनते रहेत।

ऐमन तानले कोनी -कोनी लोकमन बोललाय कि हाँय चेलामन निशा ने आचेत। मातर पतरस ठिंहा उठला आवरी हाँय बोलला, मोर गोट के सुना। ये लोक निशा ने नियात येके छाड़ी जोन तोमि दखबा आस ये हाँयई आय जाके योएल भविषद सागबा बिता बोली रला असन होयसी, मापरू बोलला अन्त दिने मुई मोर आतमा के देबी।

हे इसराइली मानेमन ईशु गोटक असन माने रला जोन ये दखायबा काचे कि ईशु कोन रला, कुबे अद्भुत काम करी रला। हाँय मापरुर शक्ति ले कुबे अद्भुत काममन के करी रला। तोमि सबु जानास कसन बोलले, तोमि ये काममन के दखला आस। मातर तोमि ताके कुरूस उपरे चेगायलास।

ईशु मरला मातर मापरु ताके मरला तानले जीव करला। ये हाँय गोटके पूरा करला, गोटक भविषद सागबा बिता बोली रला, तुई तोर पवितर लोक के मोड़ाभाट्टी ने सड़के ना देये। हामी गवा आचू कि मापरू ईशु के आवरी जीव करला।

मापरू पिता येबे ईशु के तार बुजनी बाटे बसाय करी ताके सम्मान देला आचे। आवरी ईशु हामर काचे पवितर आतमा पटायला आचे जसन कि हाँय वायदा करी रला। कि ईशु पटायसी, पवितर आतमा ये काम मनके होयके देयसी आचे। जाके तोमि दखबा आवरी सुनबा आस।

तोमि हाँय ईशु के कुरूस ऊपरे चेगाय देलास, मातर तोमि जानास कि मापरू ईशु के सबु मंजपुर उपरे परबू आवरी मसीह बनायला आचे।

पतरस सुनबा बिता लोक हातार दवारा बोललार, गोटले हृदय ले तरतरीरलाय। ऐइकाचे हाँयमन पतरस आवरी चेलामन के पचारलाय, भाईमन हामके काय करबार आय?

पतरस तीके जबाब देला, तोमि सबु गोटक लका तोमर पापमन काचे पश्चाताप करा कि मापरू तोमर पापमन के क्षमा करो आवरी ईशु मसीहीर नाव ले बतिसमा धरा। तैबे ईशु तोमके बरदान रूप ने पवितर आतमा पने देयसी।

पतरस जोन बोली रला, हाँय उपरे अनुमान ने तीन हजार लोक मन विसबास करलाय आवरी ईशुर चेलामन होयलाय। हाँयमन बतिसमा धरलाय आवरी यरूशलेमर मडलीर हिसा होयलाय।

जड़कदाय चेलामन तीके शिक्षा देलाय, तैबे विसबासीमन सबूदाय सुनलाय। हाँयमन आकट भेंट होयते रलाय, आवरी गोटक संगे भोजन करते रलाय, आवरी हाँय मन आकट एतार – हातार काचे पारतना करते रलाय। हाँयमन रूंडी करी मापरूर भजन कीरतन करलाय आवरी जोन पने तिकर लगे रला, हाँयमन हेके -हाके दखायलाय। नगरर सबु गोटक मुनुक तिकर काचे अच्छा विचार करबार आत। सबु दिने कुबे – कुबे लोक बिसबासी होयते रलाय।